Îkaanûkia n'ûntû bwa wîyia bwa Isiraeri
9
1 Antû ba Isiraeri tigaani gûkûngûîra biatho bienu,ta mîgongo îra îîngî.
I bûtigîîte Ngai wenu na bwatuîka antû batarî eetîgua kîrî we.
Bwenda marîi ma ûmaraaya ma irio mara bûthûgaanagia maumanîîtie na Ngai cia ûrongo
mara bûnenkagîîrwa njaraani cia kûbûûrîra.
2 Kwoogu îîndî bira bwîthîranagia rwaraani na ibibiini bia ndibei bitiigana bia kûbûrera,
na gûtiîgua kûrî na ndibei înjerû.
3 Biû antû ba Isiraeri bûtiikara aaga nthîgûrû îno ya Mwathani.
Bûgaacooka Miisiri,
na bûrî ûkombooni bwa Asîîria bûkaarîa irio birî mûgiro.
4 Bûtiûmba kûrutîra Mwathani igongwana bia ndibei
na gûtirî kîgongwana nwa kîmwe kîenu gîkaamûkenia.
Bikeegua bikari ta irio bitongeetwe i muntû ûmûkuû;
bonthe bara bakaarîa bio bakaagwatwa i mûgiro.
Irio bibi bikeegua birî biakûrîa bienu bwingwa,
na bitiûmba kwirwa Nyomba ya Mwathani.
5 N'ata bûkaarûtha ntugû ya kîatho kîîthuure,
ntugû inu nene cia Kîatho kîa Mwathani?
6 Wana kinya bwakuthûka kûthirua,
Miisiri îkabwîthîrania
na Memufisi îbûthike.
Ûtonga bwenu bwa fetha bûkaûrîra nkeekeeni,
na mîciî yenu îkaûyûra matî marî mîîgua.
7 Antû ba Isiraeri, ndîenda bûmenya ûûgû,
kagiita ga îkaanûkia rîenu gagûkinya,
rîra woora muntû akaagwata kîra abatîîrue.
Buugaga iroria i biaa,
atûmwa ba Ngai nabo barî na nkoma.
Kîra gîgûtûma bûmena atûmwa ba Ngai,
i mabîtia meenu kwingîa.
8 Kîroria i mûkaria wa Isiraeri,
îndî wa ara kîrathi, bûgeragia gûgîtega ta kanyoni,
wana kinya Nyomba ya Ngai wake, kîrî na anthû ku.
9 Mantû mara bûkûrûtha i maathûûku mûno
nwa ta mara bwarûthire wo tene bûrî Ngibea.
Ngai akaaririkana meeyia meenu,
na mma akabwa îkaanûkia.
10 Rîra ndoonire Isiraeri rîambere,
ndoonire ta muntû oona ncabiibû rwanda.
Na nkwona biûyûûyû bienu,
ndoona ta muntû oona maciara ma mbere ma mûkûyû.
Îndî rîra bwayire kîrî Mbaari-Peori,
bwagoongire mûbuanano ûyu wa nthoni,
bwagea mûgiro ta uu.
11 Mwago waku Isiraeri ûkaburûûka ta nyoni,
n'ûntû aana baaku bagaakua bagîciarwa,
kana wîgue gûtirî kûgea nda.
12 Wana kinya ûkaaya kûgîa na ûkarera twana,
ngagûtuunya tu na ntûme tûûragwe tuunthe.
Îkeegua îrî ntugû ya kînyamaara kîî kîrî woû
rîra nkabûtiga bwinka.
13 Rîra ndaakwonire rîa mbere Isiraeri,
wakari ta kîrara kiumîîte mûthetuuni ûmûnoru.
Îndî îîndî woû nwaka ûtongorereetie
antû baaku bathi kûng'eerwa.
Mataaro ma Osea
14 Mwathani ngakûûria ûrûthîre antû baaku ba Isiraeri ûntû bûmwe akî,
tuîkithia eekûrû baao nthaata,
na nyonto ciao ciîgue itiûmba kuuma îria.
15 Mwathani ariuga, “Meeyia maao manjîîrie Girigari.
Naagu i noogo ndanjîîrie kûbamenera.
N'ûntû bwa moothûûku mara barûthîîte,
nkabeengatia baume nthîgûrû yakwa.
Naani ntibeenda kaîrî
n'ûntû atongoria baao bonthe i baareganire naani.
16 Antû ba Isiraeri bakari ta mûtî waûmire
woorire mîri,
na ûtaûmba gûciara matunda.
Batigîa na aana.
Îndî wana bakagîa nabo,
i nkaathiria aana baao eendwa.”
17 Ngai wakwa akabûrega
n'ûntû i bwaregire kûmwathîkîra,
n'we agaatûma bûtuîka mbûrûûri mîgongooni îra îîngî.