Kûgambithua gwa antû ba Isiraeri na Njunda
5
1 Thikîîriani, biû athînjîri ba Ngai.Thikîîriani, biû antû ba Isiraeri,
na biû ba mûciî wa ûnene!
I biû bûkûgiitîrwa îgamba.
I bûtegeete mûtego Tabori,
na bwamba neeti Misipa.
2 Aregi nwaka bakûûragana nkûrûki,
naani nkabaa îkaanûkia bonthe.
3 Eburaimu, gûtirî bwaku ntaiyî,
gûtirî ûntû bwaku buithe kîrî niû,
na ûtirî mwîtîgua,
ûrî na mûgiro.
4 Ngûgî cienu inthûûku itikûbwîtîgîîria
bûcooka kîrî Ngai wenu.
Biû bûrî marwaya maaî,
na bûtiûmba kûmenya Mwathani.
5 Wîkumia bwaku woû Isiraeri ibûgûkûûyîîra wîyia bwaku,
na wîyia bûbû bwaku bûgaatûma ûgwa.
Wana kinya Njunda akaagwîyanîria naawe.
6 Bakaathi na ng'ondu na ng'ombe ciao
kûrutîra Mwathani kîgongwana
na batimwona,
n'ûntû n'abatigîîte bonka.
7 Bo t'antû eetîgua kîrî Mwathani,
aana baao baagîîre nabo na njîra ya ûmaraaya.
Kwoogu îîndî bo amwe na mînda yao bakaathirua.
8 Ringaani kagoci ka mbu Ngibea,
na bûkaringe Rama.
Buugithie mbu Bethi-Abeni,
biû antû arûme ba Benjameni, îîmenyeeni!
9 Ntugû înu ya îkaanûkia,
Eburaimu îkeenyangua.
Antû ba Isiraeri bûmenye ata rî,
na mma mantû mama nwa magaatuîkîka!
10 Atongoria ba Njunda bathûûkîîte
ta antû bara bathiyangagia mwanka
kwoogu nkabeetûûrîria îkaanûkia na mûthûûro
ta rûûyî rwa mûguû.
11 Antû ba Eburaimu bakaathoontorua
na baunangwe i bûra nkaabatuîra îgamba
n'ûntû bwa kûgonga mîbuanaano.
12 Kwoogu Mwathani ariuga nkaûyûria Eburaimu maginyo
na ntûme Njunda îrîîgwa i wooru.
13 Rîra Eburaimu boonire bûra baayîîtue,
na rîra Njunda oonire ironda biake,
i rîo Eburaimu aathiire Asîîria
kîrî mûnene ûra mûnene akîendaga ûteethio.
Îndî amwe na ûgu gûtirî bu akîbateethia,
abooria ironda biao.
14 Nkaumbuthûkania na antû ba Eburaimu ta cimba,
na mbumbuthûkanie na Njunda ta cimba îrî na inya.
Niû ningwa nkabateembûranga tûcuncî tûcuncî.
Nkaabaugia cau mbakururie nthi nabo,
na gûtirî nwa ûmwe akaûmba kûbatuunyûkia.
15 Rîru ncooke gîkarooni gîakwa
mwanka rîra bakaumbûra mabîtia maao na baancûe.
Kûnyamaaraani kwao bagaancûa nainya.