4
1 “Na woû mwana wa muntû, thûkia îtubaarî, ûriige mbere yaku na ûrîcoore taûni ya Njerusaremu. 2 Rîru wîthuuranîre kwithûkîra îtubaarî rîru taka rîrî taûni yongwa. Ûrûthe ithûmba bia mûthetu îgûrû rîarîo na ûthiûrûûkîrie îtubaarî rîru na kambî cia anthû. Na wa rûra rûteere rwarîo waigîîre itugî bia mîtî ûgîkaraga taka ûkwenda kûbunjia mîrango ya taûni înu. 3 Rîru ûthûkie karaî ga cuuma ûkarûngamie ta rûthiingo rwa cuuma gatîgatî gaaku na taûni na ûmîraithe ûboonie bûra mûnthû akaithûkîra Njerusaremu. Rûru rûkeegua rûrî rwano kîrî antû ba Isiraeri.4 “Rîru, ûthi ûmaame na njara yaku ya ûmotho na ûkamate meeyia ma Isiraeri yonthe. N'ûntû ntugû ira ûgaakara ûmaami na rwaru, ûkeegua ûkamatîîte meeyia maao. 5 Nkûbaangîrîîte ntugû iganeene na mîanka ya meeyia maao. Kwoogu, bantû a ntugû magana mathatû ma mîrongo kenda ûgaakamata meeyia ma antû ba Isiraeri.
6 “Warîîkia ûgu, ûgarûke ûmaame na njara ya ûrîo, na ûkamate meeyia ma antû ba Njunda. Ndakûbangîra ntugû mîrongo îna, ntugû îmwe kûrûngamîîra mwanka ûmwe. 7 Ûndûkîra Njerusaremu îra iithûkîrîîtwe na ûtambûrûkie njara yaku îtarî nkunîkîre na ûbarorerie. 8 Ngakwoga na mîkanda kaingo ûtagarûka kuuma mbarî îmwe mwanka îra îîngî mwanka rîra ûkaarîîkia ntugû cia kwonania kwithûkîrwa kwa Njerusaremu.
9 “Îndî, thûkia ngano, sayiri, mbooco, nthoroko, mwere na kûcemethû, ûbiîkîre bionthe nyûngûûni îmwe, wîrugîre mûgaate. Ûkaurîa kagiita kara ga ntugû magana mathatû ma mîrongo kenda kara ûkeegua ûmaami na rwaru. 10 Irio bira ûkaarîîyaga bikaathimagwa, sekeri mîrongo îîrî wa ntugû îmwe, na ûkaabirîa kagiita kaabio. 11 Na ûkaanyuunyaga rûûyî rûûthime, ikombe biîrî wa ntugû gwa kagiita kaaru. 12 Ûrîe irio bibu ta bûra ûrîa keki ya sayiri. Nwa mwanka ûbirugîre mbere ya antû na mwanki ûbuîtwe na manea ma mai ma muntû.” 13 Mwathani auga, “Ûgu i bu Aisiraeri bakaarîa irio birî na mûgiro gatîgatî ka mîgongo naara nkaabeengîîria.”
14 Ndamwîra, “Arî Mwathani Mwene Inya! Niû nteebaka mûgiro. Kuuma waana bwakwa ntaarîa nyama ya nyamû înkuû kana yûûragîîtwe i nyamû cia kîthaka. Gûtirî nyama itarî ntheru ciakûrûkîîra kanyuani gaakwa.”
15 Mwathani aancookeria ambîîra, “I bwega. Ngagwîtîgîîria ûtûmîre mai ma ng'ombe bantû a ma muntû kûbua mwanki wa kûruga mûgaate.”