2 PETÛRÛ
Mantû ma baarûa îno
Îno n'yo baarûa ya ciîrî Petûrû kwandîka. Tûtiiyî i ba ûû aandîkagîra, îndî kûrîoneka aandîkîrîte yo eetîgîri ba gûntû mwanya mwanya.
Baarûa îno yaarîîrîîtie mantû mana. Ûntû bwa mbere, Petûrû eerîîte bara bakaamîthooma babatîîrue boonanagia maciaro ma wonokio bwao. Mûkîrîstû abatîîrue oongagîîra ûkîrîstû magiita monthe. Eekîrîte Akîrîstû wîru auga Ngai nabeete bionthe bira bikwendekana kaingo baûmba gûkûra.
Ûntû bwa maîrî, Paûrû naririkanîîtie athoomi ba baarûa îno atî, bûra beetîgîîtie i bu kûrî. Kuumania na ûkûûyî bwa Petûrû îgûrû rîa Yiesû Kîrîstû na kûringana na ûroria bûra bûrî Bibiriani, Petûrû arîenda Akîrîstû bamenya bûra beetîgîîtie i bu ûmma.
Ûntû bwa mathatû, Petûrû eerîîte Akîrîstû beemenyeere kîrî aarimû ba ûrongo n'ûntû ntugûûni cia mûthia ûkeegua kûrî na aarimû ba ûrongo makanicaani. Na aarimû babu bakaarutana antû ûrutani bwa ûrongo (thooma 2:1). Mîkarîre yao îkeegua îrî ya mantû mataagîrîte na îtarî ya kîîngai. Na mûthiani Ngai nakaabakaanûkia ta bûra aakaanûkiirie kîrîndî kîa nthîgûrû îgiita rîa Nuu. Kana ta bûra aakaanûkiirie Sondomu na Ngomoora îgiita rîa Rooti.
Ûntû bwa mana, Petûrû aarîîrîîtie mantû ma gûcooka kwa Mwathani Yiesû Kîrîstû. Petûrû augîîte, ntugûûni cia mûthia antû bara baingî batiîtîgania na gûcooka kwa Yiesû. Îndî Akîrîstû babatîîrue bakaraga beethuuranîrîte beeteereete ntugû îra Mwathani agaacooka. Rîra Mwathani agaacooka Ngai n'akaathiria bûra nthîgûrû îkari îîndî, aûmbe îgûrû na nthîgûrû îngî kûringana na wîrane bwake (thooma 3:3-11).
Gwookubî baarûa îno îkari ûûgû:
Nkeethi (1:1-2)
Mwîto wa Mûkîrîstû (1:3-11)
I mma bûra Mûkîrîstû eetîgîîtie (1:12-21)
Iroria bia ûrongo na îkaanûkia rîra bikeewa (2:1-22)
Gûcooka kwa Mwathani (3:1-18)