Ûkumio bwa Mwathani bwauma Nyomba ya Ngai
10
1 Ndaaraitha ndoona gîntû gîakari ta gîtî kîa ûnene kîa Cabire îgûrû rîa maanga nyoni mara marî îgûrû rîa biongo bia Makerubi. 2 Mwathani aarîria muntû ûra eekîrîîte nguo ya gatani înthongi amwîra, “Thûngîra gatîgatî ka nthigû inu irî ruungu rwa akerubi. Ûyûria mpî ciaku makara ma mwanki kuuma gatîgatî ga akerubi na ûmanyagaarie taûni yonthe.” Aathûngîra ndeeni wa nkîmwonaga.3 Akerubi baarûngi mbarî ya iti ya Nyomba ya Ngai rîra muntû ûyu aathûngîîre ndeeni îtu rîaûyûra kîarago kîa ndeeni. 4 Ûkumio bwa Mwathani bwetia kuuma kîrî akerubi na kûthi mûthûngîîrooni wa Nyomba ya Ngai. Îtu rîaûyûra Nyomba ya Ngai, na kîarago kîaûyûra kûtharara gwa ûkumio bwa Mwathani. 5 Mûrurumo wa mathabu ma akerubi wegwîkaga kîaragooni kîa ome ya Nyomba ya Ngai, na wegwîkaga ta kayû ka Ngai Mwene Inya.
6 Rîra Mwathani eerire muntû ûra eekîrîîte nguo ya gatani înthongi arûme makara ma mwanki kuuma nthigûûni ira ciarî ruungu rwa akerubi, muntû ûyu athiire na kûrûngama rûteere rwa nthigû îmwe. 7 Ûmwe wa akerubi ataambûrûkia njara yake mwankiini ûra warî gatîgatî kaao, aathûkia makara mamwe na kûmeekîra rwîîni rwa muntû ûra eekîrîîte nguo ya gatani înthongi. Muntû ûyu aathûkia makara mamu na kûthi. 8 Ruungu rwa mathabu ma akerubi i kwarî na gîntû gîakari ta njara ya muntû.
9 Ndaaraitha ndoona nthigû inya rûteere rwa akerubi, nthigû îmwe kîrî wa kîra rûteere rwa kerubi. Nthigû imwe ciakengaga ta iiga rîa goro rîra rîîtagwa kiricorite. 10 Cionthe irî inya cionekanaga ibuaneene, cionekanaga taka nthigû îthûnganîrîîte na nthigû îîngî. 11 Rîra baathiiyaga, baathiiyaga mbarî cionthe irî inya, batakûgarûka bathiîte. Baathiiyaga na njîra wera biongo biao biacûûbaga, batakûûndûka. 12 Mîîrî yao yonthe amwe na mîgongo yao, njara na mathabu maao amwe na nthigû ira inya ciaûyûrîîte meetho mbarî cionthe. 13 Ndeegiirue nthigû inu igîîtwa “Nthigû ira ithiûrûûkaga.” 14 Woora kerubi aarî na moothiû mana, ûthiû bwa mbere bwarî bwa kerubi, bwa ciîrî bwa muntû, bwa ithatû bwa cimba na bwa inya bwarî bwa ndiiû.
15 Akerubi baûkîîra. Bibi i bio biûmbe bira ndooneete akubî na muuro wa Kebari. 16 Akerubi bakûthi, nthigû ira ciathiire rûteere rwao, na akerubi bakwambaaria mathabu maao kaingo baûkîîra kuuma nthîgûrû, nthigû iteenyenya kana ciuma agu rûteere. 17 Akerubi baarûgama, nacio ikarûgama, na akerubi baûkîîra, nacio igaûkanîîria nabo, n'ûntû kîrundu kîa biûmbe bira biarî mwoyo kîarî ndeeni yacio.
18 Rîru ûkumio bwa Mwathani bwauma mûthûngîîrooni wa Nyomba ya Ngai na kûrûngama îgûrû rîa akerubi. 19 Wa ndaithîîte, akerubi baambaaria mathabu maao na baûmbûka kuuma nthîgûrû baathi. Nthigû nacio ciathi irî rûteere rwao. Baarûgamire mûthûngîîrooni wa mwîrîga wa mbarî ya uumîîro bwa riûa wa Nyomba ya Mwathani, na ûkumio bwa Ngai wa Isiraeri bwarî îgûrû rîao.
20 Bibi biari biûmbe bira biarî mwoyo bira ndooneete ruungu rwa Ngai wa Isiraeri muurooni wa Kebari, na i ndaabamenyire baarî akerubi. 21 Wora ûmwe aarî na moothiû mana na mathabu mana, na ruungu rwa mathabu i kwarî na gîntû gîakari ta njara cia muntû. 22 Moothiû maao maabuanene na mara ndooneete muurooni wa Kebari. Wora ûmwe aathiire mbere, warîmwe atakûûndûka.