Yiesû aûrua ara arutîîte watho
20
1 Ntugû îmwe Yiesû naarutanaga antû akîbatûmagîîria ntheto îmbega Nyomba ya Ngai. *Athînjîri bara banene ba Ngai, aarimû ba watho, amwe na akûrû bangî baaya kîrî we. Bamwîra, 2 “Tatwîre ara ûrutîîte watho bwa kûrûtha mantû mama ûkûrûtha. N'ûû akwete bu?”3 Yiesû abacookeria abeera, “Wana niû ka mbûûrieni.” 4 Abaûria, “I kû Njoana aarutîîte watho bwa kûbaatithania? I kuuma kîrî Ngai kana i kuuma kîrî muntû?”
5 Baanjîîria kwîrana, “Twamwîra, ‘I kuuma kîrî Ngai,’ agaatûûria, ‘I kî aabu n'ûntû bûtaamwîtîgia?’ 6 Twamwîra, ‘I kuuma kîrî muntû,’ arî, tiga! Kîrîndî gîgatûûraga na maiga n'ûntû antû bonthe i beetîgîîtie Njoana aarî kîroria.” 7 Kwoogu beera Yiesû, “Tûtiiyî.”
8 Yiesû abeera, “Wana niû ntibwîra ara ndutîîte watho bwa kûrûtha mantû mama nkûrûtha.”
Ngerekano ya akombori mûnda baathûûku
9 Yiesû eera antû ngerekano îno. Auga, “Kagiita kamwe i kwarî na muntû aarîmîîte mûnda wake aanda ncabiibû. Rîru aakomborithania mûnda ûyu aathi rûgendo aakara îgiita rîîraaya.
10 “Îgiita rîa maketha rîgûkinya, muntû ûyu aatûma mûruti ngûgî wake kîrî antû babu aakomborithîîtie mûnda. Eera mûruti ngûgî ûyu wake athi amûgîîrîre bira biarî biake makethaani mamu kûringana na bûra baagwatanîrîte na antû babu. Mûruti ngûgî ûyu agûkinya, antû bara baakomboreete mûnda ûyu bamûgwata bamûtura. Bamwîngatia aacooka atarî na gîntû. 11 Mwene mûnda aatûma ûngî kaîrî. Wana we agûkinya, antû babu bamûtura, bamûrûtha mantû maathûûku, bamwîngatia aacooka atarî na gîntû. 12 Mwene mûnda aacooka aatûma mûruti ngûgî ûngî, wa bathatû. Îndî wana we bamûtonyanga, bamwîngatia mûndaani.
13 “Mwene mûnda eebûûria, ‘N'ata nkûrûtha?’ Auga, ‘Ga ntûme mwana wakwa wengwa ûra mbendeete mûno, baûmba kûmûtîîya!’
14 “Antû babu bakwona mwana wa mwene mûnda beerana, ‘Ûyû n'we mwene rûgai. Tûmûûrageeni kaingo rûgai rûtuîka rwetû!’ 15 Bamûgwata baathi bamûûragîra ome ya mûnda.”
Yiesû abaûria, “Bûrîthûgaania mwene mûnda akaarûtha ata?” 16 Yiesû abeera, “Akaathi athirie antû babu, akomborithie antû bangî mûnda wake.”
Antû bakwîgua ûgu, bauga, “Irû! Ngai teethia ûntû bûbû bûtigaatuîkîke!”
17 Yiesû abaraitha, abaûria, “Anga bûtaathooma bûra kwandîkîîtwe *Maandîkooni Maatheru?
‘Iiga rîra rîongwa aaki baaregire,
îîndî i rîo rîtuîkîîte rîa koona.’
18 “Muntû wonthe ûra akaagwîra iiga rîrî nakaunîkanga tûcuncî tûcuncî. Na ûra rîkaagwîra rîrî rîo irîkaamûthithira.”
19 Aarimû ba watho na *athînjîri bara banene ba Ngai bakwîgua ngerekano înu, baamenya i bo Yiesû aatemagia. Baanjîîria gûcûa bûra bakîmûgwata warîo, îndî baakuthûka kîrîndî.
Kîûria mantûûni ma kûrûnga ûgooti
20 Kwoogu atongoria baanjîîria gûcûa kaanya ga kûgwatithia Yiesû. Baatûma athigaani kûûria Yiesû biûria bia kûmûtega nabio beetuîkithîîtie n'antû baagîru. Beendaga kwîgua bûra agaacookia biûria kaingo boona bwa kûmûthiitaanga nabu kîrî ngabana wa Rooma, amûgwata. 21 Athigaani babu beera Yiesû, “Mwarimû, itwiyî waragia bûra kûbatîîrue na ûrutanaga bûra kûbatîîrue. Ûtiendagîîra bamwe ûmena bara bangî, na ûrutanaga bûra bungwa mantû ma Ngai makari. 22 Twîre wegua itûbatîîrue tûrûngaga ûgooti kîrî Kaisaarî kana tûtibatîîrue?”
23 Yiesû aamenya ûûme bwao. Abeera, 24 “Tamboniani ciringi înu.” Abaûria, “Ûthiû bûbû i bwa ûû? Na riîtwa rîrî i rîa ûû?”
Bamûcookeria bamwîra, “Bionthe i bia Kaisaarî.”
25 Yiesû abeera, “Kwoogu nenkagîraani Kaisaarî into biake. Na Ngai n'we mûnenkagîreeni bira birî biake.” 26 Bataûmba kûmûtega na rwaria rwake rûru aariirie antû bakîîgagua. Baarigara mûno n'îcookio rîake, baakira ki.
Kîûria mantûûni ma kûriûka
27 *Asandukai bamwe baathi kîrî Yiesû. Na wîtîgio bwa Asandukai n'atî, gûtiûmbîka muntû ûmûkuû ariûka. Bakûthi beera Yiesû, 28 “Mwarimû, Musa aatwandîkîîre watho atwîra, ‘Muntû akagûra mûka, îndî agakua mbere ya bagîa na kaana, mûruagina nabatîîrue athûkia mûka ûyu aciarîra mûruagina mbeû.’ 29 Kwa ngerekano, kagiita kamwe i kwarî na nthaka mûgwanja cia muntû ûmwe. Ûra mûkûrû akûgûrana, aakua atatigîîte mbeû. 30 Mûruagina ûra aamûkinyîîte mûgongo aathûkia mûka ûyu. Îndî wana we aakua atarî mbeû. 31 Wa bathatû akûthûkia mûka ûyu, wana we aakua atakûrî gûtiga mbeû. Bonthe barî mûgwanja baathûkagia mûka ûyu wabagîkuyaga batagûtiga mbeû 32 mwanka mûka ûyu n'we aakua mûthiani.” 33 Asandukai babu baûria Yiesû, “Îîndî rî, rîra antû bakaariûkua mûka ûyu agaatuîka wa ûû n'ûntû ingî nthaka inu cionthe irî mûgwanja i ciamûgûrîîte?”
34 Yiesû abacookeria abeera, “Antû ba nthîgûrû îno ibagûranaga, 35 îndî rîra antû bakaariûkua batiigûrana kana bagûrwa. 36 Ûkeegua bakari ta araîka ba îgûrû na batiûmba gûkua kaîrî n'ûntû bo ûkeegua barî aana ba Ngai bariûkîîtue bauma gîkuûni. 37 Mantû ma kûriûkua gwa antû bakuû namo, wana Musa naandîkîîte bwega bantû ara agweteete mantû ma gakando kara gaakanaga mwanki. Bantû agu kwandîkîîtwe atî Ngai augire, ‘Niû ndî Ngai wa Îburaîmu, Isaka na Njakubu.’ 38 Kwoogu we ti Ngai wa bara bakuû. I Ngai wa bara barî mwoyo, n'ûntû kîrî we bonthe babu barî mwoyo.”
39 Aarimû bamwe ba watho bamwîra, “Mwarimû, ûkuuga bwega!” 40 Na kuuma rîru gûtirî we waciao aaûmîîria kûmûûria kîûria kîngî.
Kîrîstû i mwana wa ûû?
41 Yiesû abaûria, “N'ata antû baûmba kuuga Kîrîstû i mwana wa Ndaundi? 42 Îbukuuni rîa Sabuuri, Ndaundi we wengwa augîîte,
‘Mwathani Ngai neerire Mwathani wakwa,
“Kara nthîgûrû rûteere rwakwa rwa ûrîo,
43 mwanka ntuîkithie anthû baaku
ûkinyo bwa magûrû maaku.” ’
44 “Ûkaaya kwîgua Ndaundi we wengwa arîmwîta ‘Mwathani’, n'ata îîndî Kîrîstû aûmba gûtuîka mwana wake?”
Yiesû eera antû beemenyeere kîrî aarimû ba watho
45 Antû bonthe bathikîîrîîtie, Yiesû eera arutwa baake, 46 “Îmenyeereeni kîrî aarimû ba watho. Beendaga kûthi beekîrîte nguo indaaya na gûkeethagua n'antû na gîtîîyo baarîîkana nabo. Beendaga gûkara itîîni bia mbere bia gîtîîyo rîra barî *masinagoogiini. Na baathi biathooni beendaga gûkara ara arî gîtîîyo. 47 Beenagîîria ntigwa bakairîîra into. Na rîra bakûromba, beendaga kûromba maromba maaraaya bakîenda antû boona. Îgamba rîao ûkeegua rîrî rîthûûku nkûrûki!”