عیسی پیلاتُسینگ اُوونده
۲۳
سُنگرا مِجلِسینگ هِمّه آداملاری یِرلِریندِن توروپ، عیسانی پیلاتُسینگ یانینا گِتیردیلِر.
لوقا ۲۳:۱-۲۵
۲ اُلار عیسانی عاییپلاماغا باشلادیلار: «بیز بو آدامینگ خالقیمیزی آزدیریاندیغینی گُردوک و اُل ایمپِراطُرا مالییات تُلِمَگه قارشی چیقیار و اُزونی مسیح هِم پادیشاه دییّپ آدلاندیریار.»
۳ پیلاتُس اُندان: «سِن یَهودیلِرینگ پادیشاهسیمی؟» دییّپ سُرادی. عیسی اُنگا: «اُز آیدیشینگ یالیدیر» دییّپ جُغاپ بِردی.
۴ سُنگرا پیلاتُس یُلباشچی کاهینلار بیلِن خالقا: «مِن بو آدامدا هیچ بیر عاییپ گُرمِدیم» دییدی.
۵ اِمّا اُلار قایتا-قایتا آیدیپ: «بو آدام اُز تَعلیماتی بیلِن تامام یهودیه‌نینگ خالقینی آزدیریار. اُل جلیل‌دِن باشلاپ، شو یِره چِنلی گِلدی» دییدیلِر.
۶ مونی اِشیدیپ، پیلاتُس: «بو آدام جلیل‌لیمی؟» دییّپ سُرادی.
۷ عیسانینگ هیرودیسینگ وِلایاتینداندیغینی بیلِنسُنگ، پیلاتُس اُنی هیرودیسینگ یانینا ایبِردی، سِبَبی شُل واقت هیرودیسینگ اُزی هِم اورشلیمدِدی.
۸ هیرودیس عیسانی گُروپ قاتی بِگِندی، سِبَبی کَن واقتدان بَری اُنی گُرمِک ایسلِیَردی. اُل باراداقی اِشیدِن کَن زاتلارینا گُرَه، اُندان بیر عالامات گُرِرین دییِن اومیدی باردی.
۹ هیرودیس اُندان کَن سُراغلار سُرادی، اِمّا عیسی اُنگا هیچ بیر جُغاپ بِرمِدی.
۱۰ یُلباشچی کاهینلار بیلِن دین عُلَمالار بُلسا اُل یِرده دوروپ، اُنی بیراغیزدان تُهمِت اوریاردیلار.
۱۱ سُنگرا هیرودیس بیلِن اُنونگ سِربازلاری عیسانی کیچِلدیپ ماسغارالادیلار. اوسّونه بیر نِفیس دُن گِیدیریپ، پیلاتُسینگ یانینا ایبِردیلِر.
۱۲ شُل گون پیلاتُس بیلِن هیرودیس دُست بُلدی. موندان اُوال اُلارینگ آراسیندا دوشمانچیلیق باردی.
۱۳ پیلاتُس یُلباشچی کاهینلاری، خالقینگ یاشولیلاری و آداملاری اویشوریپ،
۱۴ اُلارا: «سیز بو آدامی مِنینگ یانیما خالقی آزدیریار دییّپ گِتیردینگیز. مِن اُنی گُزونگیزینگ اُوونده سُراق اِتدیم، اِمّا اُل باراداقی تُهمِت اورمالارینگیزینگ هیچ بیری دُغری چیقمادی.
۱۵ اُنی هیرودیسینگ یانینا ایبِردیم، اُل هِم هیچ گونَه تاپمان، اُنی ایزینا ایبِردی. سیزینگ گُرشونگیز یالی، اُل اُلومه لاییق هیچ زات اِتمَندیر.
۱۶ شُنونگ اوچین هِم، مِن اُنونگ جِزاسینی بِریپ، بُشاتجاق» دییدی. [
۱۷ پیلاتُس بایرامچیلیق میناسیبِتلی خالقا بیر آدامی بُشادیپ بِرمِلیدی.]
۱۸ اِمّا هِمّه خالق بیراغیزدان: «بو آدامی هِلَک اِت! بیزه باراباسی بُشات!» دییّپ قیغیریشدیلار.
۱۹ باراباس شَهرده یوزه چیقان بیر قالماغالا قاتناشاندیغی و قاتلدیغی اوچین زیندانا سالنیپدی.
۲۰ پیلاتُس عیسانی بُشاتماق نییِتی بیلِن یِنه-ده خالقا یوزلِندی.
۲۱ اِمّا اُلار: «اُنی صلیبه چویله! صلیبه چویله!» دییّپ قیغیریشدیلار.
۲۲ پیلاتُس اوچونجی گِزِک اُلارا: «نَمه اوچین؟ بو آدام نَمه جِنایات ایش اِتدی؟ مِن اُندان اُلوم جِزاسینا لاییق هیچ زات تاپمادیم. شُنونگ اوچین هِم اُنی جِزالاندیریپ بُشاتجاق» دییدی.
۲۳ اِمّا اُلار سِسلِرینی خاص قاتالدیپ، قایتا-قایتا بیلِن اُنونگ صلیبه چویلِنمِگینی ایسلِدیلِر و اُلارینگ سِسی اوستون چیقدی.
۲۴ شِیلِلیک بیلِن، پیلاتُس اُلارینگ ایسلِگینی بِرجای اِتمِک قارارینا گِلدی.
۲۵ اُلارینگ سُران آدامینی، قالماغال تورزوپ، آدام اُلدورِنی اوچین زیندانا سالنان آدامی بُشاتدی، عیسانی بُلسا اُلارینگ ایختییارینا بِردی.
عیسی صلیبه چویلِنیَر
۲۶ سِربازلار عیسانی آلیپ باریارقالار، اِکینچیلیگیندِن گِلیَن قیرِوانلی شمعونی توتوپ، آرقاسینا صلیبی یوکلِدیلِر و عیسانینگ ایزیندان یُریمَگه مِجبور اِتدیلِر.
لوقا ۲۳:۲۶-۴۳
۲۷ اولی بیر جِماغات عیسانینگ ایزینا دوشوپ گیتدی، اُلارینگ آراسیندا اُنونگ اوچین زار-زار آغلایان آیال‍لار هِم باردی.
۲۸ عیسی اُل آیال‍لارا طاراف اُورولیپ، شِیله دییدی: «اِی اورشلیم قیزلاری! مِنینگ اوچین آغلامانگ. اُزونگیز و فِرزِنتلِرینگیز اوچین آغلانگ.
۲۹ چونکی شِیله بیر گونلِر گِلِر، آداملار: ”گُورِلی بُلمایان آیال‍لار، دُغورمادیق گُوره‌لِر، چاغا اِمدیرمِدیک گُووسلِر نَهیلی خوشواقت!“ دییِرلِر.
۳۰ شُندا داغلارا: ”بیزینگ اوستومیزه ییقیلینگ!“ دِپه‌لِره: ”بیزینگ اوستومیزی اُرتونگ!“ دییِرلِر.*
۳۱ اِگِر آداملار گُک باغا شِیله زاتلار اِدیَن بُلسالار، اُندا قوری باغا نَمه بُلار؟»
۳۲ عیسی بیلِن باشغا ایکی جِنایاتچینی هِم جِزالاندیرماق اوچین آلیپ باریاردیلار.
۳۳ اُلار «کِلّه‌چاناق» دییِن یِره گِلِنلِریندِن سُنگ، عیسانی یانگقی جِنایاتچیلار بیلِن بیرلیکده صلیبه چویلِدیلِر. جِنایاتچیلارینگ بیری اُنونگ ساغ طارافیندا، بِیلِکیسی سُل طارافیندادی.
۳۴ عیسی: «آتام! اُلاری باغیشلا، سِبَبی اُلار نَمه اِدیَنلِرینی بیلِنُقلار» دییدی. سِربازلار قُرعه آتیشیپ، اُنونگ لِباسلارینی پایلاشیاردیلار.
۳۵ خالق اُنگا باقیپ دوردی. یُلباشچیلار هِم اُنونگ اوستوندِن گولوپ: «اُل باشغالاری نِجات بِردی. اِگِر اُل خودایینگ سِچیپ-سایلانان مسیحی بُلسا، دِگمه، ایندی اُزونی هِم نِجات بِرسیندَه!» دییّشیَردیلِر.
۳۶ سِربازلار هِم یانینا گِلیپ، اُنی ماسغارالایاردیلار و اُنگا تورشی شِراب بِردیلِر:
۳۷ «اِگِر یَهودیلِرینگ پادیشاهسی بُلسانگ، اُزونگی نِجات بِر-دا!» دییَّردیلِر.
۳۸ اُنونگ دِپه‌سینده بُلسا: «بو یَهودیلِرینگ پادیشاهسیدیر» دییِن یازو باردی.
۳۹ چویلِنِن جِنایاتچیلارینگ بیری اُنگا سِووپ: «سِن مسیح دَلمی نَمه؟ اُندا اُزونگی-ده، بیزی-ده نِجات بِر-دَه!» دییدی.
۴۰ ایکینجی جِنایاتچی بُلسا مونی آیدانا کَییپ: «سِن خودایدان قُرقانگُقمی؟ سِن هِم اُنونگ بیلِن بیر جِزانی چِکیَرسینگ!
۴۱ بیز اُز اِتمیشیمیزه لاییق عادالاتلی جِزا آلدیق. اِمّا بو آدام هیچ بیر تِلِکه ایش اِتمِدی آخیری» دییدی.
۴۲ سُنگرا اُل: «عیسی، شاهلیغینگا باران واقتینگ مِنی یادلاغین!» دییدی.
۴۳ عیسی هِم اُنگا: «سانگا دُغروسینی آیدیارین، سِن شو گون مِنینگ بیلِن بیله جِنِّتده بُلارسینگ» دییدی.
عیسانینگ اُلومی
۴۴ واقت گونُرتانا قُلایلاندا، گونونگ یوزی توتولدی، اُیلَن ساغات اوچه چِنلی هِمّه یوردی قارانگقیلیق آلدی.
لوقا ۲۳:۴۴-۵۶
۴۵ عیباداتخانانینگ پِرده‌سی اُرتاراسیندان ییرتیلیپ، ایکَه بُلوندی.
۴۶ * عیسی قاتی سِس بیلِن قیغیریپ: «آتام! روحومی سِنینگ اِلینگه تابشیریارین» دییدی-ده، جان بِردی.
۴۷ اَفسَر بُلان واقانی گُروپ، خودایی اُودی. اُل: «بو، حاقیقاتدان-دا، دُغری آدام میشدیق!» دییدی.
۴۸ بو زاتلارا تُماشا اِتمِک اوچین اویشِن هِمّه خالق بُلان واقالاری گُروپ، قورساقلارینی یومروقلای-یومروقلای ایزلارینا قایتدی.
۴۹ عیسانی تانییان آداملارینگ هِمّه‌سی، شِیله-ده جلیل‌دِن اُنونگ ایزینا دوشوپ گِلِن آیال‍لار داشراقدا دوروپ، بو واقالارا سین اِدیَردیلِر.
عیسانینگ جایلانیشی
۵۰ مِجلِس آداملاریندان یوسف آدلی بیر آدام باردی. اُل قاوی هِم دُغری آدامدی.
۵۱ اُزی-ده مِجلِسینگ قارارینا و ایشینه راضیلیق بِرمَندی. یوسف یهودیه‌نینگ رامه شَهریندِن بُلوپ، خودایینگ پادیشاهلیغینا قاراشیاردی.
۵۲ اُل پیلاتُسینگ یانینا باریپ، عیسانینگ جِسِدینی دیلِدی.
۵۳ سُنگرا اُنی آشاق دوشوریپ، کِفِنه دُلاپ، قایادا قازیلان و حَضیر چِنلی هیچ کیمینگ جایلانمادیق قابریندا جایلادی.
۵۴ بو ایش تاییارلیق گونونینگ آخیریندا بُلوپ، سَبَّت گونونینگ باشلانماغینا قُلایدی.