3
1 Ambîîra, “Mwana wa muntû, îrîa kîra kîrî mbere yaku. Îrîa îbuku rîrî, rîru ûthi warîrie antû ba Isiraeri.” 2 Ndaatîka, aaneenkera îbuku ndîa. 3 Ambîîra, “Mwana wa muntû, îrîa îbuku rîrî ngûkûnenkera ûbae.” Kwoogu ndaarîria. Narîo rîarî na mûrîo ta ûkî.4 Rîru ambîîra, “Mwana wa muntû, îthi kîrî antû ba Isiraeri na ûbeere mîgambo yakwa. 5 Ntigûgûtûma kîrî antû bara barî na ndwaria i imbûmo ira ûtaiyî, îndî ndîgûtûma kîrî antû ba Isiraeri, 6 ntigûgûtûma kîrî mîgongo îra ndwaria ciao irî mbûmo kana nthiomi ciao iteereeka. Ûkeegua ngûtûmîîte kîrî bo bakûthikîîria. 7 Îndî antû ba Isiraeri batienda gûkûthikîîria n'ûntû batikwenda kûnthikîîria, n'ûntû bonthe i baaremu na i baûmo biongo. 8 Îndî nkaûmia nkoro na kîongo gîaku wa ta ûgu biao biûmîîte. 9 Nkaûmia kîongo gîaku ta iiga, nkîûmie nkûrûki ya cuuma. Ûtikaabakuthûke kana ûmakua i moothiû maao, n'ûntû n'aakararia.”
10 Ambîîra, “Mwana wa muntû, thikîîria bwega mîgambo yakwa yonthe na ûmîîkîre nkorooni yaku. 11 Îthi kîrî antû ba nthîgûrû yaku bara barî ûkombooni na ûbeere, ‘Ûûgû i bu Mwathani Mwene Inya akuuga!’ Beere wana wegua bagakûthikîîria kana batikûthikîîria.”
12 Rîru Kîrundu ambûkîîria îgûrû, na ndeegua nyuma yakwa kayû kaanene gakiugaga, ûkumio bwa Mwathani bûkaathagwe gûku îgûrû ara atûûraga. 13 Ndeegua mathabu ma biûmbe makîringana, na gîtuma kîa nthigû ira ciarî rûteere rwa mathabu, mûrurumo ûmûnene. 14 Kîrundu ambûkîîria ambira kûraaya, naani ndaathi ndî na marûrû na mûthûûro nkorooni yakwa, na inya ya Mwathani îînene n'yarî îgûrû rîakwa. 15 Ndaakinyîîra antû bara baarî ûkombooni, bara baatwîre akubî na muuro wa Kebari naagu Teri-Abibu. Ndaakara nabo gwa kagiita ga ntugû mûgwanja mmakîîte mûno.
Esekieri mûkaria wa antû
(Esek 33:1-9)
16 Nyuma ya ntugû mûgwanja, Mwathani aaria naani ambîîra, 17 “Mwana wa muntû, ngûgûtuîkithia mûkaria wa antû ba Isiraeri. Ûkaathikagîîria biugo bîra ngaakwîraga, naawe ûkathi ûkabakaania bantû akwa. 18 Ndeera muntû ûmûthûûku ‘na mma ûgaakua,’ naawe ûrege kûmûkaania kana kûmwîra atigane na mîtugo îmîthûûku kaingo oonokia mwoyo wake, muntû ûyu agaakua n'ûntû bwa mîtugo yake îmîthûûku, na i woû ûkaagaambithua n'ûntû bwa gîkuû gîake. 19 Îndî ûgakaania muntû ûmûthûûku na arege gûtigana na mîtugo yake îmîthûûku, kana kuuma njîraani ciake inthûûku, agaakua n'ûntû bwa meeyia maake, îndî woû ûkoonokia mwoyo waku. 20 Kaîrî, muntû ûmwagîru akaaya kûgarûka kuuma wagîruuni bwake na akarûtha mantû maathûûku, nkaaya kûmûgeria akagwa, agaakua. Ûkeegua ûtaamûkaania, agaakua n'ûntû bwa meeyia maake. Mantû meega mara arûthîîte matiiririkanwa na ûkaagaambithua n'ûntû bwa gîkuû gîake. 21 Îndî ûgakaania muntû ûmwagîru kûrûtha meeyia na atarûthe meeyia, agaatûûra n'ûntû bwa kûthikîîria nkaanua, na wana kinya woû ûkeegua wîbonokeetie.”
22 Inya ya Mwathani yarî îgûrû rîakwa na ambîîra, “Ûkîîra ûthi kîbondeeni, na nkaaria naawe ûrî noogo.” 23 Kwoogu ndaûkîîra ndaathi kîbondeeni. Ûkumio bwa Mwathani i bwarî agu, ta ûkumio bûra ndooneete akubî na muuro wa Kebari, ndaaturia maru ntiirithîîtie ûthiû nthî.
24 Rîru Kîrundu aaya aanthûngîra na aandûngamia na magûrû maakwa. Aaria naani ambîîra, “Îthi wîbingîre ndeeni ya nyomba yaku. 25 Ûkoogwa na mîkanda kaingo ûtathi ome kîrî antû. 26 Ngaatûma rûrîme rwaku rûgwatane na kathakatha, kaingo ûtaûmba kwaria kana kûbakaania, n'ûntû n'antû baûmo biongo. 27 Îndî rîra ngaakwarîrîa, ngaakunûra kanyua gaaku na ûkabeera, ‘Ûûgû i bu Mwathani Mwene Inya akuuga.’ Ûra akaathikîîria ka athikîîrie na ûra akaarega kûthikîîria akare, n'ûntû i baûmo biongo.