Ngai akaagaambithia mîgongo
3
1 “Ntugûûni inu na îgiita warîru, ngaacookeria Njunda na Njerusaremu ûtongaa bwao. 2 Nkeethîrania mîgongo yonthe, mbeendamie kîbondeeni kîa Njeosafati. Gûku i ku nkaabagambithîria n'ûntû bwa bûra barûthîrîte antû baakwa Isiraeri. Babanyagaarîîtie mîgongooni, na bakagaana nthî yakwa. 3 Na baaringîra antû baakwa kuura; mwan'wa muntû mûrûme baamûkûûranagia na îrwaya, na bakeendia mwan'wa mwarî auma ncoobi kaingo banyua.4 “N'ata bûkwenda kûmbonia biû antû ba taûni ya Turo na Sindoni, na biû antû ba nteere cionthe cia Firisitia? I ka kûrî bu bûkwenda kwîrîîria kîrî niû? Wegua i bu, naani i nkabûcookeria kwîrîîria gûku kwenu na mpwî mûno kûringana na bûra bûrûthîîte. 5 Bwathûkiirie fetha na thaabu ciakwa na bwathûkia ûtonga bwakwa bwabuira nyomba cia ngai cienu. 6 Bwendiirie antû ba Njunda na ba Njerusaremu kîrî Angiriki kaingo bûbaira kûûraaya na nthî yao. 7 Naani nkabaûkîîria mbarute gûku bwabendiirie, na ntûme bûcookerwa i moothûûku mamu bûrûthîîte. 8 Na nkeendia nthaka na aarî beenu kîrî antû ba Njunda. Nabo bakabeendia kîrî antû ba Sebaini, bara barî antû ba mûgongo ûrî kûraaya mûno; Ûgu i bu Mwathani augîîte.
9 Tûmîîriani ûntû bûbu kîrî mîgongo:
Îîbîthîranîeni n'ûntû bwa ndûa!
Indûkîriani ncamba cia ndûa,
antû bonthe ba ndûa,
i baaye beebîthîranîîtie bathi ndûani.
10 Turaani mîraaû yenu îtuîke mpiû,
natu tûyiû twenu twa kûtheria mîtî bûtûture tûtwîke matumo;
wana ûra ûtarî na inya nauge, ‘Ndî ncamba.’
11 Rûthaani bwa mpwî, bûûye, biû mîgongo,
kuuma nteere cionthe, bwîthîrane amwe.
Itû Mwathani tûma ncamba ciaku ikarûe nabo.
12 Mîgongo niûkîîre,
îthi kîbondeeni kîa Njeosafati,
n'ûntû gûku i ku ngaakara nthî ngambithie,
mîgongo kuuma nteere cionthe.
13 N'antû baathûûku mûno,
i bakinyîîtie rîa gûkethwa,
bakethe ta mwere,
îgiita rîa maketha,
ûbakinyange ta bûra ncabiibû ikinyangagîrwa kîbibiini,
mwanka ndibei îgeetîga,
n'ûntû ûthûûku bwao i bwingî mûno.”
14 Antû magiri na magiri,
barî kîbondeeni gîa gûtuuyanîra magamba.
Na agu noogo ntugû ya Mwathani,
îrî akubî gûkinya.
15 Riûa na mweri bikaagîa mwindu,
nacio nthata igaatiga kûtharara.
Ngai akaathaarima antû baake
16 Mwathani akaaruruma ta cimba kuuma Sayuuni,
na agoondoke ta nkwa Njerusaremu,
nthî na îgûrû bikainaina.
Îndî Mwathani agaatuîka bantû aitu a kwîbitha,
na akaarigîîria antû baake ba Isiraeri.
17 “Rîru i rîo bûkaamenya atî niû i niû Mwathani Ngai wenu,
ûra ûkaraga Sayuunib kîrîmaani gîakwa kîîtheru,
I rîo Njerusaremu îgaatuîka întheru,
na gûtirî rîo ageni bakaabaithûkîra kinya rî.
18 Na gûgaakara atarî, mûthenya ûyu,
irîma bikauma ndibei îrî mûrîo,
na tûrîma natu tûkaanyûûrûûka îria,
na tuuro tunthe twa Njunda
tûkaaruta rûûyî;
Nakîo kînyaka gîkauma Nyomba ya Mwathani,
na kînywithie rûûyî na kîrinde Kîbonde gîa Sitimu
19 Miisiri îgaatuîka ng'aarû,
na Endomu îgaatuîka rwanda,
n'ûntû bwa ûthûûku bûra baarûthîîre aana ba Njunda,
rîra baatûûrire nthakame îtarî na mabîtia nthî înu ya antû ba Njunda.
20 Îndî Njunda îgaatûûrwa tene na tene,
na Njerusaremu kuuma nciarwa na nciarwa.
21 Nkabarîîria nthakame yao îra yetûûrirwe îtarî na mabîtia îra ntaabarîîria,c
na ngaatûûraga kîrîmaani gîa Sayuuni.”