Kûgambithua gwa Isiraeri
10
1 Antû ba Isiraeri baakari ta mûcabiibû ûmwegaûra waciarîîte ncabiibû i inyingî mûno.
Wa bûra baathiyaga na mbere kûgîa na ncabiibû imbingî na bagatonga
nwabu bongagîîra gwaka ithînjîro;
Wa bûra maketha maingîaga mîndaani yao,
nwabu bathongamagia ngai ciao cia mîbuanaano cia maiga.
2 Nkoro ciao ciûyûrîîte ûrongo
na kwoogu nwa mwanka banyamaare n'ûntû bwa meeyia maao.
Ngai akaaragania ithînjîro bia kûrutîra igongwana biao
amwe na ngai ciao cia mîbuanaano.
3 Rîru bauge, “Tûtirî na mûnene kaîrî
n'ûntû tûtaatîîya Mwathani.
Îndî mûkûûrani i mbi,
mûnene nwa gûtûrûthîra ata?”
4 Nwa kwaria baaragia ûtheri,
na bakathiîtia mîthiîtio îmiingî batakiingia.
Kwoogu kûgiitwa kwa magamba bûra gûtaagîrîîte kwaingîa ta îria rîî,
riumîîte mûndaani ûmûcimbe.
5 Antû bara batwîre Samaria bakaamakîra
ngai ya mûbuanano wa kayaû wa Bethi-Abeni.
Antû ba noogo bacurîrîre,
na athînjîri ba Ngai bara batûmîkagîra mûbuanano ûyu bakaaminûka,
rîra mwago ûyu ûkenyangua.
6 Mûbuanano ûyu ûgaakamatwa uirwe Asîîria
ûrî kîewa kîa mûnene ûra mûnene.
Antû babu ba Isiraeri nabo bakathekeerwa na beegue nthoni
n'ûntû bwa kûgonga mûbuanano ûyu.
7 Antû ba Samaria na mûnene wao bagaciatwa
wa ta bûra kamûtî gakamatagwa i mûguû.
8 Gûntû kûra gûûkîîru kûra Isiraeri bagoongagîra mîbuanaano,
gûkeenyangua.
Mîîgua na cong'e ikauma
ithîînjîroni biao.
Rîru i rîo bagaakayîra irîma bakîbiîraga, “Tûkunîkîreeni!”
Na bacooke beere tûrîma, “Twomokereeni!”
9 Mwathani ariuga, “Kuuma îgiita rîa Ngibea biû antû ba Isiraeri, nwaka bwîyagia.
N'ûntû bwa meeyia maao, antû ba Ngibea i baithûkîîrwe.
10 Îîndî wana niû nkabwithûkîra na mbwee îkaanûkia biû antû baaremu
na ngeeta njûûrî cia ndûa kuuma nthîgûrû mwanya mwanya
babwee îkaanûkia n'ûntû bwa kwongeereka kwa meeyia meenu.
11 Isiraeri kûrî rîo warî mwathîki ta moori îndutane,
na yendeete kûbûûra irio;
Îndî îîndî ngagwîkîra îcooki nkingooni yaku îînthoongi.
Njunda nwa mwanka bûtiire nthî
na Njakubu nwa mwanka bûrîme na mûraaû.
12 Andaani mbeû imbega cia wagîru,
na bûgaaketha maciaro magwîtîgîka kwenu.
Cimbaani tûgûndû tûra tûrî nkorooni cienu,
n'ûntû gaka i ko kagiita keenu ga gûcooka kîrî Mwathani wenu.
Na akaaya
abuurithîrie ithaarimo.
13 Îndî bwandire ûthûûku
na bwaketha maciaro ma wîyia bwenu.
Bûrîîte maciaro mara maumanîîtie na ûrongo bwenu.
I bwegatiirie inya yenu bwingwa
na bwerîgîîra wingî bwa njûûrî cienu cia ndûa.
14 Kwoogu antû baaku bakaithûkîrwa,
na mîciî yenu îra îrî na inya mûno îkaatharua.
Gûgaakara ta ntugû îra mûnene Sarimani eenyangiirie taûni ya Bethi-Ariberi îgiita rîa ndûa,
na baakanyania eekûrû na twana twao nthîgûrû baakua.
15 Ûgu i bu biû antû ba Betheri bûkaarûthwa,
n'ûntû bwa bûra bûrûthîîte moothûûku manene mûno.
Na gacagacaani inu cia ndûa ikîanjîîria,
mûnene wa Isiraeri akaathirua kûrû.”