12
1 Aisiraeri barutaga ngûgî ya manata kwîngana na ruuo.a
Moorongo na ûgîti i biongerekeete gatîgatîîni kaao;
I baiganîrîîte karîîkanîro na Asîîria
na bakeendagia maguta ma mîceituuni Miisiri.
2 Mwathani arî na îgamba n'antû ba Njunda,
agaakaanûkia rûrîîyo rwa Njakubu kûringana na mîthiîre yake,
na abarîie kûringana na mîtugo yao îmîthûûku.
3 Wa barî nda ya gina, Njakubu n'agwatire mûruagina gîtende,
agûkûra aakiindana na Ngai.
4 Aakindanire na mûraîka aakîria mûraîka inya,
naarîrire na amwereka amûthaarima.
Njakubu aakomanire na Ngai Betheri
na noo baarîîrie n'we.
5 I Mwathani wa Njûûrî yonthe,
riîtwa rîake i Mwathani!
6 Îîndî cookaani kîrî Ngai wenu,
rûthagaani mantû ma wendo na mara mabatîîrue,
etagîîraani Ngai wenu ntugû cionthe.
7 Mwathani ariuga,
“Antû ba Isiraeri bakari ta abiacaara bara batûmagîra ithimi bitarî biega,
na beendeete kwenia antû mûno.
8 Beekumagia bakiugaga, ‘Tiû tûrî itonga,
i tûrutîîte ngûgî twatonga.
Na gûtirî we ûûmba gûtûthitaanga
akiugaga tûtongeete na njîra îtarî mbega.’
9 Îndî niû, Mwathani Ngai wenu
ûra aabûrutire nthî ya Miisiri,
ngaatûma bûtûûraga maremaani kaîrî
wa ta bûra bwatûûraga kagiita kara bwarî rwanda.
10 I ndaariirie na iroria;
na ndabiaa bioneki biingî na ngerekano,
biîya kûbûkaania.
11 Naagu Ngiriandi kûrî na mîbuanaano,
na bara bamîgongaga bakaathira.
Naagu Girigari barutagîra ngai cia mîbuanaano igongwana bia ncamba cia ng'ombe,
ithînjîro biao bigaakara ta ithûmba bia maiga ngûndûûni.”
12 Njakubu aatoorokera nthîgûrû ya Mesopotamia,
naara aarutîîre muntû ngûgî kaingo amwaa mwarî agûra,
aamûrîîthagîria ng'ondu rûrî rûraayio.
13 Mwathani n'aatûmire kîroria
kîathi gîatongoreeria antû ba Isiraeri bauma ûkombooni bwa Miisiri,
na abamenyeera.
14 Antû ba Isiraeri i batûmîîte Mwathani athûûra mûno i bo.
I babatîîrue barîua n'ûntû bwa meeyia maao ma kûûragana,
Mwathani wao akabakaanûkia n'ûntû bwa kûmûbûthia.