NJOERI
Mantû ma îbuku rîrî
Ti mantû maingî maiyîkeene meegiî Kîroria Njoeri mwana wa Pethueri. Riîtwa Njoeri rîgîtaûrwa i ta kuuga “Mwathani i Ngai”. Rîtiiyîkeene bwega irî rîandîkirwe îndî bamwe baugaga i kagiita ka mûnene Njoasi, rîra Njeoyanda aarî mûthînjîri ûra mûnene wa Ngai. Bangî nabo baugaga îbuku rîrî rîandîkirwe nyuma ya Aisiraeri bakuuma Mbabironi naara baarî mîgwate. Mantû mara maroreetue i kîroria Njoeri i mabuaneene na mara kîroria Amoci aroreetie.
Kîroria Njoeri n'atarîîrîîtie mantû ma mûrumbî wa ngige ûra akûbuanaania na njûûrî înene ya anthû ikîînyangagia gîntû kîonthe kîra ikoona. Augire Mwathani n'atûmîîte ngige ciithûka na mwathû ûmûûî birî nthînje n'ûntû bwa meeyia ma antû ba Isiraeri. Kîroria Njoeri n'atûmagîra ngerekano ya ngige kwarîîria njûûrî yongwa ya anthû bara bakaithûkîra Isiraeri. Îndî Mwathani ariuga ûkeegua antû bagaacooka kîrî wee, akabarekera na abathaarime kaîrî.
Ngige i cienyangiirie into mûno, îndî gûku i ta kûroncithua bûra gûgaakarîka ntugû ya îgamba ya Mwathani kîrî antû bara bareganaga na wendo bwake bûûtheru.
Kîroria Njoeri n'aaroriirie bûra Mwathani agaatûma Kîrundu wake îgûrû rîa antû bonthe arûme na aka, antû baîthî na baakûrû. Ûroria bûbû i bwaûyûrire ntugû ya Pentekosti.
Mwathani akagaambithia mîgongo kîguuruuni kîa Njeosafati îndî akeegua arî kîîbitho gîa antû baake ba Isiraeri, Mwathani agaatûûra kîrîmaani gîake kîîtheru gîa Sayuuni. Njerusaremu îgaatûûra îrî ntheru tene na tene na gûtirî njûûrî ngeni îkaamîcinda kaîrî.
Mwathani akaaruruma ta cimba kuuma Sayuuni,
na agoondoke ta nkwa Njerusaremu,
nthî na îgûrû bikainaina.
Îndî Mwathani agaatuîka bantû aitu a kwîbitha,
na akaarigîîria antû baake ba Isiraeri.
Rîru i rîo bûkaamenya atî niû i niû Mwathani Ngai wenu,
ûra ûkaraga Sayuuni kîrîmaani gîakwa kîîtheru,
I rîo Njerusaremu îgaatuîka întheru,
na gûtirî rîo ageni bakaabaithûkîra kinya rî. (Njoeri 3:16-17).
Gwookubî îbuku rîrî rîkari ûûgû:
Kwithûkîrwa i ngige (1:1-12)
Garûkîraani Ngai (1:13-20)
Njûûrî ya ngige (2:1-11)
Mwîto wa kwîrira (2:12-17)
Ngai akaathaarima nthîgûrû kaîrî (2:18-27)
Ngai akaaneenkanîra Kîrundu wake 2:28-32
Ngai akaagaambithia mîgongo (3:1-15)
Ngai akaathaarima antû baake (3:16-21)