Yiesû na Sakaayo
19
1 Yiesû naakûrûkîîrîîte Njeriko. 2 I kwarî na muntû aarî oogo eetagwa Sakaayo. Aarî mûnene wa arûngithia ûgooti na aarî gîtonga. 3 Sakaayo neendaga kwona Yiesû, îndî gûtaûmbîkanaga n'ûntû aarî muntû ûmûkubî mûno. Agûcûûgia gûtûrithîîria meetho kîrîndîîni gîa antû ataamwona. 4 Akûrega kûmwona, augia rwîro arî mbere ya kîrîndî aatwa mûkûyûûni kaingo amwona n'ûntû Yiesû aakûrûkîîrîîte njîraani înu.5 Yiesû agûkinya agu mûtîîni ûyu, aacûûba îgûrû amwîra, “Sakaayo gûrûka na mpwî. Îmunthî nwa mwanka ntuîke mûgeni waku.” 6 Nthûti weenu Sakaayo aagûrûka. Baathi mûciî wake barî na Yiesû amûgwata ûgeni akeneete mûno.
7 Antû baingî bakwona ûgu, baanjîîria kûnung'una bakiugaga, “Ka atuîkire mûgeni mûciî wa mwîyia?”
8 Sakaayo aarûngama eera Mwathani, “Mwathani, raitha wone nkîgaîra nkîa nucu ya ûtonga bwakwa. Na wegua kûrî muntû ntunyîîte gîntû gîake na njîra îtabatîîrue, nkamûrîa kîo maita mana.”
9 Yiesû amwîra, “Îmunthî antû ba mûciî ûyû bûkwonokua, n'ûntû i gûkwonekana wabu i mwana wa rûrîîyo rwa Îburaîmu atwîre nyomba îno. 10 Mwana wa Muntû aayire gûcûa antû bara baûrîîte aboonokia.”
Ngerekano ya aruti ngûgî îkûmi
11 Antû bathikîîrîîtie mantû mamu, Yiesû aathi na mbere kûbaarîria agîtûmagîra ngerekano. Na n'ûntû aarî akubî gûkinya Njerusaremu, antû baathûgaanagia ûnene bwa Ngai bûrî akubî mûno. Yiesû abaa ngerekano akîbaruta mathûgaaniani mamu baarî namo. 12 Abeera, “I kwarî na muntû ûmwe aarî îgweta aathiîte nthîgûrû îngî yarî kûraaya na kwao atuîkithua mûnene aacooka. 13 Mbere ya athi, eeta aruti ngûgî baake îkûmi. Bonthe abaa mbia iganeene. Abeera, ‘Wa muntû nakabaitanie mbia inu ndabwaa, mwanka rîra ngacooka.’ Rîru aathi.
14 “Antû ba nthîgûrû yao bataamwendaga. Baatûma antû bamûthingatia ntûmwa îkuuga batikwenda atuîka mûnene wao.
15 “Muntû ûyu agûtuîkithua mûnene aacooka kwao kaîrî. Aaruta watho auga eetîrwe aruti ngûgî bara aatigîîte aagaîra mbia, amenye baita îra boonire nacio. 16 Mûruti ngûgî wa mbere aaya amwîra, ‘Ndabaitaniirie mbia ira wannenkeere maita îkûmi.’
17 “Mûnene wake amwîra, ‘I bwega mûno, ûrî mûruti ngûgî ûmwega. Na n'ûntû ûgûtuîka mwîtîgua na biikai, ngûgûtuîkithia mûnene ûkaathaga taûni îkûmi, kîrî kîewa.’
18 “Mûruti ngûgî wa baîrî aaya. Amwîra, ‘Mûnene, mbaitanîîtie mbia ira wannenkeere maita mataano.’
19 “Mûnene amwîra, ‘Ngûgûtuîkithia mûnene, ûkaathaga taûni itaano.’
20 “Wa bathatû we akûûya, amwîra, ‘Mûnene, mbia ciaku ira wannenkeere n'ino. Ndaciaigire bwega, n'ino igana wa bûra wannenkeere igana. 21 Indagûkuthûkire n'ûntû woû ûrî muntû atarî kîao. Ûthûkagia bira bitarî biaku na ûkethaga bira ûtaanda.’
22 “Mûnene amwîra, ‘Woû ûrî mûruti ngûgî ûmûthûûku! Ngakûgiitîra îgamba kûringana na mîgambo yaku îra waria wengwa. Wegua waiyî ntirî kîao, nthûkagia bira bitarî biakwa, na nkethaga ara ntaanda, 23 i mbi îîndî n'ûntû ûtaambaigîra cio mbanki, kaingo ndaaya nthûkia irî na baita?’ 24 Mûnene eera antû bara baarî agu bamûtuunye mbia inu aarî nacio banenkere ûra ooneete baita maita îkûmi.
25 “Antû babu bamwîra, ‘Mûnene, akaanenkerwa mbia na ingî arî nacio maita îkûmi!’
26 “Mûnene abacookeria abeera, ‘Ga nkûbwîra, ûra arî na gîntû nkamwongeera. Îndî ûra gûtarî kîo arî nakîo, wana gîîkai kîra arî nakîo nagaatunywa. 27 Anthû baakwa nabo bara batireendaga ntuîka mûnene wao bareeteeni aaga bûbaûrage nkîonaga!’ ”
Yiesû aakinya Njerusaremu akeneereetwe mûno
28 Yiesû akûthiria kwaria mantû mamu, aathi na mbere na rûgendo, athiîte Njerusaremu. 29 Arî akubî gûkinya gataûni geetagwa Bethifage na kangî geetagwa Bethania, Karîmaani ka Mîceituuni, aatûma arutwa baake baîrî baathiyaga barî mbere. 30 Abeera, “Îthiini gataûni gaka karî mbere aaga, na bwakinya oogo bûkoona kayaû ka îng'ooi kathaîkîîtwe gataakamata muntû. Bûthaûre ko bûreete. 31 Na ûra akaabûûria i kî n'ûntû bûgûkathaûra, bûmwîre, ‘I Mwathani arî bata nako.’ ”
32 Arutwa babu baathi beethîra mantû makari wa ta bûra Yiesû aabeerîîte. 33 Bakîthaûra kang'ooi gaku, eene ko babaûria, “I kî n'ûntû bûkûthaûra kayaû gaku?”
34 Arutwa babacookeria babeera, “I Mwathani agûkeenda.”
35 Baareetera Yiesû ko. Bamwarîra tûbuuti twao mûgongo wako, Yiesû aakarîra. 36 Athiîte agatwete, antû bamwarîra tûbuuti twao barabaraani.
37 Agûkinya akubî na Njerusaremu, mûtûndûrûkooni wa barabara îra yayîrîîte Karîmaani ka Mîceituuni, arutwa baake bonthe baakena, baakaatha Ngai na tûyû twa îgûrû n'ûntû bwa biama bia inya bionthe bira boonire akîrûtha. 38 Baugaga,
“N'ûmûthaarime mûnene ûra aayîîte
kwa riîtwa rîa Mwathani!
Ûkiri i bwîgue bûrî îgûrû na ûkumio kîrî Ngai!”
39 *Afarisai bamwe baarî kîrîndîîni gîku gîa antû beera Yiesû, “Mwarimû, kaania arutwa baaku ûbeere bakire!”
40 Yiesû abacookeria abeera, “Ga nkûbwîra, wana baba bagakira, maiga mama magaatûmîîria.”
Yiesû aarîrîra antû ba Njerusaremu
41 Yiesû arî akubî gûkinya Njerusaremu aagera meetho mbere oona taûni înu, amîîgua kîao. Aanjîîria kûrîra 42 akiugaga, “Ûtakîîgua ikûûmbîka ntugû ya îmunthî ûkamenya mantû mara magaakûreetera ûkiri! Îndî narîo ûtimenya n'ûntû ûrî ûmwithe mo. 43 Îgiita rîgaakinya anthû baaku bagûkîmbe nteere cionthe wage a kuumîîra. 44 Bagaakwomoranga na bacooke baûrage antû bara batwîre ndeeni. Na gûtirî iiga rîgaatigwa rîtûûganîîrîîte na rîra rîngî, n'ûntû ûtiiyî kana gaka i ko kaanya kara Ngai aakwete ga kwonoka!”
Yiesû eengatia antû Nyomba ya Ngai
45 Yiesû aathi Nyomba ya Ngai eengatia antû ku bonthe bara baagûranagîra na beendanagîria 46 akîbeeraga, “Kwandîkîîtwe *Maandîkooni Maatheru, ‘Nyomba yakwa îgeetagwa nyomba ya kûndombera,’ îndî biû bûmîtuîkithîîtie ‘îkurungu rîa kwîbithaga aamba’!”