Ngerekano ya kîatho kîa wiki
22
1 Yiesû aatûmîra ngerekano kaîrî. Abeera, 2 “Nwa tûbuanaanie ûnene bwa îgûrû na mûnene ûra aathuuranîîre kîatho kîa wiki bwa mûthaka wake. 3 Rîru aatûma aruti ngûgî baake bathi gwîta bara eetîîte. Îndî bara eetîîte baataaya. 4 Aatûma aruti ngûgî bangî kaîrî. Abeera bathi beete bonthe bara eetîîte kîathooni. Abeera babeere kîatho ikîbeeteereete, abathînjîrîte ndegwa na njaû ciake ira noru na kîra gîntû kîonthe kîrî oogo, kwoogu i bathi. 5 Îndî baarega woora muntû aathi bwake. Ûmwe aathi bwa mûnda wake, ûra ûngî aathi biacaaraani ciake, 6 na bamwe baao baagwata atûmwa babu babanyamaaria babaûraga. 7 Mûnene akwîgua ûgu aathûûra mûno, aatûma njûûrî ya acikaarî yathi yathiria aûragani babu na baabîîthia taûni înu.8 “Rîru eera aruti ngûgî baake, ‘Kîatho i kîîthuuranîre, îndî bara ndareetîîte tibo ndaraagîrîtwe gwîta. 9 Îthiini makomanooni ma njîra bwîre muntû wonthe ûra bûkoona aaye.’ 10 Aruti ngûgî babu baathi makomanooni ma njîra beethîrania antû bonthe bara baakûrûkaga; beega na baathûûku, mwanka baûyûra gûku kîatho kîarî.
11 “Mûnene akûûya kwona ageni, oona muntû ûmwe ataarî na nguo yaagîrîte ya kûûya wikiini. 12 Amûûria, ‘Bai ûyû, n'ata woû ûûyire aaga ûtarî na nguo cia kûûya wikiini?’ Muntû ûyu aaga bwa kuuga. 13 Mûnene eera aruti ngûgî baake, ‘Mûthaîkeeni njara na magûrû bûmûgere nja mwinduuni.’ Gûku ûkeegua kûrî na kîrîro na kîeba kîînene mûno.a
14 “I baingî beete, îndî i baakai bakaathuurwa.”
Kîûria mantûûni ma kûrûnga ûgooti
15 *Afarisai baathi baabanga bûra bakaageria gûtega Yiesû na rwaria rwake. 16 Baatûma arutwa baao na athingati ba Eronde baathi beera Yiesû, “Mwarimû, itwiyî ûrî mwîtîgua na ûrutanaga ûmma bwa Ngai. Ûtitindanagîra na mathûgaania ma antû n'ûntû ûtiendagîîra bamwe ûmena bara bangî. 17 Tatwîre bûra ûkwona – itwagîrîtwe tûrûngaga ûgooti kîrî Kaisaarî kana tûtiagîrîtwe?”
18 Yiesû aamenya baamûûragia ûgu barî na mûbango ûmûthûûku. Abaûria, “Eebwithia baba, i kî n'ûntû bûkûngeria? 19 Tamboniani ciringi îra îrîaga ûgooti.” Bamûnenkera. 20 Yiesû abaûria, “Ûthiû bûbû i bwa ûû? Na riîtwa rîrî i rîa ûû?”
21 Bamûcookeria bamwîra, “Bionthe i bia Kaisaarî.”
Yiesû Abeera, “Kwoogu nenkagîraani Kaisaarî into biake, na Ngai mûnenkagîreeni bira birî biake.” 22 Bakwîgua Yiesû auga ûgu bamûrigarîra mûno, bamûtiga baathi.
Kîûria mantûûni ma kûriûka
23 Ntugû weenu *Asandukai bamwe baathi kîrî Yiesû. Na wîtîgio bwa Asandukai n'atî, gûtiûmbîka muntû ûmûkuû ariûka. Bakûthi beera Yiesû, 24 “Mwarimû, Musa aatwandîkîîre watho atwîra, ‘Muntû akagûra mûka îndî agakua mbere ya bagîa na kaana, mûruagina nabatîîrue athûkia mûka ûyu acererîa mûruagina mbeû.’ 25 Kwa ngerekano, kagiita kamwe i kwarî na nthaka mûgwanja cia muntû ûmwe. Ûra mûkûrû akûgûrana aakua atatigîîte mbeû. Mûka ûyu aagûrîîte aatigwa na mûruagina ûra aamûkinyîîte mûgongo, 26 îndî wana mûruagina ûyu aakua atatigîîte mbeû. Bonthe barî mûgwanja baathûkia mûka ûyu wabagîkuyaga batagûtiga mbeû, 27 mwanka mûka ûyu n'we aaya gûkua mûthiani.” 28 Asandukai babu baûria Yiesû, “Îîndî rî, rîra antû bakaariûkua mûka ûyu agaatuîka wa ûû kîrî nthaka inu irî mûgwanja n'ûntû ingî cionthe i ciamûgûrîîte?”
29 Yiesû abacookeria abeera, “Biû bûbîtîîtie mûno n'ûntû bûtiiyî *Maandîko Maatheru na bûtiiyî Ngai arî inya. 30 Rîra antû bakaariûka batiigûrana kana bagûrwa. Bagaakara ta araîka ba îgûrû. 31 Mantûûni ma kûriûkua namo rî, ka bûtathoomeete Maandîkooni Maatheru bûra Ngai abwîrîîte. 32 Augîîte, ‘Niû ndî Ngai wa Îburaîmu, Isaka na Njakubu.’ Kwoogu we ti Ngai wa bara bakuû. I Ngai wa bara barî mwoyo.”
33 Kîrîndî gîkwîgua ûgu kîarigara mûno i mûrutanîre wa Yiesû.
I yathana rîrîkû rîrî gîtûmi nkûrûki ya maathana mara mangî?
34 *Afarisai beethîrana amwe bakwona Yiesû aacookeria *Asandukai biûria mwanka baakangaa. 35 Mûgambi ûmwe wao amûûria kîûria akîmûtega. 36 Amûûria, “Mwarimû, i yathana rîrîkû rîrî gîtûmi nkûrûki ya maathana mara mangî?”
37 Yiesû amwîra, “ ‘Enda Mwathani Ngai waku na nkoro yaku yonthe, na mwoyo waku unthe na mathûgaania maaku monthe.’ 38 Rîru i rîo yathana rîra rînene na rîra rîrî gîtûmi nkûrûki ya maathana mara mangî monthe. 39 Na yathana rîa maîrî wanarîo rîkari ta rîru. ‘Enda mûtûûri waku ta bûra wîbendeete.’ 40 *Watho bunthe na mantû mara iroria biaroriirie makamatîîtwe i maathana mama marî maîrî.”
Kîrîstû i mwana wa ûû?
41 *Afarisai beethîreene amwe woogu Yiesû abaûria, 42 “Bûthûgaanagia Kîrîstû n'ûû? Na i mwana wa ûû?”
Bamûcookeria bamwîra, “We i Mwana wa Ndaundi.”
43 Yiesû aacooka abaûria, “Na n'ata îîndî Ndaundi akîaragia kwa inya ya Kîrundu aamwîtaga ‘Mwathani’? N'ûntû ariuga,
44 ‘Mwathani Ngai neerire Mwathani wakwa,
Kara nthî rûteere rwakwa rwa ûrîo,
mwanka ntuîkithie anthû baaku
ûkinyo bwa magûrû maaku.’