Kûgambithua gwa atongoria ba Isiraeri
11
1 Kîrundu wa Mwathani ambûkîîria na kûmbira mwîrîgaani wa Nyomba ya Ngai ûra warî mbarî ya uumîîro bwa riûa. Ndoona antû mîrongo îîrî na bataano, amwe na Njaasania mwana wa Asuri na Peratia mwana wa Benaya, bara baarî atongoria ba antû. 2 Mwathani ambîîra, “Mwana wa muntû, baba i bo antû bara bakûbanga mîbango îmîthûûku na kûnenkanîra mataaro maathûûku taûni îno. 3 Bariuga, ‘Gaka i ko kagiita keega ga gwaka nyomba. Taûni îno i ta nyûngû naati i ta nyama.’ 4 Kwoogu, barorerie, woû mwana wa muntû barorerie.”5 Kîrundu wa Mwathani ambûyîîra, ambîîra mbuge, “Ûûgû i bu Mwathani akuuga, ûgu i bu bûkuuga, biû antû ba Isiraeri, îndî inkûmenya mara bûkûthûgaania. 6 I bûûragîîte antû baingî taûni îno na kûûyûria tûyîra twayo na ntungu.
7 “Kwoogu, ûûgû i bu Mwathani Mwene Inya akuuga, ntungu ira bûnyagaarîîtie taûni i cio nyama na taûni îno n'yo nyûngû, îndî nkabûruta taûni înu. 8 Mwathani Mwene Inya ariuga atarî, ibûkuthukîîte ndûûyiû na ndûûyiû nwa cio ikaabwithûkîra. 9 Nkabûruta taûni na mbûnenkanîre njaraani cia ageni na nkabûgambithia. 10 Bûkaûragwa na rûûyiû na nkabûgambithîria mwankaani wa Isiraeri, rîru i rîo bûkaamenya atî i niû Mwathani. 11 Taûni îno îtiîgua îrî nyûngû yenu, kana bwîgua bûrî nyama ku, nkabûgambithîria mwankaani wa Isiraeri, 12 na bûkaamenya atî i niû Mwathani. I bwaregire kûthingata maathana maakwa îndî bwathingata mawatho ma nthîgûrû ira i bûthiûrûkîrîîte.”
13 Wa nkîroragia, Peratia mwana wa Benaya aakua. Ndaaturia maru na ûthiû bwakwa bûtiirîîte nthîgûrû na ndaarîra na kayû kaanene, “Mwathani Mwene Inya, ga ûkaathiria matigari ma Isiraeri cwe?”
14 Mwathani aaria naani ambîîra, 15 “Mwana wa muntû, antû bara baatigarire Njerusaremu barîaria mantû maaku na ma antû ba mûciî wenu, na ma antû bonthe ba Isiraeri bara barî ûkombooni, bakiugaga, ‘Bo barî araaya na Mwathani, kwoogu îîndî, agûtûneenkera nthîgûrû yao.’ ”
Wîrane bwa gûcookua kaîrî kwa Isiraeri
16 Kwoogu ûûgû i bu Mwathani Mwene Inya akuuga, “Wana wegua i ndaabanyagaariirie nthîgûrû cia kûûraaya, nkeegua ndî amwe nabo nthîgûrû ira baathiire kaingo bangoonga.”
17 Niû Mwathani Mwene Inya nkaabwîthîrania kuuma kîrî mîgongo, mbûcookie kuuma nthîgûrû ira bwanyagaariirue, na nkabûcookeria nthîgûrû ya Isiraeri kaîrî.
18 Bagaacooka nthîgûrû yao na bate mîbuanaano, into bionthe biithûûku na mîbuanaano îrî njici. 19 Nkabaneenkera nkoro îmwe na mbeekîre kîrundu waimbia, nkabarutarutîra nkoro ira mbûmo ta maiga na mbaneenkere nkoro cia nyama. 20 Kaingo bakaathîkîra mawatho maakwa, bamathingata na bamarûthe. Bagaatuîka antû baakwa naani ntuîke Ngai wao. 21 Îndî bara nkoro ciao ciîriragîria mîbuanaano îrî mûgiro na meeyia marî njici nkabakaanûkia, na mbarîie kûringana na meeyia maao. I bu Mwathani Mwene Inya akuuga.
22 Akerubi bara baarî na nthigû rûteere rwao bambaaria mathabu maao na ûkumio bwa Ngai wa Isiraeri bwarî îgûrû rîao. 23 Ûkumio bwa Mwathani bwetia kuuma taûni mwanka kîrîmaani mbarî ya uumîîro bwa riûa ya taûni. 24 Kîonekiini, Kîrundu wa Ngai ambûkîîria na gûncookia kîrî atae Mbabironi. Rîru kîoneki kîathira, 25 na ndeera bara baarî ûkombooni mantû monthe mara Mwathani aamboneetie.