NJOERI
Kwithûkîrwa i ngige
1
1 Gîkî i kîo kiugo kîa Mwathani kîra kîayîîre Njoeri mwana wa Pethueri.2 Thikîîriani mantû mama, biû akûrû,
na bûkiinde matû bwinthe bara bûtûûraga nthîgûrû îno.
Ntugûûni cienu, kana cia ba abaagu rî,
kûrî rîo wakarîka ûntû ta bûbû?
3 Îraani aana beenu ûntû bûbû,
nabo aana beenu beere aana baao,
nabo aana babu ba aana baao beere nthuke înu îîngî.
4 Mîrumbî ya ngige îkûgwîrîîra imeraani,
mûrumbî wa mbere warîa wenyangia.
Bira waatigariirie,
biarîîgwa i mûrumbî wa îîrî ûra warî ûmûnene mûno.
Bira waatigariirie biarîîgwa i biunga,
na wa mûthia waciata bionthe kûrû.
5 Indûkîraani, biû atogooni, na bûrîre!
Kayaani, biû bwinthe anywi ba ndibei,
ugaani mbu n'ûntû ncabiibû cia kûrûtha ndibei i cimbînyangie.
6 Mûgongo ûkwithûkîra nthî yakwa,
ûrî na inya na ûtitarîka,
na magego maao i ta ma cimba,
na mîguara yao i ta ya cimba ya nka.
7 Mûgongo ûyu n'wînyangîîtie mîcabiibû yakwa,
na waunanga mîkûyû yakwa,
n'wambûrîîte magoko maayo mwanka,
mpoong'i ciatigwa irî njerû ce.
8 Rîraani ta mwan'wa mwarî,
akîrîra aakuîrwa i mûthaka ûra arathiîte kûmûgûra.
9 Gûtirî na irio kana ndibei
ya kûrutîra Mwathani kîgongwana.
Athînjîri, bara batûmîkagîra Mwathani barî na kîeba.
10 Mînda nîmîînyangie,
nthîgûrû n'yo îrî na kîeba,
n'ûntû kîmera gîkûthûûka,
ndibei, irio na maguta,
bionthe i biithiru.
11 Ibûkwîthîînia mana biû arîmi,
ugaani mbu biû arîmi ba mîcabiibû,
n'ûntû bwa ngano na sayiri,
îî maketha ma mînda monthe makûûra.
12 Mîcabiibû na mîkûyû n'yo îkûnyaara,
mîkûkûmanga, mîkîîndû, na mûtî wa matunda,
mîtî yonthe ya maciaro îkûnyaara;
na yaûmanîria amwe na gîkeno gîa antû.
Garûkîraani Ngai
13 Îîbogeeni makunia n'ûntû bwa kîebaa bûrîre, biigû athînjîri,
ugaani mbu, biigû aruti ngûgî kîthînjîrooni.
Ncûûni bûraare ûtugû bunthe bwîbogeete makunia bûkîrîraga,
biigû aruti ngûgî ba Ngai wakwa,
n'ûntû biegwa bia irio na bia ndibei,
bitikûrutwa Nyomba ya Ngai wenu.
14 Tuani kîatho kîîtheru gîa gûtîîrîra kûrîa irio n'ûntû bwa maromba,
îtanaani kîûthûrano kîîtheru,
îtaani akûrû na bara bonthe batwîre nthîgûrû îno,
bathi Nyomba ya Mwathani Ngai wenu,
bamûrîrîre.
15 Ntugû ya Mwathani îrî akubî!
N'yo i ntugû ya mûthiro kuuma kîrî Mwene Inya,
n'ata îkeegua îrî ntugû ya kûmakania!
16 Anga i rîo bitirathirire tûkîonaga na meetho meetû?
Gîkeno na gûcancamûka biathira Nyomba ya Ngai.
17 Mbeû icirang'oonyarîîre nthîgûrû îmbûûmagaru,
namo makûmbî i maatheri na gûtirî irio.
18 Nyamû cia ndîîthia i ka i kwananîria i yûûra!
Ng'ombe i ka ikûruruutha,
n'ûntû gûtirî na ndîîthia,
ntundu ya ng'ondu n'yo n'îkûnyamaara i yûûra.
19 Mwathani, i woû nkûrîrîra,
n'ûntû mwanki n'ûbîîthîîtie ndîîthia rûriîni,
na ndîrîmbî ta cia mwanki ciarûngûria mîtî yonthe ya mûnda.
20 Îî, wana nyamû cia kîthaka n'igûkûrîrîra,
n'ûntû tuuro twa rûûyî itûûbwethu,
na mwanki n'ûbîîthîîtie ndîîthia cia rûriî.