Gwîtwa kwa Esekieri
2
1 Ambîîra, “Mwana wa muntû, rûngama inkwenda kwaria naawe.” 2 Wa akîaragia, Kîrundu wa Mwathani anthûngîra aandûngamia, na ndeegua akîaria naani.3 Ambîîra, “Mwana wa muntû, ga ngûgûtûma kîrî Aisiraeri, antû bara baregeete kûmbathîkîra, bo na biûyûûyû biao ibambûûmîrîîtie biongo kuuma karaaya mwanka îmunthî. 4 Antû bara ngûgûtûma kîrî bo n'antû baûmo biongo na barî na nkoro imbûmo. Îndî ingûgûtûma kîrî bo ûbeere, ‘Ûûgû i bu Mwathani Mwene Inya akuuga.’ 5 Na baathikîîria kana baarega kûthikîîria, n'ûntû n'antû bara bambûûmagîria kîongo, bo bakaamenya kîroria i kîarî amwe nabo. 6 Naawe mwana wa muntû, ûtikaabakuthûke kana ûkuthûka mîgambo yao, ûtikaamake wana wegua ûrî gatîgatî ka mîîgua na thûngûûca. Ûtikaamakue i bûra bakûrûtha n'ûntû i baûmagîria Ngai biongo. 7 Naawe nwa mwanka ûbeere ntûmwa yakwa, bathikîîrie kana barege kûthikîîria n'ûntû i baûmagîria Ngai biongo. 8 Îndî woû, mwana wa muntû, thikîîria bûra ngûkwîra. Ûtikaûmîrie Ngai kîongo tabo, atîkia kanyua gaaku na ûrîe kîra ngaakûneenkera.”