Njûûrî ya ngige
2
1 Ringaani karumbeeta kîrîmaani gîa Sayuuni,ringaani rûgoci rwa mbu kîrîmaani gîakwa kîra kîtheru.
Atûûri bonthe ba nthîgûrû îno i batheteme,
n'ûntû ntugû ya Mwathani n'îyîîte; i ta înkinyu.
2 Ûyu ûkeegua ûrî mûthenya ûrî na mwindu ûmûnene mûno,
mwindu ûmûrumanu ta wa ntugû ya nthaatû.
Mûgongo ûmûnene na ûrî na inya n'ûyu ûûyîîte ûkari ta ngooki îkîamba irîma,
gûtooro kwoneka ûntû ta bûbu kaîrî na bûtikooro bwoneka.
3 Wa ta mwanki, mûgongo ûyu ûrîthi ûgîciataga kîonthe kîra kîrî mbere na nyuma yau,
mbere ûkinya bantû, bantû agu eegagua abuaneene na mûnda wa Endeni,
na nyuma ya wakûrûkîîra oogo, gûgatuîka rwanda rûûtheri,
îî, na gûtirî kîo kîûmba kwonokua kuuma kîrî uu.
4 Na mwonekere wau i ta wa mbaraathi,
na mûthiîre wau i ta wa mbaraathi cia ndûa.
5 Ikîthûngûtha irîmaani ithiiyaga ikîrutaga mûrurumo ta wa nkaarî cia mbaraathi cia ndûa
na ikîringaga gîtuma na kûthandîka ta mwanki ûkîbîîthia rûûa,
na ciîbangîîte ta njûûrî îthiîte ndûani.
6 Bara bagaaciona bakaathetema,
na moothiû maao magaatuga n'ûntû bwa ûguaya.
7 Ithiiyaga mbere na mpwî
na igatwa nthingo ta ncamba cia ndûa.
Ikathi mbere kîra îmwe na njîra yaayo,
na gûtirî nwa îmwe îbîtagia njîra.
8 Gûtirî yoo îtangaga îra îngî,
ithiiyaga mbere kîra îmwe na njîra yaayo,
ciîtûragîra njîra na inya gatîgatîîni ka mathaga ma ndûa,
na gûtirî kîo kîûmba gûcirigîîria.
9 Ikuuthûkagîra taûni,
na ikaugagîria rwîro nthingoonia îgûrû,
igatwa ikathûngîra nyomba
na ndirica ta aamba.
10 Nthî niinainaga mbere yacio,
na îgûrû rîkathetema.
Riûa na mweri igeekîrwa mwindu,
na nthata igatiga kûtharara.
11 Mwathani n'we nakûruta watho akîgondokaga,
arî mbere ya njûûrî yake,
njûûrî yake n'îînene mûno na îrî na inya!
Njûûrî îra yûûyûragia mawatho maake îrî na inya na n'înene.
Ntugû ya Mwathani n'îînene na ya kûmakania mûno,
n'yo rî, n'ûû ûûmba kûmîûmîîria?
Mwîto wa kwîrira
12 Îndî wana gûkari ûgu, Mwathani ariuga ûû,
“Ncookeraani na nkoro cienu cionthe,
bûgîtîîragîra kûrîa n'ûntû bwa kûromba, bûkîrîraga meethori, na kwîgua bûrî na kîeba.
13 Tembûrangaani nkoro cienu, na ti nguo cienu,”
Bûcookere Mwathani Ngai wenu,
n'ûntû we n'ûmwega, na nwa kîao, na aûyûrîîtwe n'ûtugi,
atithûûrangaga na mpwî,
na n'eegagua akîenda kûrekanîra.
14 N'ûû wiyî kana atiigarûra mathûgaania atwîgue kîao,
atige atuthaarima, atûnenkere into,
rîru tûkoona bia kûrutagîra Mwathani Ngai wetû,
igongwana bia irio na bia ndibei.
15 Ringaani karumbeeta gûku Sayuuni bûtue kîatho kîîthuure,
gîa gûtîîrîra kûrîa n'ûntû bwa kûromba,
îtanaani mûceemanio wa antû bonthe.
16 Îthîraniani antû,
îî îtanaani mûceemanio ûmûtheru,
bwîthîranie akûrû, twana na tûgenke,
kinya mûgûrani na mwiki wake wana bo ibatiganîrie nyambura ciao baaye.
17 Athînjîri, bara barutagîra Mwathani ngûgî,
i barîre barî gatîgatî ga antû na kîthînjîro.
Barombe bakiugaga ata rî, “Îgîîrua antû baaku kîao, îî woû Mwathani.
Na ûtikaareke antû baaku bagîa îgi,
na ûtikaareke mîgongo îîya kûbanyûrûnta.
I mbi îgaatûma antû baûria,
‘Ka Ngai wao arîkû?’ ”
Ngai akaathaarima nthîgûrû kaîrî
18 Na rîru i rîo Mwathani akeegua arî na wendo bûûnene kîrî nthîgûrû yake,
na eegîîrue antû baake kîao.
19 Mwathani agaacookeria antû baake abeere;
“Raithaani, nkabûreetera irio, ndibei înjerû na maguta maayerû naabi bûkaabaa into bibu,
ntiireka bûgîa îgi kaîrî mbere ya mîgongo.
20 Njûûrî îra yuumîîte mbarî ya îgûrû,
nkamîrûngia îthi kûûraaya naabi,
naani nkamîîngata mwanka rwanda rûrî îbooru naara bagaakuîra;
Gîcuncî kîayo kîa mbere gîkaathûngîra Îriani rîtarî Mwoyo,
na gîcuncî kîayo kîra kîrî nyuma gîkaathûngîra Îria rîa Menditarîniani,
kîrumba kîayo gîkaûyûra nthîgûrû.
Nkabathiria n'ûntû bwa mantû maanene mara babûrûthîîte.b
21 Îî woû nthî, tiga gûkuthûka,
kena na ûcancamûke,
n'ûntû Mwathani n'arûthîîte mantû maanene.
22 Naabi nyamû cia kîthaka, bûtigaakuthûke,
n'ûntû ndîîthia nîkûririma;
na mîtî n'yo nîgûciara,
mîkûyû na mîcabiibû îgaaciara mûno.
23 Kenaani biû aana ba Sayuuni,
bûgwîrîrue bûra Mwathani Ngai wenu abûrûthîrîîte,
abuurithagîria mbura ya nthano, na kîthimi kîa mma,
n'we abuurithagîria mbura ya nthano,
na ya mûratho, wata îgiita rîa mbere.
24 Ndwara cia kûbûûrîra ikaûyûra ngano,
nacio nyûngû ciûyûre ndibei îînjerû na maguta maayerû teke mwanka maage akûgîa.
25 Naani nkabûrea mîanka îra
irio bienu biarîîrwe i ngige,
mûrumbî nyuma ya mûrumbî,
i niû ndaabûtûmîrîte njûûrî inu nene cia ngige.
26 Bûkeegua bûrî na irio biingî bia kûrîa na kûbaa,
bûgaankaatha niû Mwathani Ngai wenu, ûra ûbûrûthîrîte mantû ma kûrigaria.
Nabo antû baakwa batiicooka kûgîa îgi.
27 Naabi i rîo bûkaamenya ndî amwe naabi biû Aisiraeri,
na i niû Mwathani, Ngai wenu, na gûtirî ûngî.
Na antû baakwa batiigîa îgi kaîrî kinya rî.
Ngai akaaneenkanîra Kîrundu wake
28 Nyuumaani gûgaakara ata rî, ngeetûûrîria antû bonthe Kîrundu wakwa. Aana beenu, nthaka na aarî, bakaaroragia. Na akûrû beenu bakaarootaga irooto,
nthaka cienu nacio ikoona bioneki.
29 Na ntugûûni inu ngeetûûrîria kinya nkombo Kîrundu wakwa,
cia arûme na aka.
30 “Nkoonania magegania îgûrû na biama nthîgûrû. Ûkeegua kûrî na nthakame, mwanki na thogondi ya ntoogo. 31 Riûa rîkaagarûrwa rîtuîke mwindu, na mweri ûtuîke ta nthakame, mbere ya ntugû înu nene na ya kûmakania ya Mwathani îkinya. 32 Na gûgaakara ata rî, muntû wonthe ûra agaakayîra riîtwa rîa Mwathani akoonokua. N'ûntû rî, kîrîmaani gîa Sayuuni na ndeeni ya Njerusaremu, ûkeegua kûrî na bara bakoonoka, wa ta bûra Mwathani augire îgûrû rîa matigari mara eetîîte.