Itonga îmenyeereeni
5
1 Naabi bara bûrî itonga thikîîriani. Rîraani bûminûke n'ûntû bwa kînyamaara kîra kîbweteereete. 2 Ûtonga bwenu i bworu na nguo cienu n'indîe i mûthwa. 3 Thaabu na fetha cienu nigwete nganka. Na nganka inu ikeegua irî ûkûûyî ntugû ya îgamba. Ikaabûrîa nyama ta mwanki ûkûbûbîîthia. Bûtongeete mûno ntugû ino cia mûthia na 4 bûtirîîte antû mbia ciao, bara babûrutagîra ngûgî mîndaani yenu. Thikîîriani kîrîro kîao! Gûkaya kwa babu babûkethagîra mîndaani yenu igûkinyîîrîte Mwathani wa Njûûrî. 5 Ûtûûro bwenu aaga îgûrû rîa nthîgûrû n'ûtûûro bwa gwîkenia bûgîcûa kûganîrwa. Bûnoreete bwa mûûro bweteereete ntugû ya kûthînjwa. 6 Bwagiitire îgamba rîa antû bataarî na mabîtia bûûthûûku bwabaûraga batakûbûrigîîria.Eteeraani bûûmîîrîîtie
7 Aruayia na aarayia, ûmagîîriani bweteere mwanka rîra Mwathani akaaya. Thûkiani ngerekano ya mûrîmi bûra eetagîîra irio biake biciara maketha meega. Eetagîîra bikaurîrwa i mbura ya mbere na ya ciîrî aûmîîrîîtie. 8 Ûmîîriani na biû bweteere bûrikîîtie wîrîgîîro nkorooni cienu n'ûntû ntugû ya kûûya kwa Mwathani îrî akubî.
9 Aruayia na aarayia, muntû atikaanung'une n'ûra ûngî, kaingo Ngai atabûgambithia. Mûgambithania arî akubî kûûya. 10 Aruayia na aarayia, bûkeenda kûthûkia ngerekano îmbega ya bara baûmîîrie mathîîna baûmba gweteera, ririkanaani iroria bira biaragia riîtwaani rîa Mwathani. 11 Atîrî, bara baûmagîîria tuugaga i baathaarime. Ririkanaani bûra Ayubu aûmîîrie na bûra Ngai aamûrûthîîre mûthiani n'ûntû Ngai arî kîao mûno na antû.
12 Îndî nkûrûki ya mantû monthe, aruayia na aarayia, bûtikaathiîtie bûkîeyana wîrane. Bwakara kweyana wîrane bûtikaathiîtie na riîtwa rîa Ngai, kana na into bia nthîgûrû, kana kinya na gîntû kîngî. Ugaga “Yîî” wegua ûrîenda kuuga “Yîî,” kana “Arî” wegua ûtikwenda, kaingo Ngai atakûgambithia.
Îromba rîrî inya
13 Kûrî we wacienu arî thîînaani? Wegua kûrî we narombe Ngai. Kûrî we akeneete? Wegua kûrî we naine nyîmbo cia gûkumia Ngai. 14 Kûrî we mwayie? Wegua kûrî we neete akûrû ba kanica bamûrombere na bamwake magutaa riîtwaani rîa Mwathani na 15 baaromba na wîtîgio mwayie akaabua. Mwathani akamworia amûcookerie mwîrî inya. Na wegua eeyîîtie, Mwathani akamûrekera meeyia maake mara arûthîîte. 16 Kwoogu umbûranagîraani meeyia meenu na rombanagîraani kaingo bworua. Îromba rîa muntû ûmwagîru rîrî inya ya kûrûtha mantû maanene. 17 Kîroria Eriya aarî muntû ta tiû tu na akûromba na inya mûno mbura îtikaure, mbura îtaura mîanka îthatû na nucu. 18 Agûcooka aaromba kaîrî, mbura yaura imera biauma.