Wendo bwa Ngai kîrî antû ba Isiraeri
11
1 “Rîra Isiraeri aarî mwana, i ndamwendeete,i ndeetire mwana wakwa kuuma nthîgûrû ya Miisiri.
2 Îndî nyumaani wa bûra ndaathiîte na mbere kûbeeta,
nwabu nabo baantiganagîria bakathi aaraaya naani.
Na baathi na mbere kûrutîra Mbaari igongwana
na kûbîîthîria ngai cia mîbuanaano macoco.
3 I niû ndagwatire antû ba Isiraeri njara ndabarutana kûmotia
na ndabaûkîîria na njara ciakwa;
îndî amwe na ûgu bataamenya
kana i niû ndaabamenyagîîra.
4 Ndabatongoreerie na kîao na wendo,
ndabaruta îcooki nkingo ciao,
na ndaakuamîîria kûbarera.
5 Batiicooka Miisiri kaîrî
îndî bakaathagwa n'Asîîria,
n'ûntû bakûrega kwîrira.
6 Ûkeegua kûrî na ndûa taûniini ciao,
bakaathirua buru,
na mîbango yao îgaakinya mûthia.
7 Antû baakwa i beerutîîte kûûndega
n'ûntû bwa ngai îra bakûthûgaania îrî na inya nkûrûki yakwa,
na itibateethia.
8 Aisiraeri, n'wa mbûrekeerie ma bûkathi?
N'wa mbûmbe kûbûtiganîria?
N'wa mbûthirie bûra ndaathiriirie antû ba Andima,
kana mbûthiria ta antû ba Seboiimu?
Arî, ntirûtha ûgu,
wendo bûra mbwendeete nabu i bûûnene mûno.
9 Ntibwa îkaanûkia na mûthûûro,
ntiînyangia Isiraeri kaîrî.
Nûntû i niû Ngai, na ntirî muntû,
ndî Ûra Mûtheru gatîgatî keenu.
Na ntiiya gwaku na mûthûûro.
10 Antû baakwa bakaanthiingata niû Mwathani wao
rîra nkagondoka ta cimba.
Rîra nkaagondoka,
bonthe bakaaya kîrî niû
bakiinainaga baumîîte bwa ûthwîro bwa riûa.
11 Bakaaya babuurûkîîte
ta nyoni ciumîîte bwa Miisiri,
na macea maumîîte bwa Asîîria.
Rîru naani mbacookie mîciî yao.”
I bu Mwathani akuuga.
Kûgambithua gwa Isiraeri na Njunda
12 Mwathani aathi na mbere kuuga,
“Isiraeri anthiûrûkîîte na ûrongo
na ntheto cia kûûmbeneeria,
na Njunda n'we n'areganîîte na Ngai,
na ti mwîtîgua kîrî Ûra Mûtheru.”