2 Petûrû 2

Aarimû ba ûrongo

1 Îndî ta bûra iroria bimwe bia Isiraeri biarî bia ûrongo, i ta bu bamwe bacienu bakeegua barî aarimû ba ûrongo. Aarimû babu bakaanjîîria kûrutana mantû ma ûrongo mara makeenyangia wîtîgio bwa antû. Na bagaakaana Kîrîstû, Mwathani ûra aakuire n'ûntû bwao, batûme Ngai abathiria na mpwî. 2 Antû baingî bakaathingatîîra mîkarîre yao îrî îgi, batûme antû batua kwaragia mantû maathûûku îgûrû rîa wîtîgio bwa mma. 3 Na n'ûntû bwa wîrirîîria bwao, aarimû babu bakabweneeria na ntheto itarî cia mma. Îndî Ngai nwa akwona bûra bakûrûtha na naabangire kûbatuîra îgamba wo tene. Na kwoogu kwînyangua ikûbeeteereete.

4 Rîra araîka beeyiirie Ngai ataabacaamîra. Aabaingîîre îcamaarîro. Na gûku i ku bakaraga bathaîkîîtwe na nyororo mwinduuni beeteereete ntugû ya kûgiitîrwa îgamba. 5 Îgiita rîa Nuu, Ngai ataabacaamîra bara baatûîre nthîgûrû, bara baarûthaga mantû matarî ma kîîngai. Aûyûriirie rûûyî nthîgûrû abathiria naru. Bara bonka Ngai oonokiirie i Nuu ûra aatûmagîîria wagîru na antû bangî mûgwanja. 6 Na kaîrî Ngai naathiriirie antû ba taûni cia Sondomu na Ngomoora rîra aibîîthiirie ciatuîka muu îrî ngerekano ya bûra akaarûtha bara batarûthaga mantû ma kîîngai. 7 Ngai i Rooti oonokiirie. Aarî muntû ûmwagîru. Rooti naatangîkaga mûno i mîkarîre îtarî mîega ya antû babu baaregeete kwathîka. 8 Muntû ûyu mwagîru aatûûranagia na antû babu. Na naanyamaaraga mûno nkorooni i mantû mara baarûthaga mataagîrîte, mara oonaga na mara eegagua kîra ntugû. 9 Ngerekano inu irîtwonia Mwathani naiyî kûruta mathîînaani bara barî mîkarîre ya kîîngai. Kaîrî irîtwonia akaraga agîkaanûkagia bara barûthaga mantû mataagîrîte mwanka rîra ntugû ya kûgiitîrwa îgamba îgaakinya. 10 Na mûno mûno, Ngai akaanûkagia bara barûthaga mantû kûringana na mûtugo wa kîîmuntû, ta uu wa wîyia, bagaakwa rûko i mawîrirîîria maao. I bo bamenagîîria wathani.

Aarimû babu ba ûrongo n'ekumia, gûtirî kîo kîbamakagia. Batikuthûkaga kwaria mantû mataagîrîte îgûrû rîa bara barî gîtîîyo. 11 Îndî araîka na i bo barî inya nkûrûki batibathitangaga kîrî Mwathani bamwîra mantû maathûûku îgûrû rîao.

12 Antû babu baaragia mantû mataagîrîte îgûrû rîa mantû mara bakûrigwa i mo. Bakari ta nyamû bûra irûthaga mantû itakûthûgaania, magaikuuyia. Îndî antû babu nabo bakaathirua ta nyamû bûra igwatagwa ikaûragwa. 13 Kwoogu ûyu n'uu mûcaara wao n'ûntû bwa kûrûtha mantû maathûûku.

Bakenagîîra kûrûtha mantû mataagîrîte kinya kûrî mûthenya, batakwitha. Bakari ta marooro ma rûko na mathina rîra bakîbweneeria na mantû ma ûrongo beeringanîrîte naabi bûkîrîyanîra nabo biathooni. 14 Waboona mûka rîonthe bathûgaanagia kûruta ngûgî ya ûmaramari n'we. Bata îra barî ya kûrûtha meeyia îtithiraga na ibateeyaga antû bara batarikîîte wîtîgioni. Beerutanire kûrega kûganîrwa. Na n'ûntû bwa mantû mara barûthaga i baarume i Ngai. 15 Batithingatîîte njîra ya mma ibaûrîîte. Bathingatîîte njîra îra ya kîroria kîra kîa ûrongo, kîra gîetagwa Mbaraamu wa Mbeori. Kîroria gîku kîendire kûrûtha wîyia n'ûntû bwa kwenda mbia. 16 Amwe na kwîgua îng'ooi rîtiaragia irîamûkaaniirie na kayû ta ka muntû n'ûntû bwa wîyia bûra aarûthaga rîamwîra atige waa.

17 Aarimû babu ba ûrongo bakari ta inyaka biabwere rûûyî, kana ta bûra matu macûgagua i ruuo mbura îtaure. Ngai abarûthîrîîte gîkaro kîao kûra kûrumeene mwindu ûmûnene mûno. 18 Beekumagia na kwaria mantû ma ûtheri. Bathiyaga kîrî bara beetîgîîtie Ngai rua rua, bara baumîîte kîrî bara baûrîîte bakabeeneeria na njîra ya kûbakuuyia barûtha mantû ma meeyia mara mîîrî îîriragîîria. 19 Babeenagîîria bakabeera muntû nwa arûthe bûra akwenda. Na aarimû babu barî bo i nkombo cia mantû ma kûbeenyangia. Muntû akaremwa gûtiga ûntû bûna atuîkaga nkombo ya ûntû bûbu. 20 Na muntû aatigana na mantû maathûûku mara marî nthîgûrû na njîra ya kûmenya Mwathani Mwonokia wetû Yiesû Kîrîstû, îndî akagarûka agacookera mantû mara araarî agûtiga makamûthaîka kaîrî, makamûkîria inya, muntû ûyu nathûûkaga nkûrûki ya bûra aakari mbereeni. 21 I kaaba muntû ta ûyu atakîmenya mantû ma wagîru, kîrî kûmamenya îndî acooka arekana na maathana maatheru mara ararutanîîtwe. 22 Muntû akarîîte ûgu, ûntû bûbu ibûkûgwatanîra na njuno îra yuugaga, “Kurû îcookaga kûrîa mataîka maayo,” kana ta bûra kwîragwa, “Ûkathambia ngûrwe îcookaga kûgaragara ntondooni kaîrî.”