Yiesû ooria muntû aimbîîte mwîrî
14
1 Ntugû îmwe ya *Sabatû, Yiesû aathûngîra kûrîa irio nyomba ya mûtongoria ûmwe, *Mûfarisai. Antû bara baarî oogo baarîthania n'we bakîenda kwona bûra akaarûtha. 2 I kwarî na muntû ûmwe oogo aayîîtue mûrimo wa kwimba njara na magûrû. 3 Yiesû aûria aarimû ba watho na Afarisai, “*Watho i bwîtîgîîrîîtie kworania ntugû ya Sabatû kana bûtiîtîgîîrîîtie?” 4 Gûtirî we aaria. Yiesû ooria muntû ûyu, amûrekeeria aathi.5 Yiesû aûria, “N'ûû wa cienu eegua arî na îng'ooi rîake kana ng'ombe yake îgwîte mûthûrûriini ntugû ya Sabatû, îndî atamîrute na mpwî?” 6 Gûtirî we aûmba kûmûcookeria nwa ata.
Kwînyiia na kûgwatana ûgeni
7 Yiesû akwona bûra bara beetîîtwe kîathooni beendaga gûkara mbere itîîni bia gîtîîyo, aatûmîra ngerekano abeera, 8 “Ûgeetwa i muntû kîathooni ta kîa wiki, ûtikeende gûkara mbere. Mûgeni ûngî arî na gîtîîyo nkûrûki yaku aûmba kûûya. 9 Na aaya, ûra abwîtîîte akaaya akwîre, ‘Ta nenkera muntû ûyû kaanya akare aaga.’ N'îgi mûno ûthiîte gûcûa gîtî kîa nyuma ûkarîra. 10 Ûkaaya gwîtwa kîathooni, îthi ûkare nyuma kaingo ûra agwîtîîte aaya akwîthîra ûkari nyuma akûthûkia akwira mbere, na ûgaatîîywa n'antû bonthe bara ûkeegua bûkîrîyanîra nabo. 11 Ûra akeeneneithia akaanyithua. Na ûra akeenyithia akaaneneithua.”
12 Yiesû aacûûba mwene kîatho amwîra, “Waruga irio bia mûthenya kana bia ûgoro, ûtigeete acoore, aruanyûkwe, na antû beenu, kana itonga bia ntûûra yenu, n'ûntû wana bo bagaacooka bagwîte bakûrîe. 13 Rîra ûrî na kîatho îtaga nkîa, bionje, ithua, na ntûngi, 14 na ûkaathaarimwa n'ûntû bo batirî na gîntû gîa gûkûrea nakîo. Ngai agakûrîa îgiita rîakinya rîa kûriûkua kwa bara baagîru.”
Ngerekano ya kîatho kîînene
15 Muntû ûmwe kîrî babu Yiesû aarîyanagîra nabo akwîgua ûgu amwîra, “Kîthaarimo i kîrî muntû ûra akaarîa mûgaate ûneneeni bwa Ngai!”
16 Yiesû amwîra, “Muntû ûmwe naarugire kîatho kîînene mûno eeta antû baingî. 17 Îgiita rîgûkinya, aatûma mûruti ngûgî wake aathi kwîra bara beetîîtwe îgiita rîgûkinya i baaye kîathooni.
18 “Îndî wa muntû aarî ûmwîte aanjîîria kweyana gîtûmi gîake gîa kûrega kûthi. Wa mbere auga, ‘Kûrî mûnda ndaragûrire na mbatîîrue nthi gûcuona bûra ûkari. Itû ndekera.’
19 “Wa baîrî auga, ‘Kûrî ncamba ciakwa îkûmi cia mûraaû ndaragûrire, na mbatîîrue nthi kûgeria mbona bûra i kûruta ngûgî. Itû ndekera.’
20 “Wa bathatû auga, ‘Ndî na mwiki. Kwoogu ntiûmba kûûya.’
21 “Mûruti ngûgî ûyu aatûmîîtwe aacooka eera mûnene wake bûra antû babu baugire. Mûnene akwîgua ûgu baugire aathûûra mûno. Eera mûruti ngûgî ûyu wake, ‘Ta umagarûka na mpwî ûthi barabaraani cia taûni, iinene na i niini wîte nkîa, bionje, ntûngi na ithua.’
22 “Mûruti ngûgî ûyu aarûtha ûgu eerîîtwe. Aacooka eera mûnene, ‘Nkûrûtha bûra ûkûmbîîrîîte, îndî wana îîndî nyomba îrî na kaanya kaûmba gûkara antû bangî.’
23 “Mûnene eera mûruti ngûgî, ‘Umagarûka kaîrî ûthi na barabara na njîra ira igendeete mîankaani ûkinyîîrie wa muntû wonthe ûra ûkoona aaye, kaingo nyomba yûûyûra. 24 Ga nkûbwîra, gûtirî muntû kîrî bara ndareetîîte akaarûma nwa mbi ya kîatho gîakwa.’ ”
Kwîruta n'ûntû bwa Kîrîstû
25 Îgiita rîmwe kîrîndî gîa antû ikîathiyanîîtie na Yiesû. Yiesû abacûûba abeera, 26 “Gûtirî muntû atuîka mûrutwa wakwa, nwanga akambenda nkûrûki ya bûra eendeete îthe na gina, mwekûrû wake na twana twake, kana aruagina na aaragina, kana bûra eendeete mwoyo wake. 27 Muntû atakamata mûtharaba wake aanthingata atiûmba gûtuîka mûrutwa wakwa.
28 “Muntû akeenda gwaka nyomba îndaaya, mbere nwa mwanka atare mbia ira ikwendekana kûmîûyûria oone kana arî nacio 29 atikaaye kwînjîra mûcingi îrema kûûyûra, antû bamîona bamûthekeera bauga, 30 ‘Eneeni ûyû kaayia aranjîîrîîtie gwaka nyomba aaremwa kûmîûyûria!’
31 “Î kana rî, anga kûrî mûnene eetîgîra kûrûa na mûnene ûngî mbere ya aamba gûkara nthî athûgaania bwega oona kana kwaûmbîka akarûa na mûnene ûyu akwenda barûa we arî na acikaarî ngiri mîrongo îîrî, n'we arî na acikaarî ngiri îkûmi? 32 Akoona atiûmba ndûa înu, n'antû atûma bakathi kûromba mûnene ûyu ûkiri arî kûraaya, mbere ya bakinyanîîra. 33 Kwoogu gûtirî we wa cienu aûmba gûtuîka mûrutwa wakwa, nwanga agatiganîria bionthe bira arî nabio.”
Mwonyo ûthirîîte mûcamo