Gûkaanûkua gwa Isiraeri
13
1 Tene mwîrîga wa Eburaimu waaragia, antû bonthe bakainaina n'ûguaya,n'ûntû mwîrîga ûyu n'warî îgweta Isiraeri.
Îndî antû ba Eburaimu i beeyiirie na njîra ya kûgonga Mbaari,
na gîku i kîo gîgaatûma bathira.
2 Îîndî nwaka bathiîte na mbere na kûrûtha meeyia
na njîra ya kwîrûthîra mîbuanaano ya fetha,
îra îrûthîîtwe na waara n'atea.
Na bûkeerwa bûrutîre mûbuanano ûyu wa kayaû igongwana,
na kinya bûkeerwa buucûûnce.
3 Kwoogu bakaathira ta ngooki
kana baûrûrûke ta maame ma rûkîîrî,
kana ta bûra rwero rwa mwere rûgûrûkagua i kîbuubani
kana banyagaare ta ntoogo.
4 Mwathani ariuga,
“I niû, Mwathani, Ngai wenu
ûra aabûrutire ûkombooni bwa Miisiri.
Bûtikaagîe na Ngai ûngî tatiga Niû,
n'ûntû gûtirî mwonokia ûngî.
5 I ndabûmenyeere rîra bwarî ng'arûûni îmbûmo,
îtaarî na rûûyî.
6 Îndî rîra bwathûngîîre nthîgûrû îmbega, i bwabaire.
Na rîra bwabaire, bwekumia,
na bwariganîrua i niû.
7 Kwoogu Nkaathitimûkania naabi ta cimba,
nkaabûgiitîra njîraani ta ngo.
8 Nkaathitimûkania naabi
mbûteembûraange ta ndûba îtuunyîîtwe twana twayo,
Nkaabûtembûranga ta cimba rîra îbûûti.
Na mbûtagute ta nyamû ya kîthaka.
9 Biû antû ba Isiraeri, nkabûthiria.
Rîru rî, n'ûû we bûkûthûgaania akabûtuunyûkia?
10 Arîkû mûnene wenu îîndî na atikûbwonokia?
Barîkû atongoria ba taûni cienu cionthe babwonokie?
Bara bûraugaga,
‘Tûnenkere mûnene na atongoria.’
11 Ndaabwere mûnene na mûthûûro,
na ndamûthûkia na ngoga.
12 Meeyia na mabîtia ma Aisiraeri i maandîke mabukuuni
na maigwa bwega.
13 Ûrûrû bûkûûya kîrî antû, ta ûrûrû bwa mwana.
Nabo bakari ta kaana kara karegagîra nda ya gina.
Îgiita rîa gûciarwa i rîîkinyu, îndî nwaka baremereete nda.
14 Ntiteethia antû baba bauma nthîgûrû ya bara bakuîte.
Kana mbatuunyûkia bauma inyaani ya gîkuû.
Woû gîkuû birîkû inyamaara biaku?
Naawe nthiko kûrîkû kûmakania gwaku?
Ntibeegîîrua kîao kaîrî.
15 Wana wegua Eburaimu nagûkara bwega nkûrûki ya aruagina bara bangî,
kîbuubani gîkaaya kiumîîte bwa uumîîro bwa riûa
na kîra kîrî mwanki mûno kiume ng'arûûni
gîkîbwethagia inyaka biake
na kûnyaaria ithima.
Bagaatuunywa into biao bionthe
bira birî bia bata.
16 Asamaria nwa mwanka beegwe îkaanûkia rîra rîbaagîrîîte,
n'ûntû bwa kûrega kûmbathîkîra.
Bakaathirîrua ndûani,
tûgenke twao tûgaakanyanua maigaani,
na eekûrû baao bara barito bagaatûndûrwa nda ciao.”