Esekieri 1

ESEKIERI

Kîoneki kîa mbere gîa Esekieri

(1:1-7:27)

1 Kûrî ntugû ya itaano ya mweri wa îna, mwanka wa mîrongo îthatû ndî amwe na atae kuuma Njerusaremu muurooni wa Kebari, îgûrû rîarugûka na ndoona Ngai na njîra ya kîoneki. 2 Ûntû bûbu bwakarîkire ntugû ya îtaano ya mweri ûyu, mwankaani wa îtaano kuuma mûnene Njeoyakini agûtaîgwa. 3 Mwathani aaria na Esekieri Mûthînjîri wa Ngai, mwana wa Busi, arî agu rûteere rwa muuro wa Kebari nthîgûrû ya Mbabironi na inya ya Mwathani n'yarî îgûrû rîake.

4 Ndaaraitha ndoona kîbuubani kiumîîte mbarî ya neegûrû, na îtu rîînene rîenagia mpeni, rîthiûrûkîrîîtwe i werû bwathararîîtie mûno. Na gatîgatî kaarîo gwakari ta rûthuku rûgwankana mwanki. 5 Na i kwarî na biûmbe bina gatîgatî bira biakari ta antû, 6 îndî wa kîra kîûmbe kîarî na moothiû mana na mathabu mana. 7 Magûrû ma bio maarî maarûngaru, na mbayo ciakari ta ncûûga cia kayaû, ikîenagia ta rûthuku rûûkire bio bionthe i biarî na moothiû na biongo bina. 8 Ruungu rwa wa kîra îthabu i kwarî na njara ciakari ta cia muntû. 9 Mathabu ma wa kîra kîûmbe maatongithagia mathabu ma biûmbe bibu bingî biîrî biarî rûteere, na biathiiyaga bitakûûndûka, wa kîra kîûmba kîathiiyaga wa kîerekeere bûra kîraithîîte.

10 Wa kîra kîûmbe i kîarî na ûthiû ta bwa muntû mbarî ya mbere, ûthiû ta bwa cimba mbarî ya njara ya ûrîo, ûthiû ta bwa kayaû mbarî ya njara ya ûmotho na ûthiû ta bwa ndiiû mbarî ya nyuma. 11 Ûgu i bu moothiû maao maakari. Wa kîra kîûmbe kîarî na mathabu maîrî mara maarî maatambûrûkie, ara wa kîra rîmwe rîaringithîîtie biûmbe bira biarî mwoyo na mara mangî maîrî maakunîkîra mwîrî. 12 Wa kîra kîûmbe kîathiiyaga wa kîerekeere bûra kîraithîîte. Wa ara kîrundu eendaga kûthi i noo biathiiyaga, na biathiiyaga bitakûûndûka. 13 Kwonekana kwa biûmbe bira biarî mwoyo gwakari ta makara ma mwanki kana ta imonjo. Mwanki waumaga ûkathi ûgîcookanagîîria gatîgatî ka biûmbe bira biarî mwoyo, na mwanki ûyu warî na werû bwingî na rweni rwenagia kuuma ku. 14 Biûmbe bibu biathiiyaga na bigacooka na mpwî ta kwenia kwa rweni.

15 Wa ndaithîîte biûmbe bibu birî mwoyo, ndoona nthigû imwe itongithîîtie nthî rûteere rwa wa kîra kîûmbe. 16 Nthigû inu cienagia ta ciarûthîîtwe na iiga rîa goro rîra rîîtagwa kiricorite. Nthigû irî inya ciakari bûmwe, wa îra nthigû yaakari ta nthigû îrî ndeeni ya nthigû îîngî. 17 Rîra nthigû inu ciathiiyaga, ciathiiyaga na mbarî cionthe irî inya itakûgarûka. 18 Mîng'erethe ya nthigû inu yarî îmîraaya na ya kûrigaria, na yaûyûri meetho kûthiûrûkîîria.

19 Rîra biûmbe bibu biathi, nthigû ikathi irî rûteere na rîra biûmbe biaûkîîrua kuuma nthîgûrû, nthigû nacio igaûkîîra. 20 Ara onthe kîrundu aathiiyaga, ka baathiiyaga, na nthigû igaûkîîra amwe nabo, n'ûntû kîrundu wa biûmbe bira birî mwoyo aarî nthigûûni. 21 Biûmbe biakûûria, nthigû nacio igakûûria, biûmbe biarûngama, nacio ikarûgama, na biûmbe biaûkîîra kuuma nthîgûrû nacio igaûkîîra n'ûntû kîrundu wa biûmbe birî mwoyo n'aarî ndeeni ya nthigû.

22 Îgûrû ya biongo bia biûmbe i kwarî na gîntû kîabuananaga na maanganyoni, gîkîyicaga ta mbaraabu na kîarî gîa kûrigaria. 23 Na bwa ruungu rwa maanganyoni mamu, mathabu ma wa kîra kîûmbe maatambûrûkîîtue warîmwe rîerekereete îthabu rîa kîûmbe kîra kîngî, na wa kîra kîûmbe i kîarî na mathabu maîrî makunîkîrîîte mwîrî wakîo. 24 Na rîra biûmbe bibu bithiîte, ndeegua mûrurumo wa mathabu maacio, ûkari ta wa makûmbî ma rûûyî, ta kayû ka Mwene Inya, kana gîtuma kîa njûûrî. Rîra biarûngamire cigî, biendamia mathabu maabio.

25 Rîru kwagîa na kayû kuuma maanganyoni bwa îgûrû ya biongo biabio wa birûûngi na mathabu maabio meendamîîtue. 26 Na îgûrû rîa maanganyoni îgûrû ya biongo biabio i kwarî na gîntû gîakari ta gîtî kîa ûnene kîrûthîîtwe na iiga rîa goro rîra rîîtagwa cabire, na îgûrû mûno rîa gîtî gîku kîa ûnene, i kwarî na mûbuanaano ta wa muntû. 27 Na kuuma ara kwonekaga ta kauna gaake gwîtia gwakari ta rûthuku rûûbîîthie, na taka rûthiûrûkîrîîtwe i mwanki, na kuuma kauna kwîndama oonekaga ta mwanki, na werû bûgûkenga bûmûthiûrûkîrîîte. 28 Wa ta bûra mûkûngambura wonekanaga matuuni ntugû ya mbura, nwa ta bu ûkengu bwamûthiûrûkîrîîte. Ûyu nuu warî mwonekere wa mûbuanaano wa ûtugi bwa Mwathani. Ngûcuona, ndagwa nthî na ûthiû, na ndeegua kayû ta ka muntû gakîaria.