عیسی اُزونه دُغا اِدیَر
۱۷
بو زاتلاری آیدانسُنگ، عیسی گُزلِرینی آسمانا تیکیپ، شِیله دییدی: «اِی آتام، واقت گِلدی. اُغلونگی بِییکلِندیر، اُغلونگ هِم سِنی بِییکلِندیرسین.
یوحنا ۱۷:۱-۱۲
۲ سِن اُغلا هِمّه اینسانلارینگ اوستوندِن ایختییار بِردینگ. دِگمه، اُغول هِم سِنینگ اُنگا تابشیران هِمّه اینسانلارینگا اِبِدی یاشاییش بِرسین.
۳ اِبِدی یاشاییش بُلسا، سِنی، یَعنی یِکه حاق خودایی و سِنینگ ایبِرِن عیسی مسیحینگی تانیماقدیر.
۴ اُزومه تابشیران ایشینگی کِمالا یِتیرمِک بیلِن مِن سِنی یِر یوزونده بِییکلِندیردیم.
۵ اِی آتام، دونیَه دُرِمِزدِن اُوال هِم مِن سِنینگ یانینگداقام بِییکلیگیم باردی. ایندی شُل بِییکلیک بیلِن مِنی یِنه-ده اُز حوضورینگدا بِییکلِندیر.
عیسی شَگیرتلِره دُغا اِدیَر
۶ «دونیَه‌دِن اُزومه بِرِن آداملارینگا سِنینگ آدینگی آیان اِتدیم. اُلار سِنینگکیدی و سِن اُلاری مانگا بِردینگ، اُلار سِنینگ سُزونگی بِرجای اِتدیلِر.
۷ ایندی اُلار مانگا بِرِن هِمّه زادینگ سِندِندیگینی بیلیَرلِر.
۸ چونکی مانگا آیدان سُزلِرینگی مِن اُلارا یِتیردیم. اُلار سُزلِرینگی قابول اِدیپ، مِنینگ، حاقیقاتدان-دا، سِندِن گِلِندیگیمی بیلدیلِر. مِنی سِنینگ ایبِرِندیگینگه ایمان گِتیردیلِر.
۹ اُلار اوچین سانگا یالباریارین. دونیَه اوچین دَل-ده، مانگا بِرِن آداملارینگ اوچین یالباریارین، چونکی اُلار سِنینگکیدیر.
۱۰ مِنینگ هِمّه زادیم سِنینگکیدیر، سِنینگکی-ده مِنینگکیدیر، مِن اُلارینگ اوستو بیلِن بِییکلِندیم.
۱۱ مِن بو دونیَه‌ده موندان کَن قالمارین، اِمّا اُلار هِنیز دونیَه‌دِدیرلِر. مِن سِنینگ یانینگا دُلانیپ باریارین. اِی مُقادِّس آتام، مانگا بِرِن آداملارینگی اُز قودراتلی گویجونگ بیلِن قُرا. مانگا-دا شُل گویجی سِن بِردینگ. شُندا اُلار هِم بیزینگ یالی بیر بُلسونلار.
۱۲ مِن اُلارینگ یانینداقام، مانگا بِرِن قودراتینگ بیلِن اُلاری قُریپ ساقلادیم. مُقادِّس یازغیلار بِرجای بُلسون دییّپ، هِلَک اِدیلمِلی آدامدان باشغا اُلارینگ هیچ بیری ییتمِدی.
۱۳ ایندی مِن سِنینگ یانینگا باریارین. اُلار مِنینگ شاتلیغیمدان دُلسون دییّپ، بولاری اُلارا هِنیز بو دونیَه‌دِکَم آیدیارین.
یوحنا ۱۷:۱۳-۲۶
۱۴ مِن اُلارا سِنینگ سُزلِرینگی یِتیردیم، دونیَه بُلسا اُلاری ییگرِندی. چونکی مِنینگ دونیَه‌دِن بُلمایشیم یالی، اُلار-دا دونیَه‌دِن دَلدیرلِر.
۱۵ اُلاری دونیَه‌دِن آلماغینگی دَل-ده، شِیطاندان قُریماغینگی دیلِیَرین.
۱۶ مِنینگ بو دونیَه‌دِن بُلمایشیم یالی، اُلار-دا بو دونیَه‌دِن دَلدیرلِر.
۱۷ سِنینگ سُزونگ حاقیقاتدیر. حاقیقاتینگ اوستو بیلِن اُلاری اُزونگه مُقادِّس اِت.
۱۸ سِنینگ مِنی دونیَه ایبِریشینگ یالی، مِن هِم اُلاری دونیَه ایبِردیم.
۱۹ اُلار اوچین، مِن اُزومی سانگا باغیش اِتیَم، شِیدیپ، اُلار هِم حاقیقات بیلِن اُزلِرینی سانگا باغیش اِدِرلِر.
عیسی هِمّه ایماندارلارا دُغا اِدیَر
۲۰ «مِن دینگه اُلار اوچین دَل، شُندا اُلارینگ واغظی بیلِن مانگا ایمان گِتیرجِکلِر اوچین-ده دُغا اِدیَرین.
۲۱ اُلارینگ هِمّه‌سی بیر بُلسون. آتا، سِن مِنده و مِن-ده سِنده بُلشوم یالی، اُلار هِم بیزده بُلسونلار. شِیلِلیکده، مِنی سِنینگ ایبِرِندیگینگه دونیَه ایمان گِتیرسین.
۲۲ مانگا بِرِن بِییکلینگی اُلارا-دا بِردیم. بیزینگ بیر بُلشومیز یالی، اُلار-دا بیر بُلسون.
۲۳ مِن اُلاردادیرین، سِن بُلسا مِندِسینگ. مِنی سِنینگ ایبِرِندیگینگی، مِنی سُیشونگ کیمین اُلاری-دا سُییَندیگینگی دونیَه بیلِر یالی، اُلار کَمیل بیرلیکده بُلسونلار.
۲۴ اِی آتا، سِنینگ مانگا بِرِن اینسانلارینگ-دا مِنینگ بیلِن بیر یِرده بُلماقلارینی ایسلِیَرین. شِیله هِم، دِگمه، اُلار مِنینگ بِییکلیگیمی و سِنینگ مانگا بِرِن بِییکلینگی گُرسونلِر. چونکی سِن مِنی دونیَه یارادیلمازدان اُنگ سُییَردینگ.