Gûcooka kwa Mwathani
3
1 Eendwa, îno n'yo baarûa yakwa ya ciîrî kûbwandîkîra. Na baarûani ino irî ciîrî ndîcûa kwona kana meeciiria meenu maatheru makaaririkana mantû mama. 2 Ndîenda bûririkana mantû mara iroria biitheru bia Ngai biaroriirie tene mûno. Na inkwenda bûririkana maathana ma Mwathani Mwonokia wetû mara bwarutanirwe n'atûmwa bara aatûmire kîrî biû.3 Mûno mûno, ibûbatîîrue bûmenya ntugûûni cia mûthiro gûkeegua kûrî na antû bakaanyûrûntaga ntheto ya Ngai. Bakaarûthaga mantû kûringana na mawîrirîîria maao maathûûku. 4 Na bakaamînyûrûntaga bakauga, “Yiesû akuuga akaaya kaîrî îîndî arîkû? Kuuma wo tene rîra nthîgûrû yaûmbirwe nthuke cia biûyûûyû ciakua mwanka îmunthî tûrî mantû makari wa bûra maakari.” 5 Îndî antû babu ibaûragîria matû bakarega gwîtîgîîria ûmma bungwa atî, tene Ngai i kiugo aatûmîîre auga i kwîgue kûrî na nthîgûrû na îgûrû, na ciegua irî oogo, aategategia rûûyî nthîgûrû yaumîra. 6 Na rûûyî wa rûru i ru eenyangiirie naru nthîgûrû rîra aûyûriirie rûûyî kunthe. 7 Na i kiugo kaîrî Ngai aatûmîîre auga nthîgûrû na îgûrû rîra rîrî oogo îîndî aîgîîte akaabîîthia na mwanki ntugû îra akaagiitîra antû îgamba na athirie bara baaregire kûmwathîkîra.
8 Na, eendwa, bûtikaariganîrueni n'ûntû bûmwe. Kîrî Ngai ntugû îmwe i bûmwe na mîanka ngiri, na mîanka ngiri i bûmwe na ntugû îmwe. 9 Kûringana na bûra antû bamwe bathûgaanagia, boonaga Ngai atirî mpwî cia kwingia wîrane bwake. Îndî i kagiita abwetea n'ûntû gûtirî muntû eendaga aûra. Eendaga antû bonthe beerira meeyia maao.
10 Ntugû ya gûcooka kwa Mwathani îgaakara ta ntugû îra mwamba aayaga. Kagiita gaku îgûrû rîkaathira na gîtuma kîînene mûno, bionthe bira birî ku bithirue na mwanki. Kinya nthîgûrû na bira birî ku bikaabîîthua.
11 N'ûntû ûgu i bu bionthe bikaathirua, thûgaaniani bûmenye bûbatîîrue bwîgua bûrî antû bakari ata. Mîkarîre yenu îbatîîrue îîgua îrî îmîtheru na îrî ya kîîngai, 12 bweteereete ntugû ya kûûya kwa Mwathani. Karagaani bûrî na wendo bwa gweteera ntugû înu, rîra îgûrû rîkaabîîthua rîthirue, kîra gîntû kîbîîthue kîthire kûrû. 13 Îndî itweteereete îgûrû rîngî rîîyerû na nthîgûrû îngî înjerû kûringana na wîrane bwa Ngai, kûra wagîru bûtûûraga.
14 Kwoogu, eendwa, cûûgiani mûno bûkarage bûrî baatheru nkorooni bûtarî na mabîtia na bûrî na ûkiri bweteereete ntugû îra Mwathani akaaya. 15 Thûgaaniani bwone bûra Ngai arî mwinyîkîria. N'ûntû mbere ya ntugû ya kûgiitîrwa îgamba îkinya nakwenda kûnenkera antû kaanya ga kwonoka, wa ta bûra mûruayia wetû, mwendwa, Paûrû, aabwandîkîîre kûringana na ûûme bûra Ngai aamwete. 16 Mantû wamamu nwa mo agweteete baarûani ciake cionthe. Na mamwe ma mara marî baarûani ciake i maûmo kûmenyeka. Bara batarî na ûmenyo, bara batarikîîte wîtîgioni bataûraga mantû mamu bakîbîtagia ta bûra bataûraga kûra kûngî *Maandîkooni Maatheru. Kûrûtha ûgu i kwîbînyangia beereetagîra bongwa.