عیسی اُلومه مَحکوم بُلیار
۱۹
سُنگرا پیلاتُس عیسانی توتوپ قامچیلاتدی.
یوحنا ۱۹:۱-۱۸
۲ سِربازلار تیکِندِن تاج اُروپ، اُنونگ باشینا قُیدیلار و اِگنینه ارغوانی دُن گِیدیردیلِر.
۳ یانینا باریپ: «یاشاسین، اِی یَهودیلِرینگ پادیشاهسی!» دییشیپ، اُنونگ دولوغینا شاپباق اوردولار.
۴ پیلاتُس یِنه داشاری چیقیپ، یَهودیلِره: «اینه، اُنی سیزینگ اُوونگیزه گِتیریَرین. اُندان هیچ بیر عاییپ تاپماندیغیمی بیلیپ قُیونگ» دییدی.
۵ شُل واقت باشی تیکِندِن تاج، اِگنی ارغوانی دُنلی عیسی داشاری چیقدی. پیلاتُس اُلارا: «اینه، اُل آدام!» دییدی.
۶ یُلباشچی کاهینلار بیلِن باشلیقلار عیسانی گُروپ: «اُنی صلیبه چویله، صلیبه چویله!» دییّپ قیغیریشدیلار. پیلاتُس اُلارا: «اُنی اَکیدیپ، اُزونگیز صلیبه چویلَنگ. مِن-اَ اُندان هیچ بیر عاییپ تاپمادیم» دییدی.
۷ یَهودی باشلیغلاری: «بیزینگ بیر شِریغاتیمیز بار، شُل شِریغاتا گُرَه اُل اُلمِلی، سِبَبی اُل اُزونی خودایینگ اُغلی دییّپ آدلاندیریار» دییدیلِر.
۸ بو سُزلِری اِشیدیپ، پیلاتُس خاص قُرقدی.
۹ اُل یِنه‌دِن اُز کاخینا گیریپ، عیسادان: «سِن نیرِلی؟» دییّپ سُرادی. اِمّا عیسی اُنگا جُغاپ بِرمِدی.
۱۰ پیلاتُس اُنگا: «سِن مِنینگ بیلِن کِپلِشمِکدِن یوز اُووریَنگمی؟ سِنی بُشاتماغا-دا، صلیبه چویلِمَگه-ده مِنینگ ایختییاریمینگ باردیغینی بیلِنگُقمی؟» دییدی.
۱۱ عیسی اُنگا: «اِگِر سانگا یُقاردان بِریلمِدیک بُلسادی، مِنینگ اوستومدِن هیچ هیلی ایختییارینگ بُلمازدی. شُنونگ اوچین هِم، مِنی توتوپ، سِنینگ اِلینگه بِرِنینگ گونَه‌سی خاص-دا آغیردیر» دییّپ جُغاپ بِردی.
۱۲ شوندان سُنگ پیلاتُس عیسانی بُشاتجاق بُلدی. اِمّا یَهودی باشلیغلاری قیغیریشیپ: «اُنی بُشاتسانگ، سِن ایمپِراطُرینگ دُستی دَلسینگ. کیم-ده کیم اُزونی پادیشاه حاساپلاسا، اُل ایمپِراطُرا قارشیدیر» دییدیلِر.
۱۳ پیلاتُس بو سُزلِری اِشیدیپ، عیسانی داشاری آلیپ چیقدی و داش یِر دییّلیَن یِرده حُکوم تاختیندا اُتوردی. بو یِرینگ عِبرانیچا آدی جابّاتادی.
۱۴ پِسَح بایرامی تاییارلیق گونودی و گونُرتانا قُلای پیلاتُس یَهودیلِره یوزلِنیپ: «اینه، سیزینگ پادیشاهنگیز!» دییدی.
۱۵ اُلار: «یُق اِت اُنی! یُق اِت! اُنی صلیبه چویله!» دییّپ قیغیریشدیلار. پیلاتُس اُلاردان: «پادیشاهنگیزی صلیبه چویلَیینمی؟» دییّپ سُرادی. یُلباشچی کاهینلار: «بیزینگ ایمپِراطُردان باشغا پادیشاهمیز یُقدور» دییّپ جُغاپ بِردیلِر.
۱۶ آخیرسُنگ پیلاتُس عیسانی صلیبه چویلِمِک اوچین، سِربازلارینگ اِلینه تابشیردی.
عیسی صلیبه چویلِنیَر
۱۷ سِربازلار عیسانی آلیپ گیتدیلِر. عیسی صلیبینی اُزی گُتِریپ، کِلّه‌چاناق دییّلیَن یِره گِلدی. بو یِرینگ عِبرانیچا آدی جُلجُتادی.
۱۸ اُل یِرده عیسانی و اُنونگ بیلِن بیله یِنه ایکی آدامی صلیبه چویلِدیلِر: اُلارینگ بیری – اُنونگ ساغ طارافیندا، بِیلِکیسی سُل طارافیندادی، عیسی بُلسا اُرتادادی.
۱۹ پیلاتُس بیر تاختانینگ یوزونه یازغی یازدیریپ، اُنی صلیبینگ یُقارسیندان آسدیردی. تاختادا: «یَهودیلِرینگ پادیشاهسی ناصِره‌لی عیسی» دییلیپ یازیلاندی.
یوحنا ۱۹:۱۹-۴۲
۲۰ عیسانینگ صلیبه چویلِنِن یِرینینگ شَهره قُلایدیغی اوچین، یازغینی کَن یَهودیلِر اُقیدیلار. اُل عِبرانیچا، لاتینچه و یونانیچا یازیلیپدی.
۲۱ یَهودیلِرینگ یُلباشچی کاهینلاری پیلاتُسا: «مونی ”یَهودیلِرینگ پادیشاهسی“ دییّپ یازما-دا، ”اُزونه مِن یَهودیلِرینگ پادیشاهسی دییدی“ دییّپ یاز» دییدیلِر.
۲۲ پیلاتُس اُلارا: «اِییَم یازجاغیمی یازدیم» دییّپ جُغاپ بِردی.
۲۳ عیسانی صلیبه چویلَن سِربازلار اُنونگ لِباسینی آلدیلار. اُنونگ گِییملِرینی دُرت بُلِگه بُلوپ، هِر سِربازا بیر پای بِردیلِر. ایچکی کُینِگینی هِم آلدیلار. ایچکی کُینِک تیکیلگی دَل-ده، بُیدان-باشا کَمیل دُقالیپدی.
۲۴ سِربازلار بیری-بیرینه: «گِلینگ، مونی ییرتمایلینگ، مونگا قُرعه آتایلینگ، کیمینگ قُرعه‌سی چیقسا، شُل آلار» دییدیلِر. بو مُقادِّس یازغیلارداقی:
«اُزآرا پایلاشیارلار گِییملِریمی،
لِباسیم اوچین قُرعه آتیارلار»*
دییِن سُزلِرینگ بِرجای بُلماغی اوچین شِیله بُلدی. سِربازلار شِیله هِم اِتدیلِر.
۲۵ عیسانینگ صلیبینینگ یانیندا اُنونگ اِنه‌سی، دایزاسی، کلوپاسینگ آیالی مریم و مَجدَلَلی مریم دیگ دوردی.
۲۶ عیسی اِنه‌سینی و اُنونگ یانیندا دوران سُیگولی شَگیردینی گُروپ، اِنه‌سینه: «اِی آیال، بو سِنینگ اُغلونگدیر» دییدی.
۲۷ اُنسُنگ شَگیرده باغیپ: «بو-دا سِنینگ اِنه‌نگدیر» دییدی. شُندان سُنگ یانگقی شَگیرت اُنی اُز اُیونه آلدی.
عیسانینگ اُلومی
۲۸ اُنسُنگ عیسی هِمّه زادینگ تامام بُلوپ باریانینی بیلیپ، مُقادِّس یازغیلارینگ بِرجای بُلماغی اوچین، «سوسادیم» دییدی.
۲۹ سِربازلار تورشی شِرابدان دُلی کویزَه بیر اَبری باتیریپ، زوفا شاخاسینا دانگدیلار-دا، ایچیرجِک بُلوپ، اُنی عیسانینگ آغزینا یِتیردیلِر.
۳۰ عیسی شِرابدان دادیندان سُنگ: «هِمّه‌سی بِرجای بُلدی!» دییدی و باشینی آشاق توتوپ جان بِردی.
۳۱ شُل گون تاییارلیق گونودی، اِرتِسی بُلسا اولی گون – سَبَّت گونودی. شُل سِبَپدِن سَبَّت گونی جِسِدلِر صلیبده قالماز یالی، یَهودی باشلیغلاری پیلاتُسدان صلیبه چویلِنِنلِرینگ آیاقلارینی دُووپ، جِسِدلِری آشاق دوشورتمِگی خاییش اِتدیلِر.
۳۲ شُنونگ اوچین هِم، سِربازلار باریپ، اَوَّل بیلِن عیسانینگ قاپدالیندا صلیبه چویلِنِن بیرینجی آدامینگ، سُنگرا ایکینجی آدامینگ آیاقلارینی دُودولِر.
۳۳ اِمّا عیسانینگ یانینا گِلِنلِرینده، اُنونگ اِییَم اُلِندیگینی گُروپ، آیاقلارینی دُومِدیلِر.
۳۴ مونگا باقمازدان، سِربازلارینگ بیری نایزا بیلِن اُنونگ بُورونَه سُقدی، شو واقتدا اُندان قان بیلِن سو چُغدوریلدی.
۳۵ مونی گُرِن آدام شاهات بُلدی، اُنونگ شاهاتلیغی حاقدیر. اُل سیزینگ ایمان گِتیرمِگینگیز اوچین، اُزونینگ دُغری آیدیاندیغینی بیلیَندیر.
۳۶ بو ایش «اُنونگ بیر سونگکی هِم دُوولمِز» دییِن مُقادِّس یازغیلارینگ بِرجای بُلماغی اوچین بُلدی.*
۳۷ مُقادِّس یازغیلارینگ باشغا بیر یِرینده بُلسا: «اُلار اُزلِرینینگ نایزا اورانینا، یَعنی مانگا گُزَرلِر» دییّلیَر.*
عیسانینگ جایلانیشی
۳۸ اُنسُنگ عیسانینگ شَگیردی بُلان، یُنه یَهودیلِردِن قُرقوپ، مونی گوزگَپ یُرِن رامه‌لی یوسف اُنونگ جِسِدینی صلیبدِن دوشوریپ آلماغا پیلاتُسدان اِجازا ایسلِدی. پیلاتُس اُنگا اِجازا بِردی. اُل باریپ، عیسانینگ جِسِدینی صلیبدِن دوشوریپ آلدی.
۳۹ اُزال گیجَه‌نینگ ایچینده عیسانینگ یانینا باران نیقودیموس هِم یوسف بیلِن بیلِدی. نیقودیموس اُتوز کیلو مُر و عود بیلِن قاریلان یاغینی آلیپ گِلدی.
۴۰ اُل ایکیسی عیسانینگ جِسِدینی گِتیریپ، یَهودیلِرینگ جایلاما عاداتینا گُرَه اُنی خوش ایسلی یاغ سِپیلِن کِفِنه دُلادیلار.
۴۱ عیسانینگ صلیبه چویلِنِن یِرینده بیر باغ باردی. اُل باغدا هِنیز هیچ کیم جایلانمادیق بیر تَزه قابر باردی.
۴۲ شُل گون یَهودیلِرینگ سَبَّت گونونه تاییارلیق گونودی. شُنونگ اوچین قابر یاقین بُلانسُنگ، عیسانینگ جِسِدینی شُل قابرینگ ایچینده قُیدولار.