Kwîbuithia
6
1 Antû bauga, “Ncûûni, tûcooke kîrî Mwathani!N'ûntû n'we watûtembûrangire tûcuncî tûcuncî,
na nwa we agatworia.
N'atûthuumûrangîtie,
na agatwoga maringangîrwa meetû.
2 Nyuma ya ntugû ciîrî agatûriûkia.
Na ntugû ya ithatû agatûcookanîîria,
kaingo tûtûûra amwe n'we.
3 Ga tûgerie na inya mûno tûmenye Mwathani.
Twîrutanîrie mûno kûmûmenya.
N'ûntû kûûya gwake gûtirî ntîîri,
nwa ta bûra riûa riumaga rûkîîrî.
Na mma akaaya wa ta mbura ya nthano,
kana mbura ya mûratho.”
4 Îndî Mwathani n'we aûria:
Biû Isiraeri bûrîenda mbûrûtha ata?
Naabi Njunda bûrîenda mbûrûtha ata?
N'ûntû wendo bwenu kîrî niû i ta bûtarî oogo,
bûthiraga ta ngooki ya rûkîîrî bûra îthiraga,
kana maame bûra maûrûrûkaga.
5 Bûbu i bu bwatûma ntûma iroria biakwa,
na ntûmwa ya kûbûgiitîra îgamba na kûbûthiria.
Îgamba rîakwa tiriithe i bûûrîîni rîrî.
6 N'ûntû kîra mbeendaga i kîaoa na ti igongwana,
na nkeenda bûûmenya nkûrûki ya kûûndutîra igongwana bia kûbîîthua.
7 Îndî antû ibeenyangiirie kîrîîkanîro
wa ta bûra Andamu aarûthire,
baatuîka t'etîgua kîrî niû.
8 Taûni ya Ngiriandi yûûyûri antû baathûûku,
yûûyûri antû beekinyaangîîte na meeyia ma kûûragana.
9 Wa ta bûra mîkora îmaamagîîra yeteereete muntû,
nwa ta bu ikundi bia athînjîri ba Ngai birûthaga.
Îbaûragagîra barabaraani ya kûthi Sekemu,
bakarûtha meeyia ma mîthemba yonthe.
10 I mboneete mantû maathûûku mûno Isiraeri.
Antû baakwa i beebîkîrîîte mûgiro,
na kûgonga ngai cia mîbuanaano.
11 Na kinya biû, antû ba Njunda,
i mbangîîte îgiita rîa gûcookanîîria.
Warîra ndeenda gûcookanîîria antû baakwa,