Kîoneki kîa biîrî kîa Esekieri
8
1 Ntugû ya itaano, mweri wa îthanthatû, mwanka wa îthanthatû, rîra ndaakari nyomba yakwa na akûrû ba Njunda bakari mbere yakwa, inya ya Mwathani Mwene Inya yambûyîîra agu. 2 Ndaaraitha ndoona gîntû kîabuananaga na muntû. Kuuma kauna kwîndama bwa iti gwakari ta mwanki, na kuuma kauna gwîtia gwakengakengaga ta rûthuku. 3 Aatambûrûkia gîntû gîakari ta njara na gûnkuuyia ntundu ciakwa. Kîrundu ûmûtheru ambûkîîria gatîgatî ka îgûrû na nthî, kîonekiini kîra Ngai aamboniirie mwanka Njerusaremu. Ndairirwe bwa mûthûngîîro wa mwîrîga mbarî ya neegûrû ya kîarago kîa ndeeni, ara kwaigîîtwe mûbuanaano ûra watûmaga Ngai eegua rûriitho. 4 Na agu mbere yakwa i kwarî na ûkumio bwa Mwathani wa Isiraeri, wa ta kîonekiini kîra ndooneete kîbondeeni.5 Mwathani ambîîra, “Mwana wa muntû, raitha mbarî ya neegûrû.” Ndaaraitha na mûthûngîîro wa neegûrû wa mwîrîga wa kîthînjîro, ndoona mûbuanaano ûyu ûreetaga rûriitho.
6 Ambîîra, “Mwana wa muntû, n'ûkwona bûra bakûrûtha? N'ûkwona meeyia marî njici mara antû ba Isiraeri bakûrûtha makûndutaruta nyomba yakwa? Îndî ûkoona meeyia maanene nkûrûki ya mama!”
7 Rîru andeeta mwîrîgaani wa kîarago. Ndaaraitha, ndoona mûrinya rûthingooni. 8 Ambîîra, “Mwana wa muntû, tûra njîra rûthingooni rûrû.” Kwoogu ndarutûra na ndoona mwîrîga.
9 Ambîîra, “Thûngîra ndeeni wone mantû maathûûku na meeyia marî njici mara bakûrûtha ku.” 10 Kwoogu ndaathûngîra na ndaaraithîîria, ndoona rûthingo runthe rûcooreetwe mîthemba yonthe ya tûnyamû tûra twîkururagia na nyamû ciingî ira irî mûgiro. Na ndoona mîthemba yonthe ya mîbuanaano îra yagongagwa n'antû ba Isiraeri. 11 Mbere ya mîbuanaano înu, i kwarî na akûrû mîrongo mûgwanja ba kuuma Isiraeri, na Njaasania mwana wa Safani aarûngi gatîgatî kaao. Wora ûmwe n'aagwete kabakûri kara kaabîîthagîrua macoco njaraani na mûruke wa ntoogo ya macoco weetagia bwa îgûrû.
12 Rîru Mwathani ambîîra, “Mwana wa muntû, n'ûkwona bûra akûrû ba Isiraeri bakûrûtha na mîbuanaano yao mwinduuni, wora ûmwe nyomba yake ya mîbuanaano? Barîthûgaania, ‘Mwathani atigûtwona, Mwathani n'atiganîrîîtie nthîgûrû.’ ” 13 Kaîrî auga, “Ûkoona barûthîîte meeyia marî njici manene nkûrûki ya mama.”
14 Kwoogu aambira bwa mwîrîga wa neegûrû wa Nyomba ya Mwathani, na ndoona eekûrû bakari nthîgûrû oogo, bakîrîraga n'ûntû bwa gîkuû kîa ngai Tamusi.a 15 Ambûûria, “Ûkwona bûbû mwana wa muntû? Ûkoona meeyia marî njici manene nkûrûki ya mama!”
16 Rîru aambira kîaragooni kîa ndeeni ya Nyomba ya Ngai. Mûthûngîîrooni wa Nyomba ya Ngai, gatîgatî ka rwembea na kîthînjîro i kwarî na antû ta mîrongo îîrî na bataano ûgu, baûndûkîrîîtie Nyomba ya Mwathani mûgongo. Baarûûngi bacûûbîîte bwa rûteere rwa uumîîro bwa riûa, bakîgongaga riûa.
17 Ambûûria, “Ûkwona bûbû mwana wa muntû? Ka bûtarî ûntû bûûthûûku bwa kûgana antû ba Njunda kûrûtha meeyia mama monthe aaga? Nwa mwanka bathi na mbere na kûnyamaaria nthîgûrû îno na kûnthûûria nkûrûki? Ta baraithe wone bakiira mathangû akubî na nyiûrû ciao!b 18 N'ûntû bwa ûgu, nkabakaanûkia na mûthûûro, ntibeegîîrua kîao kana mbacaamîra. Wana bambugîîria matûûni, ntibathikîîria.”