7
1 warîra ndeenda kworia antû ba Isiraeri,meeyia ma Eburaimu makaumbûka,
na moothûûku ma Samaria makamenyekana.
I baûyûrîtwe n'ûrongo,
aamba bakabunjia nyomba,
na atuunyani bagakabîra antû njîraani.
2 Batithûgaanagia
kana imbiyî ûthûûku bwao.
Bathiûrûkîîtwe i meeyia mara barûthaga,
na gûtirî kîo kîgiria mmoona.
3 Bakenagia mûnene na moothûûku maao.
Aniini ba anene i bakenagîîra moorongo mamu maao.
4 Bonthe n'athûngîîri,
Meerirîîria maao ma mwîrî makari ta riiko rîagwatua mwanki,
rîra rîtakwenda kwongeerwa nkû.
Rîgakara rîgwete
kuuma rîra ndawa ya kwimbithia mîgaate îgeekîrwa mûtuuni,
mwanka rîra mûtu ûkaimba.
5 Ntugû îînene ya gûkûngûîra mûnene wetû,
aniini ba mûnene banyuunyaga ncoobi.
Mûnene n'we akarigicana agakara ta kîaa.
6 Barûûngûragîrwa i mûthûûro,
bagakûthiîra na ûbereera.
Bakaraara gûcamûka i mûthûûro
na rûûni bagatumûka ta mwanki ûreere gûtooga.
7 Bonthe baakanaga ta mwanki wa riiko i mûthûûro,
na bakaûraga atongoria baao.
Anene baao bonthe i bagwîyaga,
na gûtirî mûnene nwa ûmwe waciao aandîrîra mûteethia.
8 Antû ba Eburaimu beegwatanagia na mîgongo.
Antû ba Eburaimu bakari ta irio bia gûtûndûra.
9 Kûgonga ngai inu cia ageni i kûbathirîîtie inya cwe,
nabo bongwa batikûmenya.
Bakari ta mûkûrû ûmûkûûrûkûrû,
ûra arî na mbuî kîongo na atiiyî kana arî nacio.
10 Na wîkumia bwa Isiraeri i bûgûkûyîîrîka meethooni maake:
îndî amwe na ûgu
baticookagîra Mwathani Ngai wao
kana bamûcûa.
11 Antû ba Isiraeri bakari ta îcea rîtaku,
rîtakûmenya nwa ata.
Îîndî barîkayîra Miisiri,
na bagacooka bakaugîria Asîîria.
12 Bathiîte woogu, nkabagerera mûtego,
mbaarûkie nthîgûrû ta nyoni.
Woona ndeegua bakîûmbanîîra amwe,
nkabaa îkaanûkia n'ûntû bwa mantû mathûûku mara barûthîîte.
13 Bakoona thîîna,
n'ûntû i baankuthûkire baathi!
Bakeenyangua
n'ûntû î bandegeete.
Indareendaga kûbakûûra bauma thîînaani,
îndî nabo i bandongoagîra.
14 Nabo batiinkayagîra na ûmma kuuma nkorooni ciao,
îndî i baugaga mbu barî itandaani biao.
Beetemangaga na kwîrombera maketha na ndibei kuuma kîrî ngai iingeni,
na ibaandemeete niû.
15 Wana kinya ûkeegua i niû mbarutanîîte na ndabeekîra inya,
îndî nwaka bathûgaanagia na kûbanga bûra bakanthiria.
16 Bo batigarûkagîra Ûra mûnene,
nabo bakari ta ûta bûrî nkumbo; batiîgwatua.
Atongoria baao bakaûragwa na mpiû,
n'ûntû bwa rwaria rwao rwa wîkumia,
na bakathekeerwa
nthîgûrû ya Miisiri.