Mwathani arî na îgamba na Aisiraeri
4
1 Thikîîriani bûra Mwathani akuuga, biû antû ba Isiraeri.Ariuga arî na îgamba naabi,
n'ûntû antû ba nthîgûrû îno batiathîkagîra maathana maakwa
kana baamenya bwega.
2 Ngûgî yenu i kûrîrîkana, kûrongoa, kûûragana
kwiya na ûthûngîîri,
ndûa na kûûragana gûtakûthira.
3 Na n'ûntû bwoogu, i kîo nthîgûrû yenu îkûûma ng'û,
na bira birî ku bikaathira.
Nyamû cionthe na nyoni cionthe
wana kinya makûyû, imakaathira.
Mwathani arî na Îgamba na Athînjîri ba Ngai
4 Mwathani ariuga ata rî,
“Gûtikaagîte muntû ûkooroota ûra ûngî na kaara,
kana amuuna mûtî,
n'ûntû i niû nkûbûgambithia biû athînjîri.
5 Bûtarataraga mûthenya na ûtugû,
na kinya iroria nwabu bitarataraga.
Kwoogu bwenyangia
antû beenu.a
6 Antû baakwa bakûthira n'ûntû bwa kwaga ûmenyo.
Na n'ûntû i bûregeete ûmenyo,
naani ntiîtîgîîria bwîgua bûrî athînjîri baakwa.
N'ûntû i bûregeete watho bwakwa,
naani ngaatiganîria aana beenu.
7 Wa bûra athînjîri bakuingîa,
nwabu bakûthi na mbere na kûmbîyia.
I bagarûranîîtie ûkumio bwatuîka îgi.
8 Bûrîîyaga kuumania na igongwana bira antû baakwa barutaga n'ûntû bwa meeyia,
kwoogu nwaka bûgûkeneera bakîthi na mbere kwîyia.
9 Bûra nkaarûthîra athînjîri nwabu nkaarûthîra antû,
nkabakaanûkia kûringana na meeyia maao.
Na nkabarîia moothûûku maao.
10 Wana bwarîa igongwana bibu,
bûtiibaa.
Wana bwaringa ûmaraaya nyomba ya ngai cia mîbuanaano.b
Bûtiigîa na twana,
n'ûntû i bwantiganîîrie
bwathingata ngai ciingî.
11 Ncoobi na ûmaraaya
i birigicanîîtie antû baakwa mathûgaania maao.
12 Barombaga ûkûrû kuuma kîrî nduungu ya mûtî,
kathanju kaûmba kûbeera mantû mara bakwenda kûmenya?
Kîrundu kîa ûmaraaya kîabatongoreerie bauma kîrî Ngai wao,
baantiganîîrie baathi kîrî ngai ciingî.
13 Nabo barutagîra ngai ciao igongwana irîmaani kûra îgûrû kathûmbîri,
na bageetia îgûrû tûrîmaani bakarutîra biewa ku.
Ruungu rwa mîtî ta mîpuru na mîtî îîngî ta înu,
bagakara mûgunyeeni ûmûthongi.
Gîku i kîo gîatûmire aarî beenu batuîka marwaya
na aka ba aana nabo baatuîka athûngîîri.
14 Amwe na ûgu ntiikaanûkia aarî beenu,
na aka baana beenu baathûûngîîra,
n'ûntû biû bwingwa antû arûme bûthingatanaga na marwaya
nyomba ya ngai cia mîbuanaano
na bûkaruta igongwana nabo.
Biû bûrî antû biaa
na bûkaathirua n'ûntû bwa kûrega kwerewa.
15 Kinya ûkeegua biû antû ba Isiraeri bûrî athûngîîri,
antû ba Njunda batikaagwe meeyiani ta mamu.
Batikaathi Girigari kana Bethi-Abeni,c
baaya kûgwatana na bara bathiîtagia na riîtwani rîa Mwathani.
16 Antû ba Isiraeri baûmîîte biongo mûno ta moori îmbaabûku.
N'ata Mwathani aûmba kûbamenyeera,
banyagaarîîte ta ng'ondu ngûndûûni.
17 Antû ba Eburaimu bagwatanîîte na mantû ma mîbuanaano.
Rekanaani nabo bathi bûra bakaathi.
18 Bakarîîkia kûnyua ncoobi,
nwa bathiire kûrûtha mantû ma ûmaraaya.
Beendeete mantû ma îgi,
nkûrûki ya kwenda mantû ma gîtîîyo.
19 Kwoogu bagakûmbanua bakamatwe i kîbuubani kîînene,
na igongwana biao bikabaira îgi.”