Ûroria îgûrû rîa irîma bia Isiraeri
6
1 Mwathani aaria naani ambîîra, 2 “Mwana wa muntû, raitha mbarî ya irîma bia Isiraeri ûbirorerie, 3 ûbiîre ata rî: Biû irîma bia Isiraeri, îguani kiugo kîa Mwathani Mwene Inya. Ûûgû i bu Mwathani Mwene Inya akwîra irîma na tûrîma, tuuro na ibonde, ndî akubî kûbûreetera ndûa, na nkeenyangia gûntû kwenu kûra gûûkîîru. 4 Ithînjîro bienu bikomboranua na ithînjîro bienu bia kûbîîthîria macoco bikaathûûkaangua na nkaûragîra antû baaku mbere ya meetho ma mîbuanaano yenu. 5 Ngaatungumania ntungu cia antû ba Isiraeri mbere ya mîbuanaano yao, na nyagaarie mîîndî yao kûthiûrûkîîria ithînjîro bienu. 6 Kûra kunthe bûgaatûûra, taûni ikaathûûkaangua na bantû ara agongagîrwa ngai cia mîbuanaano oomboranue kaingo ithînjîro bienu biînyangua, mîbuanaano yenu îkaunangwa na îînyangue, ithînjîro bia kûbîîthîria macoco bikomboranua, into bionthe bira bûrûthîîte bithire. 7 Antû beenu bakaagwa gatîgatî keenu barî baûrage, na bûkaamenya niû ndî Mwathani.8 “Îndî ngaatigaria bamwe, n'ûntû bamwe beenu bagaakuthûka rûûyiû bwanyagaarua gatîgatî ka nthîgûrû na mîgongo. 9 Bara bakoonoka bakaandirikana gatîgatî ka mîgongo naara ûkeegua bairîîtwe ûkombooni. Bakaaririkana bûra ndaarî na kîeba n'ûntû bwa bûra nkoro ciao ciaûyûri ûthûngîîri na meetho maao maûyûri meerirîria ma ngai cia mîbuanaano. Rîru bakeemena bongwa n'ûntû bwa meeyia maao marî njici mara barûthîîte. 10 Bakaamenya atî niû ndî Mwathani, na ntaarî na mathee nkîbeera atî kînyamaara gîkî kîonthe gîkabaayîîra.”
11 Ûûgû i bu Mwathani Mwene Inya akuuga, “Riinga mpî, ringithia mbayo ciaku nthî, uuge, irû! N'ûntû bwa meeyia marî njici mara antû ba Isiraeri barûthîîte. Îîndî bathiîte gûkua kuumania na ndûa, yûûra na mûrimo. 12 Mûrimo ûkaagwata bara bakeegua barî kûraaya, na bara bakeegua barî gûkubî bakue n'ûntû bwa ndûa, na ûra akaamonyoka agu, agaakua i yûûra. Ûûgû i bu nkoonania mûthûûro wakwa îgûrû rîao. 13 Rîra ntungu cia antû ikaamaama inyageere gatîgatî ka mîbuanaano na kûthiûrûkîîra ithînjîro biao, îgûrû rîa irîma na tûrîma, ruungu rwa mîtî îrî na mûgunye, ruungu rwa mîpuru ara babîîthagîria ngai ciao macoco, rîru bûkaamenya atî i niû Mwathani. 14 Naani ngaatambûrûkia njara yakwa na ntuîkithie taûni ciao maganjo kuuma rwanda mbarî ya iti mwanka Ribura mbarî ya neegûrû. Rîru bakaamenya atî i niû Mwathani.”