Kûûragwa kwa amaramari
9
1 Ndeegua Mwathani eetana na kayû kaanene akiugaga, “Akaanûkania ba taûni îno i baaye aaga na woora ûmwe aaye na mathaga maake ma kûûragana agwete na njara.” 2 Ndoona antû bathanthatû baayîîte kuuma mbarî ya mwîrîga wa neegûrû wa Nyomba ya Ngai, ûra werekereete mbarî ya neegûrû, woora ûmwe arî na mathaga ma kûûragana njaraani. Gatîgatî kaao, i kwarî na muntû eekîrîîte gatani înthongi na akamatîîte gîa kwandîka acuurîîtie mûcibiini wa kauna. Baayire baarûngama rûteere rwa kîthînjîro kîa rûthuku.3 Rîru ûkumio bwa Ngai wa Isiraeri bwetia kuuma kîrî Akerubi, ara bwarî, na kûthi mûthûngîîrooni wa Nyomba ya Ngai. Na Mwathani eeta muntû ûra eekîrîîte gatani înthongi na aakamatîîte gîntû gîa kwandîka. 4 Amwîra, “Îriûnga taûni ya Njerusaremu yonthe na wîkîre antû maûthiûni maao, bara barî na kîeba na kûrîra n'ûntû bwa meeyia marî njffici mara marûthagwa ku.”
5 Ndeegua Mwathani akîîra bara bangî, “Mûthingateeni na bûûrage antû, bûtikaarekeerie nwa ûmwe kana bûbeegua kîao. 6 Baûrage bonthe, akûrû, aana baîthî, aarî, eekûrû na twana tûniini. Îndî bûtigaatongithie muntû ûra akeethîrwa arî na rwano. Anjîîriani aaga nyomba yakwa.” Kwoogu baanjîîria kûûraga akûrû bara baarî mbarî ya mbere ya Nyomba ya Ngai.
7 Abeera, “Îkîraani Nyomba ya Ngai mûgiro na bûûyûrie kîarago na ntungu! Umagaraani!” Kwoogu baathi baûraga antû taûni. 8 Rîra baûraganaga ndaatigirwe ninka, ndaaturia maru na ûthiû bwakwa bûtiirîîte nthîgûrû, na ndaarîra, “Itû Mwathani Ngai! Ga ûkaathiria matigari ma antû ba Isiraeri monthe, ûkîonania mûthûûro waku îgûrû rîa Njerusaremu?”
9 Aancookeria, “Meeyia ma antû ba Isiraeri na Njunda i maingî mûno nkûrûki. Nthîgûrû yûûyûri gwîtûûrwa kwa nthakame na kwaga ûmma. Barîthûgaania, ‘Mwathani n'atiganîrîîtie nthîgûrû, Mwathani atikwona.’ 10 Kwoogu ntibacaamîra kana mbeegîîrua kîao. Nkabarîia kûringana na ngûgî ciao.”
11 Rîru muntû ûra eekîrîîte gatani na aakamatîîte gintû gîa kwandîka aacooka auga, “Nkûrûtha bunthe bûra ûkûmbathîîte.”