Kûreeteera muntû magerio
17
1 Yiesû eera arutwa baake, “Mantû mara matûmaga antû beeyia matiûra. Îndî muntû ûra areetaga mantû ta mamu akoona thîîna mûno! 2 Muntû ta ûyu i kaaba akoogeerwa iiga rîa kûthia nkingo akagerwa îriani bantû atûma nwa ûmwe wa baba baniini beeyia. 3 Kwoogu îmenyeereeni mantûûni mara bûkûrûtha!“Mûruanyûkwe akûbîtîria mûkaanie. Na akaaya kwîrira mûrekere. 4 Na agakûbîtîria maita maingîa ntugû îmwe, na wa kîra îgiita agacooka akaaya agakwîra, ‘Nkwîrira,’ nwa mwanka ûmûrekere.”
5 Atûmwa beera Mwathani, “Mwathani, twongeere wîtîgio bwetû!”
6 Mwathani abeera, “Ûkeegua bûrî na wîtîgio, wana ûkeegua i bûgana gapîndî ka mûtî kara kaniini kîrî mpîndî cionthe, nwa bwîre mûkûyû ta ûyû kûûka ûkagwe îriani na wîbînjîre oogo, na gûgakara woogu.”
Wîra cia mûruti ngûgî
7 Yiesû abaûria, “N'ûû wa cienu eegua arî na mûruti ngûgî wa mûnda kana wa kûmûrîîthîria, na aaya ûgoro kuuma ngûgîîni ûkamwîra, ‘Ncû îîndî ûkare nthî ûrîe irio’? 8 Gûtirî we! Nwanga ûkamwîra, ‘Ndugîra irio ndîe. Îkîra nguo ciaku cia ûrugî ûndeetere irio mbambe ndîe na nyue, woû ûgaacooka kûrîa na kûnyua nyumaani.’ 9 Tika mûruti ngûgî abatîîrue acookerua nkaatho aaruta ngûgî îra abatîîrue kûruta. 10 Kwoogu wana biû bwaruta ngûgî ira bûbatîîrue kûruta, ugagaani, ‘Tiû tûrî aruti ngûgî batarî nwa ata, tûrîrûtha mantû mara tûbatîîrue kûrûtha monka.’ ”
Yiesû ooria antû îkûmi baayîîtue mûtigiri
11 Yiesû akîthi bwa Njerusaremu aakûrûkîîra mwankaani wa Samaria na Gariiri. 12 Agûkinya taûni îmwe aakomana na antû îkûmi baayîîtue mûtigiri. Antû babu baarûngama gataaria 13 bakiugagîîria na inya, “Yiesû, mwarimû, twîgue kîao!”
14 Yiesû akûboona abeera, “Îthiini bûkoonwe i mûthînjîri wa Ngai.” Bathiîte na njîra woogu boorua, baathera.
15 Ûmwe waabo akwona akworua, aacooka nyuma akiugagîîria na inya agîkumagia Ngai. 16 Eekurumania na ûthiû magûrûûni ma Yiesû, amûcookeria nkaatho. Aarî Mûsamaria.
17 Yiesû aûria, “Anga t'antû îkûmi bara mboriirie? Barîkû bara bangî kenda? 18 Gûtirî muntû ûngî aracooka gûcookia nkaatho nwa mûgeni ûyû wenka?” 19 Yiesû amwîra, “Ûkîîra ûthi, wîtîgio bwaku bûgûtûma wora.”
Kûûya kwa ûnene bwa Ngai
20 *Afarisai bamwe bakûûria Yiesû rîra ûnene bwa Ngai bûkaaya, Yiesû aabacookeerie abeera, “Ûnene bwa Ngai bûtiiya bûkîonagwa na meetho, 21 kana antû bakiugaga, ‘Eneeni i bûûbû,’ kana ‘I bûûra,’ n'ûntû wana îîndî bûrî aaga bûrî.”
22 Eera arutwa baake, “Îgiita rîkaaya bwende kwona Mwana wa Muntû, îndî bûtimwona. 23 Kûrî bo bakaabwîra, ‘Eneeni n'ûûra aara!’, kana ‘N'ûyû aaga!’ Bûtikaaraithe noogo kana bûbathingata. 24 Wa ta bûra rweni rwenia rwonagwa i bonthe n'ûntû rûmûrîkaga nteere cionthe cia îgûrû, i ta bu kûûya kwa Mwana wa Muntû gûgaakara. 25 Îndî mbere, nwa mwanka anyamaare mûno na aregwe n'antû ba nthuke îno.
26 “Wa ta bûra gwakarîkire ntugû cia Nuu, i ta bu gûgaakarîka ntugû ya kûûya kwa Mwana wa Muntû. 27 Mbere ya nthîgûrû îkondorua i rûûyî, antû baarîyaga na bakanyua, bakagûrana na bakagûrwa, mwanka rîra Nuu aathûngîîre cabinaani mûguû waya wakondoria nthîgûrû antû bonthe baakua.
28 “Na nthîgûrû îgaakara ta îgiita rîa Rooti. Antû baarîyaga na bakanyua, bakagûranîra na bakeendanîria into, bakaanda na bagaaka nyomba, 29 mwanka ntugû îra Rooti aumire Sondomu. Gwacooka kwaura mbura ya mwanki wa ûbiritib kuuma îgûrû matuuni yaûraga antû bonthe. 30 Ûgu i ta bu gûgaakarîka rîra Mwana wa Muntû akaaya.
31 “Ntugû înu ûra akeegua atwete rûûgûrû rwa nyomba yake naatagûrûka athûkia into biake nyomba. Na ûra akeegua arî mûndaani, atikaathûgaanie gûcooka mûciî. 32 Ririkanaani mwekûrû wa Rooti!
33 “Muntû ûra acûaga gwîtûûria mwoyo wengwa agacuaga. Îndî ûra agaakua n'ûntû bwakwa, agaatûûra mwoyo. 34 Na ga nkûbwîra, ûtugû bûbu antû baîrî bakeethîîrua bamaami gîtandaani kîmwe, ûmwe athûkue ûyu ûngî atigwe. 35 Aka baîrî bakeethîîrua bakîthiagîra amwe, ûmwe athûkue ûyu ûngî atigwe. [ 36 Antû arûme baîrî bakeethîîrua barî mûndaani, ûmwe athûkue ûyu ûngî atigwe.]”c
37 Arutwa baake bamûûria, “I nakû mantû mamu magaakarîkîra, Mwathani?”
Yiesû abacookeria abeera, “Ara kiimba kîrî noogo nderi ciîthîranaga.”