اسرائیل‌ینگ بُت‌پَرَستلیگینینگ نِتیجه‌سی
۱۰
اِی عزیزلِر، مِن سیزینگ شولاردان خابارلی بُلماغینگیزی ایسلِیَرین: بیزینگ آتا-بابالاریمیزینگ باری بولودینگ آشاغیندادیلار و اُلارینگ باری دِریانینگ آراسیندان گِچدیلِر.
۲ اُلارینگ باری بولودا و دِریادا تَعمیدلِندیریپ، موسانینگ ایزینا دوشدولِر.
۳ اُلارینگ باری آسماندان اینِن شُل بیر اییمیتی اییدیلِر.
۴ اُلارینگ باری خودای طارافیندان بِرلِن شُل بیر سودان ایچدیلِر. چونکی اُلارینگ باری اُزلِرینه هِمراه‌لیق اِدِن روحانی قایادان ایچیَردیلِر و بو قایا بُلسا مسیحدی.
۵ اِمّا خودای شُندا-دا اُلارینگ کَنسیندِن هِم راضی دَلدی، شُنونگ اوچین-ده اُلارینگ جِسِدلِری بیاباندا پیتراپ گیتدی.
۶ بیز هِم آتا-بابالاریمیز یالی یورِکلِریمیزی یامانلیغا هُوِس اِتمِز یالی، بولارینگ باری بیزه نِمونه‌دیر.
۷ اُلارینگ کَبیرلِری یالی بُت‌پَرَست بُلمانگ. اُلار بارادا تُورات‌دا شِیله یازیلاندیر: «آداملار اییّپ-ایچمَگه اُتوردیلار، سُنگرا توروپ، اُیناشماغا باشلاپ اِتجِک زاتلارینی اِتدیلِر».*
۸ اُلارینگ کَبیرلِری یالی آخلاقسیزلیق اِتمَیلینگ، چونکی بیر گونده اُلارینگ ییگریمی اوچ مونگوسی اُلدی.
۹ اُلارینگ کَبیرلِری یالی مسیحی ایمتِحانلامایلینگ، چونکی اُلار ییلاندان هِلَک بُلدولار.
۱۰ اُلارینگ کَبیرلِری یالی زِیرِنمَیلینگ، چونکی اُلار عِزراییلینگ اِلیندِن اُلدی.
۱۱ بولارینگ باری باشغالارا نِمونه بُلسون دییّپ، آتا-بابالاریمیزینگ باشیندان ایندی. بو زامانینگ آخیرقی گونلِرینده یاشایانلارا، یَعنی بیزه بیلدیرمِک حُکمونده یازیلدی.
۱۲ شونلوقدا، سیز قاییم دوراندیریس دییّپ فیکر اِدیَن-ده بُلسانگیز، گونَه وِسوِسه‌سینده ییقیلماز یالی، خاباردار بُلونگ!
۱۳ باشینگیزدان اینِن وِسوِسه‌لِر باشغالارینگ-دا باشیندان اینیَندیر. اِمّا خودای اِمیندیر! اُل سیزینگ گویجونگیزینگ یِتمِجِک وِسوِسه‌سینی بِرمِز. سیز وِسوِسه دوشِنینگیزده، خودای قاپی-دا آچار، وِسوِسه‌دِن اوستون چیقماق اوچین گویچ-قووات هِم بِرِر.
بُتخانالارا بارمانگ!
۱۴ شُنونگ اوچین، اِی مِنینگ عزیزلِریم، بُت‌پَرَستلیکدِن قاچینگ.
۱۵ مِن سیزینگ بیلِن دوشونجِلی آداملار حُکمونده گورلِشیَرین. سیزه آیدیانلاریمدان اُزونگیز نِتیجه آلینگ.
۱۶ مسیحینگ سُفره‌سینا بیز شوکور اِدیپ، بِرِکِت کَسه‌سیندِن ایچِنیمیزده، مسیحینگ قانینا شِریک بُلمایاریسمی؟ و چُرِگی بُلوپ اییِنیمیزده، مسیحینگ بِدِنینه شِریک بُلمایاریسمی؟
۱۷ چُرِگینگ بیر بُلشی یالی، بیز کَن بُلساق-دا، بیر بِدِندیریس. چونکی شُل بیر چُرِگی هِمَّه‌میز پایلاشیاندیریس.
۱۸ اسرائیل خالقینا سِراِدینگ. قربانلیقلاری اییَّنلِر قربانلیق اِدیلیَن جای بیلِن شِریکلیگی بُلمایارمی؟
۱۹ مونی دییمِک بیلِن، بُتا بِرلِن قربانلیغینگ یا-دا بُتونگ اُزونینگ هایسیدیر بیر اَهمییِتی بار دییجِک بُلیارینمی؟
۲۰ اِلبِتّه، یُق! مِن بُت‌پَرَستلِرینگ بِریَن قربانلیغینی خودایا دَل-ده، جینلارا بِریَندیگینی آیتجاق بُلیارین. مِن سیزینگ جینلارا شِریک بُلماغینگیزی ایسلَمُق.
۲۱ سیز هِم مسیحینگ کَسه‌سیندِن، هِم-ده جینلارینگ کَسه‌سیندِن ایچیپ بیلمِرسینگیز. سیز هِم مسیحینگ سُفره‌سینا، هِم-ده جینلارینگ سُفره‌سینا شِریک بُلوپ بیلمِرسینگیز.
۲۲ یا-دا بیز خودایینگ غایراتلیغینی توروزماقچیمی؟ یا-دا بیز اُندان گویچلیمی نَمه؟
ایماندارلارینگ آزادلیغی
۲۳ سیز: «ایسلِیَن زادیمی اِتمَگه حاقیم بار» دییَّرسینگیز. هاووا، یُنه هِر زات سیزینگ اوچین پِیدالی دَلدیر. «ایسلِیَن زادیمی اِتمَگه حاقیم بار»، یُنه هِمّه زات آبادلایان دَلدیر.
۲۴ هیچ کیم اُز پِیداسینی دَل-ده، باشغالارینگ پِیداسینی گُزلِسین.
۲۵ قصابخانادا ساتیلیان هِر اِتی اییّپ بیلیَرسینگیز. دویبینه یِتجِک بُلوپ، وِجدانینگیزی حُرلامانگ.
۲۶ چونکی «یِر و اُنداقی هِمّه زاتلار خودایینگقیدیر».*
۲۷ اِگِر ایمان گِتیرمِدیکلِرینگ بیری سیزی ناهارا چاغیرسا، سیز-ده گیتمِگی ایسلِسِنگیز، اُوونگیزده قُیلان زاتلاری چِکینمَن اییّبِرینگ. دویبینه یِتجِک بُلوپ، وِجدانینگیزی حُرلامانگ.
۲۸ اِمّا بیری سیزه: «بو بُتلارا قربانلیق بِرلِن اِتدیر» دییسه، شُندا بو اِت بارادا بیلدیرِن آدامینگ و وِجدانینگ خاطیرینا اُنی اییمَنگ.
۲۹ مِن سیزینگ وِجدانینگیز دَل-ده، ماقصات شُل آدامینگ وِجدانی بارادا آیدیارین.
نَمه اوچین باشغاسینینگ وِجدانی مِنینگ آزادلیغیما حُکوم اِتمِلی؟
۳۰ اِگِر مِن اییمیت اییمِزدِن اُنگ خودایا شوکور اِدیپ، اییمیتَه قُشولیان بُلسام، اُندا نَمه اوچین شوکور اِدیَن اییمیتیم اوچین عاییپلانیارقام؟
۳۱ شونلوقدا، اییسِنگیز-ده، ایچسِنگیز-ده، هِر نَمه اِتسِنگیز-ده – بولارینگ بارینی خودایینگ بِییکلیگی اوچین اِدینگ.
۳۲ یَهودیلِرینگ-ده، یونانیلارینگ-دا، خودایینگ کِلیساسینینگ-دا، قاراز، هیچ کیمینگ بودریمِگینه سِبَپ بُلمانگ.
۳۳ چونکی مِن اُز پِیدامی گُزلِمَن، کَن آداملارینگ نِجات تاپماغی اوچین اُلارینگ پِیداسینی گُزلِیَرین، هِر زاتدا هِر کیمی راضی اِتمَگه چالیشیارین.