Yiesû aagweta mantû ma kwomboranua kwa Nyomba ya Ngai
24
1 Yiesû akuumagarûka Nyomba ya Ngai athiîte, arutwa baake baathi kîrî we bamwonia bûra mwako wa Nyomba ya Ngai wathongamîîte bûgana. 2 Yiesû abeera, “I bûkwona mwako ûyû unthe? Na mma ga nkûbwîra, gûtirî iiga rîgaatigwa rîrî îgûrû ya rîra rîngî, monthe i makaanyagaarua.”Mathîîna mara mayîîte
3 Yiesû akari nthî Karîmaani ka Mîceituuni, arutwa baake baathi kîrî we barî bonka. Bamwîra, “Tatwîre irî mantû mama magaatuîkîka. Na i mbi îkoonania rîra ûkeegua ûûyîîte, rîra mûthiro wa nthîgûrû ûgaakinya?”
4 Yiesû abeera, “Îmenyagîîreeni bûtikeeneerue i muntû, 5 n'ûntû antû baingî mûno bakaaya bagîtûmagîra riîtwa rîakwa bakauga i bo Kîrîstû na bagaata antû baingî. 6 Bweegua ndûa ikîrwîwa kana ikîgwetwa bûtikaamake. Mantû ta mamu nwa mwanka matuîkîke, îndî ûyu t'uu mûthiro. 7 Nthîgûrû îkaarûa na îra îngî, ûnene bûrûe na bûra bûngî, mayûûra makaaya na nthîgûrû îkainaina gûntû na gûntû. 8 Mantû mamu monthe i ta rûgakaî rwa mbere rwa mwekûrû arî akubî kûgîa na mwana.
9 “Rîru bûkaanenkanîrwa bûnyamaarue na bûûragwe. Na antû bonthe bakabûmena n'ûntû bwa riîtwa rîakwa. 10 Kagiita gaku baingî bagaataratara wîtîgioni. Antû bagaakunyanagîra bara bangî na bagaatumana moothû. 11 Gûkaumîra iroria bia ûrongo biingî bieneerie antû baingî baûre. 12 Ûthûûku bûkaingîa na wendo bwa antû baingî bûnyiie. 13 Îndî ûra akaûmîîria mwanka mûthia akoonokua. 14 Ntheto îmbega ya ûnene bwa îgûrû îgaatûmîîrua nthîgûrû yonthe îrî ûkûûyî kîrî mîgongo yonthe, rîru mûthia ungwa ûkinye.”
Kînyamaara kîînene
15-16 Yiesû auga, “Rîra bûkoona kîra kîthûûku mûno, kîra Ngai athwîre kîrûngi ara atheru (mûthoomi ta nataûre), bara ûkeegua barî Njundea i bakuthûke bathi bwa irîma. Gîku i kîo kîra kîroria Ndanieri aaroriirie mantû ma kîo. 17 Ûra akeegua arî rûûgûrû rwa nyomba, eendama atikaagerie kûthara nwa mbi. 18 Ûra akeegua arî mûndaani, atigaakare kûthûkia nguo yake ara agûtûûgîîrîîtie. 19 Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku! 20 Îrombaani kagiita gaku bûgaakuthûka gatikeegue karî ga mpîo kana wîgua kûrî ntugû ya *Sabatû, 21 n'ûntû kînyamaara kîra ûkeegua kîrî oogo, i kîra gîtooneka nthîgûrû îno kaîrî kuuma îkûûmbwa. Na gûtirî kîngî ta kîo gîkooneka gûkû kaîrî. 22 Ûkeegua ti bûra Mwathani akubîîtie ntugû inu, gûtirî muntû oonoka. Na aikubîîtie n'ûntû bwa bara athuurîîte. 23 Kwoogu ûra akaabwîra, ‘N'ûyû Kîrîstû!’ kana ‘N'ûûra!’, bûtikaamwîtîgie. 24 N'ûntû Kîrîstû ba ûrongo na iroria bia ûrongo ûkeegua barî ku. Bakaaringaga biama biinene na bakoonanagia magegania kaingo wegua gûkaûmbîka beeneeria kinya bara Ngai athuurîîte. 25 Îndî biû îmenyeereeni. Nkûbwîra mantû monthe mbere ya makarîka.
26 “Kwoogu bakaaya kûbwîra, ‘Arî rwanda,’ bûtikaathi noogo. Kana babwîra, ‘N'ûyû gûkû nyomba,’ bûtigeetîgîre. 27 Ta bûra rweni rwenagia uumîîro bwa riûa rûkamûrîka ûthwîro bwa riûa, i ta bu kûûya kwa Mwana wa Muntû ûkeegua gûkari. 28 Ara kiimba kîîgagua kîrî noogo nderi ciîthîranaga.”
Kûûya kwa Mwana wa Muntû
29 Yiesû aathi na mbere auga, “Nthûti îmwe, nyuma ya kînyamaara gîku kînene ûgu, riûa rîkaaruma mwindu na mweri ûtige kûtharara, nthata igwe kuuma îgûrû na mainya ma îgûrû mainainue. 30 Rîru i rîo rwano rwa kûûya kwa Mwana wa Muntû rûkooneka îgûrû. Antû ba nthîgûrû yonthe bakaarîra baminûke mûno boona Mwana wa Muntû aayîîte na matu kuuma îgûrû arî na inya na mwago ûmûnene. 31 Rîra karumbeeta gakaaringwa na kayû kaanene, agaatûma araîka baake bathi nteere cionthe cia nthîgûrû beethîranie bara bathuure nthîgûrû yonthe.”
Kîthoomo kuumania na mûkûyû
32 Yiesû auga, “Thûkiani ngerekano ya mûkûyû bwîrutane na uu. Rîra mpong'i cia uu cianakaga mathangû makaanjîîria kûririma i bûmenyaga i thaano îrî akubî. 33 Ûgu i ta bu ûkeegua kûrî rîra bûkoona mantû mamu magîkarîka. Bwona bûmenye Mwana wa Muntû arî akubî mûno kûûya. 34 Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru. 35 Îgûrû na nthîgûrû bikaathira îndî biugo biakwa bitikooro bithira.”
Karagaani bwîthuuranîrîte
36 Yiesû auga, “Gûtirî muntû aiyî ntugû kana îthaa. Gûtirî mûraîka arî îgûrû aiyî, wana Mwana atiiyî. I Baaba wenka aiyî. 37 Bûra gwakarîkire ntugû cia Nuu i ta bu gûgaakarîka ntugû ya kûûya kwa Mwana wa Muntû. 38 Ta bûra gwakari ntugû cia mbere, mbere nthîgûrû îkondorua i rûûyî, antû baarîyaga na bakanyua, bakagûrana kana bakagûrîrwa mwanka rîra Nuu aathûngîîre cabinaani. 39 Antû bataiyî bûra gûgaakara, mwanka rîra mûguû wayire wabakondoria bonthe. Ntugû îra Mwana wa Muntû akaaya, antû bagaakirimanua ta bûra baakirimaniirue. 40 Ntugû înu antû arûme baîrî bakeethîîrua mûndaani, ûmwe athûkue ûra ûngî atigwe. 41 Aka baîrî bakeethîîrua bakîthia na iiga rîmwe, ûmwe athûkue ûra ûngî atigwe.
42 “Kwoogu îmenyeereeni n'ûntû bûtiiyî i rî Mwathani akaaya. 43 Na bûmenye ûkeegua mwene mûciî namenyaga rîra mwamba akaaya nakaria nyomba yake atikaiywe. 44 Kwoogu, biû karagaani bwîthuuranîrîte n'ûntû Mwana wa Muntû akaaya rîra bûtakûmwîrîgîîra.”
Ngerekano ya mûruti ngûgî ûmwega na mûruti ngûgî ûmûthûûku
45 Yiesû aathi na mbere na kwaria. Auga, “N'ûû îîndî mûruti ngûgî mwîtîgua na ûmûûme, ûra mwene mûciî aûmba gûtigîra mûciî rîra atarî ku akarûmia bara bangî irio thaa cia kûrîa ciakinya? 46 Mwene mûciî aacooka nakumagia mûruti ngûgî ta ûyû eethîra arutîîte ngûgî îra aamwere bwega. 47 Na mma ga nkûbwîra, mûnene wake amûtuîkithagia mûrûngamîîri wa into biake bionthe. 48 Îndî ûkeegua arî mûruti ngûgî ûmûthûûku aatigwa akathûgaania ûra amwandîkîîte atiiya rua, 49 akaanjîîria kûnyamaaria aruti ngûgî bara bangî, akanyua ncoobi na areebi akîrîyanagîra nabo, 50 mûnene wake akaaya ntugû îmwe ataiyî na thaa ira atamwîrîgîîrîîte. 51 Aaya amûnyamaarie mûno amûgiitîre îgamba ta mwîbwithia, amûgere nja kûra ûkeegua kûrî na kîrîro na kîeba kîînene mûno.”a