Esekia eenja ntundu ciake
5
1 “Îîndî, mwana wa muntû, thûkia rûûyiû rûûgî na ûrutûmîre ta kîenji kîa mwenjani wîbenje nakîo kîongo na kîreru gîaku. Ûtûmîre kîthimi kûthima ntundu inu ûcigaanîîtie maita mathatû. 2 Ntugû cia kwithûkîrwa kwa Njerusaremu ciathira, ûbîîthîrie gîcuncî kîmwe kîa bîra bithatû taûni ndeeni. Gîcuncî kîngî kîmwe ûgiitange na rûûyiû ûkîthiûrûkaga taûni. Gîcuncî kîa mûthia, ûnyagaarie ruuoni. N'ûntû ngaacomora rûûyiû rwakwa mbîîngane nacio. 3 Thûkia ntundu imwe inkai ûciogeere nguoni ciaku. 4 Kaîrî, ûthûkie ciingî inkai ûcigere mwankiini ûcibîîthie. Mwanki ûyu ûgaataamba kuuma agu mwanka kîrî antû bonthe ba Isiraeri.5 “Ûûgû i bu Mwathani Mwene Inya akuuga, îno i Njerusaremu, mîgaigîîte gatîgatî ka mîgongo, na nthîgûrû imîthiûrûkîrîîte. 6 Îndî n'ûntû bwa ûthûûku bwake n'aregeete kwathîkîra mawatho na mawîrane maakwa nkûrûki ya mîgongo na nthî îra icithiûrûkîrîîte. Antû ba Njerusaremu i bareganîîte na mawatho maakwa na batithingatîîte bûra mbaathîîte.
7 “Kwoogu, ûûgû i bu Mwathani Mwene Inya akuuga, biû i bûreganîîte naani nkûrûki ya mîgongo yonthe îra îbûthiûrûkîrîîte na bûtaathîkîra mawatho kana mawîrane maakwa wana kinya bûtikûûmba kûrûtha kûringana na mîkarîre ya mîgongo îra îbûthiûrûkîrîîte.a
8 “Kwoogu ûûgû i bu Mwathani Mwene Inya akuuga, niû ningwa ndî mûnthû wenu. Nkabûneenkera îkaanûkia mîgongo îra îîngî îkîonaga. 9 N'ûntû bwa meeyia marî îgi mara bûrûthaga mmeneete, nkabûrûthîra bûra ntaaro ndûtha kaîrî na ntikaaro mburûtha kaîrî. 10 Kwoogu aciari bakaarîa aana baao, na aana nabo barîe beethe baao. Nkabûneenkera îkaanûkia na bara bacienu bagaatigwa barî mwoyo mbanyagaarie nteere cionthe. 11 Kwoogu wa ta bûra ntûûraga mwoyo, i bu Mwathani Mwene Inya akuuga, n'ûntû bwa gwîkîra bantû aakwa atheru mûgiro na into na meeyia meenu marî njici, na mma nkabwenja na ntibûraitha na kîao kana mbûtigîîra. 12 Gîcuncî kîmwe kîa bithatû gîa antû baaku bagaakuîra taûni inu n'ûntû bwa yûûra na mûrimo. Gîcuncî kîngî kîmwe kîa bithatû gîkaûragwa na rûûyiû ome ya nthingo cia taûni. Na gîcuncî gîku kîngî kîa bithatû nkînyagaarie nteere cionthe na mbîîngane nabo na rûûyiû.
13 “Rîru, mûthûûro wakwa ûkaathira na marûrû maakwa kîrî bo mathire, naani ûkeegua nkûrîithia. Rîra mantû mamu magaakarîka bûkaamenya na mma atî niû Mwathani, ndîaria naabi n'ûntû ndî na mûthûûro n'ûntû bwa kûrega gwîtîgîka kwenu.
14 “Kwoogu ngagûtuîkithia îganjo na gîntû gîa kûthekagîîrwa gatîgatî ka mîgongo îra îkûthiûrûkîrîîte, na antû bara bonthe bagûkûrûkîîra akubî naawe. 15 Ûkeegua ûrî gîntû gîa kûmeneerua na kîa îgi, ngerekano na gîntû gîa kûmakania kîrî mîgongo yonthe rîra ngaagûkaanûkia na mûthûûro, marûrû na gûkûgondokera kûûnene. I niû Mwathani nkuuga. 16 Rîra nkaabûratha na mîgwî yakwa îmîthûûku ya yûûra, nkaabûratha kaingo mbwînyangia. Nkoongeera yûûra na ntûme bwaga biakûrîa. 17 Ngagûtûmîra yûûra na nyamû cia kîthaka kûûraga aana baaku. Mûrimo na gîkuû bikaaya gûkûnyamaaria na ngaatûma bwithûkîrwa na rûûyiû. I niû Mwathani ndauga ûgu.”