1 PETÛRÛ
Mantû ma baarûa îno
Baarûa îno yaandîkirwe i mûtûmwa Petûrû. *Kîrîîkanîroni Kîîyerû Petûrû aandîkîîte baarûa ciîrî. Îno n'yo baarûa ya mbere na aandîkîîre yo Akîrîstû bara baatûîre gûntû mwanya mwanya nthîgûrû ya Îcia.
Na gîtûmi kîongwa gîa Petûrû kwandîka baarûa îno, i gwîkîra eetîgîri babu wîru kûnyamaaruani kûra baanyamaaragua n'ûntû bwa wîtîgio bwao. Abeekîrîte wîru na kûbaririkania wîrîgîîro bwao kuumania na gûkua na kûriûka kwa Yiesû Kîrîstû. Petûrû abeerîîte wîrîgîîro bwao ibûbeeteereete îgûrû na gûtirî kîo kîûmba kûbuthûûkia (thooma 1:4). Kwoogu n'ûntû bwa wîtîgio bûbu na ngerekano ya Kîrîstû rîra aûmîîrie aanyamaarua, athingati baake wana bo i babatîîrue baûmîîria bakîendaga rîra bakûnyamaarua. Petûrû aûmîîrîîtie athoomi ba baarûa yake na kûbeera Ngai neengeerie kûbanogokia na kûbeekîra inya nyuma ya kûnyamaarua “bantû a kagiita gaakai” (thooma 5:10).
Na kaîrî Petûrû eekîrîte athoomi ba baarûa yake wîru abeera batûûrage barî na mîkarîre îmîtheru, boonanagie wîtîgio na wîrîgîîro kuumania na mantû mara bakaarûthaga. Na nabeerîîte bûra babatîîrue bakarania barî bo na bûra babatîîrue bakarania na bara batarî Akîrîstû. Mûno mûno, aarîîrîîtie îgûrû rîa bara baarî nkombo (2:18), arûme na eekûrû baao (3:1-7), akûrû ba kanica na aana baîthî (5:1-7).
Gwookubî baarûa îno îkari ûûgû:
Nkeethi (1:1-2)
Kûririkania Akîrîstû wonokio (1:3-12)
Akîrîstû bagîe wîru bwa gûtûûra barî ba mîkarîre îmîtheru (1:13-2:10)
Rîra Mûkîrîstû akûnyamaarua (2:11-4:19)
Gûtûmîkîra Ngai na kwînyiia (5:1-11)
Mantû ma mûthia (5:12-14)