Mwîto wa kwîrira
14
1 Cookeraani Mwathani Ngai wenu, biû antû ba Isiraerin'ûntû meeyia meenu i mo matûmîîte bûgwa.
2 Cookaani kîrî Mwathani na biugo bibi bûmwîre ata rî,
“Tûrekere meeyia meetû
na ûtwîtîgîîrie kaîrî,
naati tûgagûkumia.
3 Antû ba Asîîria batiûmba gûtûteethia,
wana kinya mbaraathi cia ndûa ititûguna;
Tûtikooro tûîta mîbuanaano Ngai
îra twîrûthîrîîte na njara cietû kaîrî.
I woû Mwathani gwîgagîîrua nkîa kîao.”
4 Mwathani ariuga, “Nkaathiria ûremu bwa antû baakwa,
nkabeenda na nkoro yakwa yonthe,
na ntiikara nthûûri i bo kaîrî.
5 Wa ta bûra mbura îreetaga wîrîgîîro kîrî nthîgûrû îmbûmo,
i bu nkeegua nkari kîrî antû ba Isiraeri.
Bagaakomoka bakare ta maûa ma kîthaka,
bakeegua beebînjîrîîte bagaita
ta mîtî ya kîrîma kîa Rebanoni îra îrî mîri îmiraaya.
6 Mpoong'i cienu ikanyagaara
na ithongame ta mîceituuni
na îgîte mûruke ûmûthongi ta wa mîthithinda ya Rebanoni.
7 Bûkaanogokaga mûgunyeeni wakwa kaîrî,
na imera bienu bigaakûra.
Bûkaaririma na bûkare ta mûcabiibû
na bûgîe îgweta ta ndibei ya kuuma Rebanoni.
8 Biû Isiraeri, uthatîraani mîbuanaano yenu.
Anga ntibûcookeria maromba meenu na mbûmenyeere?
Niû nkari ta mûtî ûra ûririmaga,
na i niû kaumo ka ithaarimo bienu.”
9 Bara baûgî i bamenye mantû mama,
bara baûme beerewe biugo bibi.
N'ûntû njîra cia Mwathani n'imbega,
na bara batheru i bo bathiiyaga nacio,
îndî eeyia bagaataratara na bagwe.