12
1 Mwathani aaria naani ambîîra, 2 “Mwana wa muntû, ûtwîre gatîgatî ga antû baûmo biongo. Barî na meetho makwona îndî bationaga, na matû ma kwîgua îndî batiîgagua, n'ûntû n'antû baûmo biongo.”3 “Kwoogu, mwana wa muntû, banga into biaku ta muntû wîngatîîtue auma kwao na wanjîîrie rûgendo mûthenya antû bakîonaga mbere mwindu ûruma. Uma antû bonthe bakîonaga na ûthi bantû aangî. Mbuga bagaaciûkîrwa wana wegua i ndemi. 4 Îthîrania mîrigo yaku kûrî mûthenya bacûûbîîte ta mîrigo ya muntû ûmûtae na uumagarûke ûgoro bagûcûûbîîte ta muntû athiîte ûkombooni. 5 Wa bagûcûûbîîte, îtûra kîrumu rûthingooni rwa nyomba na ûkûrûkîîre oogo na mîrigo yaku. 6 Wîkîre mûrigo waku gîturo wa bagûcûûbîîte na uumagarûke kûrî na mwindu. Îîkunîkîre ûthiû bwaku kaingo ûtoona naara ûthiîte n'ûntû ngûtuîkithîîtie rwano kîrî antû ba Isiraeri.” 7 Kwoogu, ndaarûtha wa bûra ndaathîîtwe. Mûthenya, ndaabanga mîrigo yakwa ta ya muntû athiîte ûkombooni. Ûgoro, ndaatûra kîrumu rûthingooni na njara ciakwa. Ndeekîra mîrigo yakwa gîturo kûrî na mwindu na ndaathi antû bancûûbîîte.
8 Rûûni rûkîîrî, Mwathani aaria naani ambîîra, 9 “Mwana wa muntû, ndemi inu cia Isiraeri itirakûûria bûra ûkûrûtha?”
10 “Beere ûûgû, ‘Mwathani Mwene Inya ariuga ntûmwa îno yîîgiî mûnene wa Njerusaremu na antû bonthe ba Isiraeri bara batwîre oogo.’ 11 Beere ûgu warûtha, i rwano rwa bûra gûgaakarîka kîrî bo. Bagaatuîka ta antû batarî kwao na agwate. 12 Mûnene ûra arî gatîgatî kaao ageekîra mîrigo yake gîturo kûrî na mwindu na atoorookere karumuuni kara bakaamûtûrîra rûthingooni. Agaakunîkîra ûthiû bwake kaingo atoona nthîgûrû îra atigîîte. 13 Îndî ngaakûnjûra neeti îgûrû rîake n'we akaagwatwa i mûtego ûyu wakwa. Nkamwira taûni ya nthîgûrû ya Karindea, na agaakuîra noogo atakûrî akwona nthîgûrû înu. 14 Nkaanyagaaria antû bonthe bara barî akubî nwe, aruti ngûgî baake na njûûrî yake, mbarî cionthe na mbathirie na ndûûyiû.”
15 “Wona ndabanyagaaria gatîgatî ka mîgongo, na nthî i ngeni, bakaamenya atî i niû Mwathani. 16 Îndî ngaatûma baakai batigare kuuma ndûani, yûûraani rîînene, na mîrimooni, kaingo baumbûrîra mîgongo îra îngî meeyia marî njici mara barûthîîte. Rîru bakaamenya atî i niû Mwathani.”
Rwano rwa ûguaya
17 Mwathani aaria naani ambîîra, 18 “Mwana wa muntû, îrîa irio ûkîthetemaga, na ûnyue rûûyî rwaku ûkiinainaga n'ûguaya. 19 Îra antû ba nthîgûrû îno, ûûgû i bu Mwathani Mwene Inya akuuga îgûrû rîa bara batûûraga Njerusaremu na Isiraeri. Bakaarîa irio biao barî na kiinaino kîînene na banyue rûûyî rwao na kîmako, n'ûntû nthîgûrû yao îkeenyangua na îtigwe îtarî gîntû n'ûntû bwa moothûûku ma bara batwîre ku. 20 Taûni ira irî na antû ikeenyangua na nthîgûrû îtuîke maganjo. Rîru, bûkaamenya atî i niû Mwathani.”
21 Mwathani aaria naani ambîîra, 22 “Mwana wa muntû, i njuno mbi îno bûrî n'yo Isiraeri, ‘Ntugû nwaka i kûthi na bioneki bitikûûyûra?’ 23 Kwoogu beere ûûgû i bu Mwathani Mwene Inya akuuga. Nthiîte kûthiria njuno îno, na batikooro bamîgweta Isiraeri kaîrî. Beere, ntugû irî akubî rîra bioneki bionthe bikaûyûrua. 24 N'ûntû gûtiîgua kûrî na bioneki bia ûrongo kana ûroria bwa ûrongo bwa gûkenia antû gatîgatî ga antû ba Isiraeri kaîrî. 25 Îndî niû Mwathani nkabeera bûra nkeenda, na bûkaûyûrua bûtagûkaraanga. N'ûntû kagiitaani keenu, biû ndemi ino, nkaûyûria bunthe bûra nkuuga, i bu Mwathani Mwene Inya akuuga.”
26 Mwathani aaria naani ambîîra, 27 “Mwana wa muntû, Aisiraeri bariuga, ‘Bioneki bira akwona i bia mîanka îmiingî kuuma îîndî, na i biakûroria îgûrû rîa kagiita kaaraaya mûno gakaaya.’ 28 Kwoogu, beere, niû Mwathani Mwene Inya ndiuga, ‘Gûtirî kiugo gîakwa nwa kîmwe gîgaakaranga gîtaûyûrîîte kaîrî, nkaugaga ûntû bûgakarîka. I bu Mwathani Mwene Inya akuuga.’ ”