Mûthia wa Isiraeri ûrî akubî
7
1 Mwathani aaria naani ambîîra, 2 “Mwana wa muntû, ûûgû i bu Mwathani Mwene Inya akwîra nthîgûrû ya Isiraeri, i mûthia! Mûthia ûkûûyîîra koona irî inya cia Isiraeri. 3 Mûthia îîndî ûrî akubî, naani nkoonania mûthûûro wakwa kîrî biû. Nkabûgiitîra îgamba kûringana na mîkarîre yenu na mbûrîe n'ûntû bwa meeyia marî njici mara bwarûthire. 4 Ntibûraitha na kîao kana mbûcaamîra. Nkabûrea kûringana na mîtugo yenu na meeyia marî njici mara bûrî namo. Rîru bûkaamenya niû ndî Mwathani.5 “Ûûgû i bu Mwathani Mwene Inya akuuga: Kînyamaara, kînyamaara kîînene i kîîyîîte. 6 Mûthia ûgûkinya! Mûthia ûgûkinya! Na mma ûgûkinya! Ûkûûya! 7 Kînyamaara gîkûbûûyîîra, biû atûûri ba nthîgûrû îno. Îgiita rîgûkinya, ntugû îrî akubî, rîra ûkeegua gûtakîîgua kûrî na gûkûngwîra irîmaani i kîrigicano. 8 Ndî akubî gwîtûûra mûthûûro wakwa na marûrû kîrî biû na ntûmîre mûthûûro wakwa îgûrû rîenu. Nkabûgiitîra îgamba kûringana na mîkarîre yenu na mbûrîe n'ûntû bwa meeyia meenu marî njici. 9 Ntibwîgîîrua kîao kana mbûcaamîra. Nkabûrea kûringana na mîtugo na meeyia meenu marî njici. Rîru bûkaamenya i niû Mwathani nkûbûkaanûkia.
10 “Ntugû îrî akubî, ntugû îgûkinya! Ntugû ya mûthiro n'îyîîte, kwînyangua gwaku igûgwetereete! Ûthûûku bûûyûri bantû onthe na wîkumia i bûkûrûkîîtie nceno. 11 Ûgîti bwao bûkaabacookera ta îkaanûkia n'ûntû bwa mantû maao maathûûku. Gûtirî muntû nwa ûmwe agaatigara. Ûtonga bwao bunthe bûkaathira. 12 Kagiita gakûûya, na ntugû îgûkinya. Mûgûri atigaakene na mwendia atikeegue arî na kîîthikîîro, n'ûntû mûthûûro ûkeegua ûrî kîrî kîrîndî kîonthe. 13 Mwendia ationa kîthaka kîra eendiirie kaîrî, wana wegua mwendia na mûgûri barî mwoyo,a n'ûntû kîoneki gîkî n'îgûrû rîa antû bonthe na gîtiigarûrwa. Na n'ûntû bwa meeyia maao, gûtirî we agaatigwa arî na inya. 14 Wana kinya rûgoci rûkaringwa na bonthe bakeethuuranîra, gûtirî nwa ûmwe akaathi ndûani, n'ûntû mûthûûro wakwa ûrî kîrî antû bonthe.
15 “Ome kûrî na rûûyiû, ndeeni kûrî na mûrimo na yûûra, nabo bara barî kîthakaani bakaûragwa na rûûyiû na bara barî taûni baûragwe i mûrimo na yûûra. 16 Bara bakoonokera ciarera bakaugia irîmaani, ta macea mara meengatîîtue kuuma kîbondeeni bonthe bakaarîra, n'ûntû bwa meeyia maao. 17 Njara cia wora ûmwe ikaathira inya na maru marindare n'ûguaya. 18 Bageekîra nguo cia nkunia, bamake mûno. Moothiû maao makaûyûrwa i nthoni na biongo biao bikeenjwa. 19 Bagaata fetha ciao barabaraani na thaabu nacio îkare ta gîntû gîtarî kîtheru. Fetha na thaabu ciao itiûmba kûboonokia ntugû ya mûthûûro wa Mwathani. Batiibaa kana baûyûria nda ciao na thaabu na fetha. Into bibu i bio bitûmîîte bagwa meeyiani. 20 Beekumagia n'ûntû bwa into biao bia kwîthongamia na babitûmîra kûrûtha mîbuanaano îra yarî mûgiro mûno na into bia îgi. Kwoogu, ngaatuîkithia bibu bionthe into bitarî mûgiro mbere yao. 21 Nkaarekeeria ûtonga bwao bunthe bûtaîgwe i mîgongo na antû bara bathûûku nabo bakabûgwatithia mûgiro. 22 Nkaitha ûthiû bwakwa kûûma kîrî bo, na bagaaka bantû aakwa ara atheru mûgiro, aamba bakaathûngîra ku na baguake mûgiro.
23 “Rûthîra antû baakwa nyororo, n'ûntû nthîgûrû yûûyûri gwîtûûra nthakame na taûni yûûyûri bitina. 24 Nkaareeta antû ba mîgongo îra mîthûûku mûno bathûkie nyomba ciao. Nkaathiria wîkumia bwa bara barî inya na bantû aao a kûgongerwa ageekîrwa mûgiro. 25 Kîmako kîaya, bagaaceria thîîrî na îtionekana. 26 Bakoona kînyamaara nyuma ya kîra kîngî, na ntheto inthûûku ithingateene. Bakaageria kûgwata kîoneki kuuma kîrî iroria îndî batikîona. Athînjîri ba Ngai batiîgua barî na ûntû bwa kûthoomithia, na akûrû batiîgua barî na ûkûrû bwa kweyana. 27 Mûnene akaarîra, mûtongoria athire mwîrîgîîro, na antû bakainaina n'ûguaya. Nkabakaanûkia kûringana na mîkarîre yao na mbagiitîre îgamba wa ta bûra baagiitîîre bara bangî. Rîru i rîo bakaamenya i niû Mwathani.”