Înenkanîreeni Ngai
4
1 I kû ndûa na matheta gatîgatîîni keenu biumaga? Biumanagia na mawîrirîîria meenu maathûûku mara makaraga makîrûaga ndeeni ya mîîrî yenu. 2 Bwîriragîîria mûno kûgîa into îndî bûtibionaga. Rîra bwaga bira bwendaga bwîgua bûrî nabio i rîo bwanjagîîria matheta na bûkarûa kana bûkaûragana. Bwagaga bira bûcûaga n'ûntû bûtirombaga Ngai abwaa bio. 3 Kaîrî wana bwaromba bûtieyagwa n'ûntû bûrombaga bûrî na mworooto ûmûthûûku wa kwenda kûbitûmîra kwingia mantû mara bwîriragîîria.4 Biû bûtirî mwanya na arugûri. Ka bûtaiyî ûgatuîka mûcoore wa mantû ma nthîgûrû ûgûtuma ûnthû na Ngai? Kwoogu ûra eendaga gûtuma ûcoore na mantû ma nthîgûrû eetuîkithagia mûnthû wa Ngai. 5 Bûtikaathûgaanie gûtirî bu *Maandîko Maatheru maugîîte, ara kwandîkîîtwe, “Ngai arî bata na mwoyo ûra aatwere.”a 6 Îndî kîrî mantû mama Ngai natweyaga ûtugi bûra bûrî inya nkûrûki, ta bûra Maandîko Maatheru maugîîte, “Ngai n'athwîre mwîkumia îndî ûra eenyiagia namweyaga ûtugi.”
7 Kwoogu înenkanîreeni kîrî Ngai bûregane na Nkoma bwone abûkuthûke. 8 Îthengangîraani Ngai bwone aayanga akubî naabi. Îîrireeni, eeyia baba. Theriani nkoro cienu, biû antû ba nkoro ciîrî. 9 Gwatwaani i kîîthikîîro, rîraani bûminûke, kûtheka kwenu igûtuîke i kîrîro. Na gîkeno kîenu igîtuîke kîeba. 10 Înyithieni mbere ya Mwathani n'we akabûneneithia.
Ûtigaatuîrîîre muntû ûra ûngî
11 Aruayia na aarayia, tigaani gûtuuyanagîîra n'ûntû muntû ûra atuuyagîîra ûra ûngî kana akamûgiitîra îgamba, eegagua akîbûthia watho na akabuagîra gîtûmi. Na rîra ûkwagîra watho gîtûmi, woû ûtirî ûra ûbuathîkagîra kaîrî n'ûntû ka ûbubûthagia. 12 I Ngai wenka eeyanire watho, na n'we wenka mûgambithania. Nwa we wenka aûmba kwonokia kana kwînyangia. Ûrîthûgaania ûrî ûû rîra ûkûgiitîra muntû ûra ûngî îgamba?
Ûtigeekumîrie mantû ma rûû
13 Thikîîriani mbwîre biû naabi buugaga, “Îmunthî kana rûû tûkauma aaga tûthi taûni nna tûkare noogo mwanka ûthire watûringaga biacaara cietû na tûkîonaga baita.” 14 Bûkiuga ûgu, bûtiiyî bûra gûgaakara rûû! Mwoyo wenu îîndî i mbi? Mwoyo i ta ngooki bûra yonekanaga kagiita gaakai, îgacooka îkaûra. 15 Bûbatîîrue buuga ûûgû, “Mwathani eenda tûgaatûûra na tûrûthe ûûgû na ûûgû.” 16 Îndî naabi bûrî eekumia na bwendaga kwîbûkîîria. Na bûbu n'ûntû bûûthûûku.
17 Kwoogu ûra aiyî ûntû bwega îndî atiburûthaga, i meeyia mamu.