Mataaro kîrî akûrû ba makanica
5
1 Ndî na ûntû nkwenda kwîra akûrû beenu ba kanica. Niû ningwa ndî mûkûrû na ndî mûkûûyî wa kûnyamaarua kûra Kîrîstû aanyamaariirue. Nkeegua ndî ûmwe wa bara bakoonekana na mwago ûra ûkoonanua. 2 Ndîbûkinyîîria bûrîîthagie ng'ondu cia Ngai, nabwîtîgîîtie nacio. Ciraithîreeni na nkoro ya kwenda na t'ûntû na bûra bwagîrîtwe bûciraithîra. Rûthagaani ûgu n'ûntû ibûgûkeneera kûruta ngûgî înu îndî t'ûntû bwa ûtonga. 3 Bûtigaatûmîre ûnene bwenu kwinyîîria bara bwetwe bûmenyeera. Îgaguani bûrî ngerekano îmbega kîrî bo. 4 Na rîra Mûrîîthi ûra mûnene akaaya bûkeewa kîewa, ta kîo nthûmbî ya ûnene îrî mwago îra îtakîthira rî kana rî.Kwînyiia
5 Na biû naabi, aana baîthî, înyithagieni kîrî akûrû. Bwinthe bûbatîîrue wa muntû eenyithagia kîrî ûra ûngî, n'ûntû *Maandîko Maatheru maugîîte,
“Ngai n'athwîre mwîkumia,
ndî ûra eenyiagia namweyaga ûtugi.”
6 Bûrî njaraani irî inya mûno cia Ngai. Kwoogu înyithagieni kaingo akaabûneneithia rîra îgiita rîgaakinya. 7 Mweyageeni mathîîna meenu monthe n'ûntû n'we abûmenyagîîra.
Îîrikieni wîtîgioni
8 Karagaani bwîthuuranîrîte, bwîmenyeereete! Mûnthû wenu Nkoma athiûrûkaga ta cimba îkîruruma îgîcûa muntû wa gûtaguta. 9 Bûtikaareke mûnthû abûkîria inya. Karagaani bwîrikîîtie wîtîgioni bwenu. I bwiyî wana eetîgîri bara bangî nthîgûrû yonthe barînyamaarua wata ûgu bûkûnyamaarua.
10 Îndî nyuma ya kûnyamaarua bantû a kagiita gaakai, Ngai mwene ûtugi bunthe ûra aabwîtire mwagooni wake wa tene na tene gûkûrûkîîra kîrî Kîrîstû Yiesû akabûûyûria, akabwongeera inya, na akabûrûngamia mûcingiini ûmwitu. 11 Inya ya Ngai îroonekanaga tene na tene. Aameni.
Nkeethi cia mûthia
12 Ndîbwandîkîra baarûa îno înkubî ngîteethagîîrua i Sairas. Mmûthûkîîtie i mûruayia mwîtîgua ndeeni ya Kîrîstû. Na gîtûmi gîakwa gîa kûbwandîkîra i mbûûmîîria na mbwîra mantû mama ma ûtugi bwa mma bwa Ngai. Kwoogu Îîrikieni kîrî bu.
13 Antû ba kanica ba naaga Mbabironia bakûbûkeethia. Bathuurîîtwe i Ngai wata biû. Na kinya Maariko akûbûkeethia. Mwonaga ta mwana wakwa. 14 Keethanagiani na wendo bwa eetîgîri.
Bûrookaraga na ûkiri bwinthe biû bûrî ndeeni ya Kîrîstû.