Aisiraeri bagaakaanûkua n'ûntû bwa kûgonga ngai cia mîbuanaano
8
1 Ûûgû i bu Mwathani akuuga:Ringaani kagoci ka mbu.
Mûnthû aruuyîîte nthîgûrû yakwa wa ta bûra ndiû irûthaga!
Biû antû baakwa i bwînyangîîtie kîrîîkanîro kîra ndaarîîkanîîre naabi,
na i bûregeete kwathîkîra moorutani maakwa.
2 Wana kinya ûkeegua antû baba i bakûmbîta Ngai wao,
na bakauga n'antû baakwa na i bambiyî ndî Ngai wao,
3 i baregeete bûra bwega.
N'ûntû bwoogu anthû bakeengana nabo.
4 Bwathuurire anene na atongoria bara bangî
bûtandombeete rûûtha.
Bwarûtha mîbuanaano ya fetha na thaabu
na n'yo yatûmire bûgwa.
5 Antû ba Samaria, inthûûri
n'ûntû bwa mûbuanano wa kayaû ûra bûrûthîîte.
I mwanka rî bûgatigana na mantû mama bwîtherie?
6 I Mûisiraeri ûmwe mûbundi aabûrûthîîre mûbuanano ûyû,
na t'uu Ngai!
Njaû îra îrûthîîtwe ya thaabu îgongawa n'antû ba Samaria,
îkaaraganua tûcuncî tûcuncî.
7 Barutaga ngûgî ya mana ta kwanda ruuo
bagaketha kîbuubani.
Imera biao bitiîragua biîkîra mpîndî.
Wana bikathiîgwa bitiuma mûtu
Wana kinya bikeerua
birîîyagwa n'ageni.
8 Antû ba Isiraeri bagûtaîgwa n'antû ba mîgongo îîngî,
Barîbathûkia barî ba ûtheri ta nyûngû înkuû.
9 I bathiîte Asîîria gûcwa ûteethio,
batoorooka ta îng'ooi rîa kîthaka rîra rîthiyaga wa bûra rîkwenda.
Eburaimu n'arîîte antû ba mîgongo îîngî babakaria.
10 Wana kinya ûkeegua i bebeendirie bongwa kîrî antû ba mîgongo îîngî,
îîndî nkabeethîrania amwe mbakaanûkie.
Bakanjîîria kûbooba
n'ûntû bwa kwinyîîrua i mûnene na atongoria ba Asîîria.
11 Antû ba Isiraeri, i baakîîte ithînjîro biingî ara barutagîra igongwana bia meeyia.
Îndî ithînjîro bibi babituîkithîîtie bantû akûrûthagîra meeyia.
12 Wana kinya ûkeegua i ndaabaandîkîîre mawatho maingî,
boonaga marî mantû maageni na ma ûtheri.
13 Baandutagîra igongwana
na bagacooka bakarîa nyama inu cia igongwana.
Îndî niû, Mwathani, batigûnkenia.
Na îîndî ngaakara nkîririkanaga meeyia maao
na mbakaanûkie n'ûntû bwoogu.
Nkaabacookia Miisiri!
14 Antû ba Isiraeri i bariganîrîtue i mûûmbi wao.
Beebakîrîîte nyomba cia ûnene
na antû ba Njunda beebakîra taûni inyingî cia inya.
Îndî nkaareeta mwanki ûra ûkaabîîthia taûni cia inya
amwe na nyomba înu cia ûnene.