۱۱
مِن مسیحدِن نِمونه آلشیم یالی، سیز-ده مِندِن نِمونه آلینگ.
اِدِبلی عیبادات
۲ مِنی اِلمیداما یادلایاندیغینگیز و تَعلیماتی سیزه تابشیریشیم یالی ساقلایاندیغینگیز اوچین سیزی اُویَرین.
۳ اِمّا شونگا هِم دوشونمِگینگیزی ایسلِیَرین: هِر اِرکِگینگ باشی مسیحدیر، آیالینگ باشی اِرکِکدیر و مسیحینگ باشی بُلسا خودایدیر.
۴ باشینی اُرتوپ، دُغا یا-دا نبوّتلیق اِدیَن اِرکِک کیشی اُز باشینی بیحُرمات اِدیَندیر.
۵ و اِمّا باشینی اُرتمَن دُغا یا-دا نبوّتلیق اِدیَن آیال اُز باشینی بیحُرمات اِدیَندیر. اُل باشی سیریلان آیال بیلِن دِس-دِنگدیر.
۶ هاووا، اِگِر آیال باشینی اُرتمِیَن بُلسا، اُندا، قُی، ساچینی-دا کِسدیرسین. یُنه آیالینگ ساچینی کِسمِگی یا-دا سیردیرماغی بی‌آبرایچیلیقدیر. شُنگا گُرَه، قُی، اُل باشینی اُرتسون.
۷ اِرکِک باشینی اُرتمِلی دَلدیر. چونکی اُل خودایینگ صوراتیدیر و اُنونگ بِییکلیگیدیر. اِمّا آیال بُلسا اِرکِگینگ بِییکلیگیدیر.
۸ چونکی اُزال-باشدان اِرکِک آیالدان دَل-ده، آیال اِرکِکدِن یارادیلاندیر؛
۹ اِرکِک آیال اوچین دَل-ده، آیال اِرکِک اوچین یارادیلاندیر.
۱۰ شُنونگ اوچین و پِریشده‌لِرینگ خاطیرینا آیالینگ باشیندا اَرینه موطیع‌دیغینی گُرکِزیَن عالامات بُلمالیدیر.
۱۱ یُنه هِر هیلی بُلسا-دا، خودایدا آیال اِرکِگه، اِرکِک-ده آیالا باغلیدیر.
۱۲ چونکی آیال اِرکِکدِن یارادیلان بُلسا-دا، اِرکِک آیالدان دُغیاندیر. اِمّا هِمّه‌سینی هِم خودای یاراداندیر.
۱۳ اُزونگیز فیکر اِدیپ گُرونگ: آیال باشینی اُرتمَن خودایا دُغا اِتسه گِلشیکلیمی؟
۱۴ اِرکِک ساچینی اُسدورسه بی‌آبرایچیلیقدیغینی طِبیغاتینگ اُزی سیزه اُورِتمِیَرمی نَمه؟
۱۵ اِمّا آیال اوچین بُلسا اوزین ساچ حُرماتدیر. اوزین ساچ اُنگا باشُرتگوسی حُکمونده بِرلِندیر.
۱۶ اِگِر بو مِسِله باباتدا جِدِل اِتمِکچی بُلیان کیشی بار بُلسا، شونی دییَّرین: بیزینگ و خودایینگ کِلیسالاریندا آیال‍لارینگ باش اُرتمِگی عاداتدیر.
مسیحینگ سُفره‌سینی قادیرسیز توتمانگ!
۱۷ ایندی بُلسا شو تابشیریقلاری بِرمِک بیلِن بیرلیکده، اُزومینگ تعریفلامایان زادیم بارادا آیتماقچی: سیزینگ ییغنانیشیقلارینگیزینگ پِیداسیندان زییانی کَندیر.
۱۸ بیرینجیدِن، کِلیسادا اویشِنینگیزده، آرانگیزدا بُلونگیشیکلِرینگ بُلیاندیغی باراداقی گورّونگلِر مِنینگ قولاغیما یِتیَر. مِن مونگا آز-کِم اینانمان-دا دورامُق.
۱۹ سِبَبی آرانگیزدا بُلونیشیکلِر بُلمالی زاتدیر. چونکی بُلونیشیکلِر خودایینگ تاصدیقلان آداملارینی اَشکَر اِدیَر.
۲۰ سیز بیر یِره اویشِنینگیزده، مسیحینگ سُفره‌سینا قاتناشیارسینگیز دییّپ حاساپ اِدیَرسینگیز، آصلیندا بو بِیله دَل.
۲۱ سِبَبی سُفره‌دان اییِنینگیز واقتی، گِتیرِن اییمیتینگیزی باشغالار بیلِن پایلاشمان، اُزونگیز اییَّرسینگیز. شِیدیپ، بیری آچ قالیار، باشغا بیری بُلسا سِرخُش بُلیار.
۲۲ اُندا اییّپ-ایچمِک اوچین اُز اُیونگیز یُقمی؟ یا-دا سیز خودایینگ کِلیساسینی اَسگِرمَن، قاریپلاری کیچِلتمِک ایسلِیَنگیزمی؟ مِن مونگا نَمه دییِیین؟ شِیله اِدیَنینگیز اوچین سیزی تعریفلایینمی؟ اِلبِتّه، یُق!
۲۳-۲۴ چونکی مِن عیسادان آلان تَعلیماتیمی سیزه تابشیردیم. تانگری عیسی اُزونه خایینلیق اِدیپ توتولان گیجه‌سی اِلینه چُرِک آلیپ، شوکور اِتدی. سُنگرا چُرِگی بُلوپ: «بو سیزینگ اوچین بِرلِن بِدِنیمدیر. مونی مِنی یادلاماق اوچین بِرجای اِدینگ» دییدی.
۲۵ شونونگ یالی، شامدان سُنگ شِرابلی کَسَنی آلیپ: «بو شِراب مِنینگ قانیمینگ اوستو بیلِن باغلانیشیلان تَزه عَهددیر. اُندان هِر گِزِک ایچِنینگیزده، مونی مِنی یادلاماق اوچین بِرجای اِدینگ» دییدی.
۲۶ شُنگا گُرَه-ده، سیز هِر گِزِک بو چُرِگی اییِنینگیزده و بو کَسه‌دِن ایچِنینگیزده، عیسی دُلانیپ گِلیَنچَه، اُنونگ اُلومینی اِعلان اِدیَرسینگیز.
۲۷ شونلوقدا، هِر کیم میناسیپ بُلمادیق یُلدا بو چُرِکدِن اییسه یا-دا عیسانینگ کَسه‌سیندِن ایچسه، اُنونگ بِدِنی و قانی باباتدا گونَه‌لی بُلار.
۲۸ شُنونگ اوچین-ده، هِر کِس دینگه اُزونی ایمتِحان اِدیپ گُرِنسُنگ، بو چُرِکدِن اییمِلی و بو کَسه‌دِن ایچمِلی.
۲۹ هِر کیم عیسانینگ بِدِنینی سایغارمان اییّپ-ایچسه، اُز-اُزونی مَحکومییِته دوچار اِدیَندیر.
۳۰ اینه، شو سِبَپدِن آرانگیزدا اِجیزلِر و مِریضلِر کَن، اُلِنلِرینگیز هِم آز دَلدیر.
۳۱ اِمّا بیز اَوَّل اُزومیزه حُکوم اِدِن بُلسادیق، اُندا حُکومه دوچار بُلمازدیق.
۳۲ خودای بیزی تِربیِتلِمِک اوچین حُکوم اِدیَندیر. اُل مونی بیزینگ دونیَه بیلِن بیرلیکده مَحکوم اِدیلمِزلیگیمیز اوچین اِدیَر.
۳۳ شونلوقدا، اِی عزیزلِر، مسیحینگ سُفره‌سیندا اییمِک اوچین اویشِنینگیزده، بیری-بیرینگیزه قاراشینگ.
۳۴ اِگِر بیری آچ بُلسا، قُی، اُز اُیونده اییسین. شُندا اُل ییغناقدا مَحکوم اِدیلمِز. قالان زاتلاری بُلسا یانینگیزا بارانیمدا چُزِرین.