Afarisai beenda Yiesû aringa kîama
16
1 *Afarisai bamwe na *Asandukai baathi kîrî Yiesû. Bakîmûgeria bamwîra aringe kîama, kîrî rwano rwa kwonania inya îra arî n'yo kuuma îgûrû.2 Yiesû abeera, “Bûkoona gwatuga gûtarî na matu buugaga, ‘Rûû gûgaakea gûkembûkîîte.’ 3 Na rûkîîrî buugaga, ‘Îmunthî gûkaura n'ûntû kûrî na matu maayirû.’ I bwiyî kûraitha mwonekere wa matu bûkamenya bûra gûgaakara, îndî bûtikûûmba kûmenya bûra mantû mara magûtuîkîka ntugûûni ino makwonania. 4 I rûciaro rûûthûûku rwa aregi Ngai rûkwenda kwona kîama. Gûtirî kîama kîngî bûkoona tatiga kîra gîa kîroria Njona.” Yiesû abatiga aathi.
Yiesû eera arutwa baake beemenyeere kîrî Afarisai na Asandukai
5 Arutwa ba Yiesû bakîringanîria bathi rûgongo rûra rûngî rwa îria, bataaririkana bakamata mîgaate. 6 Yiesû abeera, “Îmenyeereeni îgûrû rîa ndawa îra *Afarisai na Asandukai batûmagîra kwimbithia mîgaate.”a
7 Arutwa baanjîîria kwaranîria. Bauga, “Arîtwîra ûûgû n'ûntû tûtiraaya na mîgaate.”
8 Yiesû akwîgua bakîîrana ûgu abaûria, “N'ata bûrî na wîtîgio bûûniini! I kî n'ûntû bûkûthûgaania i bûra bûtarî na mîgaate? 9 Ka bûtagûciûkîrwa kinya îîndî? Ka bûtakûririkana rîra ndaagaîrîîre antû ngiri itaano mîgaate îtaano? Bwaûyûriirie ikaabû bigana bia matigari? 10 Bûtikûririkana kinya rîra ndaagaîrîîre antû bara ngiri inya mîgaate îra mûgwanja? N'ikaabû bigana bia matigari bwethîraniirie? 11 Aabu i kî îîndî n'ûntû bûtagûciûkîrwa bûmenya ti mantû ma mîgaate nkwaragîîria? Bwîmenyeere kîrî ndawa ya kwimbithia mîgaate ya Afarisai na Asandukai.” 12 Rîru i rîo baaciûkîîrwe baamenya ataabeeraga beemenyeere kîrî ndawa ya kwimbithia mîgaate, aabeeraga beemenyeere kîrî moorutani ma Afarisai na Asandukai.
Petûrû augire Yiesû n'we Kîrîstû
13 Yiesû agûkinya rûteere rûra taûni ya Kaisaria Firipi yarî aûria arutwa baake, “Inkûbûûria, antû baugaga Mwana wa Muntû n'ûû?”
14 Arutwa baake bamwîra, “Bamwe baugaga ûrî Njoana Mûbaatithania, bangî bakauga ûrî Eriya, na bangî nabo bakauga ûrî kîroria Njeremia, kana ûmwe wa iroria.”
15 Yiesû aacooka abaûria, “Î biû buugaga ndî ûû?”
16 Simioni Petûrû amwîra, “Woû ûrî Kîrîstû, Mwana wa Ngai ûra arî mwoyo.”
17 Yiesû amûcookeria amwîra, “Woû ûrî ûmûthaarime, Simioni mwana wa Njona, n'ûntû ti muntû akûgwûrîrîte mantû mama. I Baaba ûra arî îgûrû akûgwûrîrîte mo. 18 Ga ngûkwîra, i woû Petûrû.b Ngaaka kanica yakwa îgûrû ya rwara rûrû, na gîkuû gîtimîkîria inya. 19 Ngakûnenkera mbungûro cia ûnene bwa îgûrû. Kîonthe kîra ûkaarega gûkû nthîgûrû, wana îgûrû igîkaaregwa. Na kîra ûgeetîgîîria gûkû nthîgûrû wana îgûrû gîgeetîgîîrua.” 20 Yiesû abeera batikeere antû n'we Kîrîstû.
Yiesû akîarîîria mantû ma kûnyamaarua na kûûragwa gwake
21 Kuuma îgiita rîru Yiesû aanjîîria kwonia arutwa baake nwa mwanka athi Njerusaremu anyamaarue mûno n'akûrû, *athînjîri bara banene ba Ngai, na aarimû ba watho bamûûragithie. Îndî akaariûka ntugû ya ithatû. 22 Petûrû amwira gataaria, aanjîîria kûmwîra atige kuuga ûgu. Amwîra, “Mwathani, Ngai atiîtîgîîria mantû mamu na ntienda ûgu!”
23 Yiesû aûndûkîra Petûrû amwîra, “Taaria aaga ndî, Saitaani, n'ûntû nûkûndigîîria ntiraingia kwenda kwa Ngai. Mathûgaanio maaku ti ma kîîngai i ma kîîmuntû.”
Ûra akwenda kûthingata Yiesû
24 Yiesû aacooka eera arutwa baake, “Muntû akeenda kûnthingata abatîîrue eetîîyîra, akamata mûtharaba wake, rîru anthingata. 25 Ûra oonaga mwoyo ûyû n'uu ûrî gîtûmi akaûra. Îndî ûra akeeruta n'ûntû bwakwa agaatûûra mwoyo. 26 Î rîo rî, i baita mbi muntû oona wana ûkeegua nthîgûrû yonthe n'yake, îndî akaaga mwoyo? Anga kûrî kîo muntû ateeyana akîenda kwonokia mwoyo wake?