Iroria bia ûrongo kûgiitîrwa îgamba
13
1 Mwathani aaria naani ambîîra, 2 “Mwana wa muntû, roreria iroria bia Isiraeri bara bakûroria îîndî. Îra bara bakûroria kûringana na bûra bakûthûgaania bongwa, ‘Thikîîriani kiugo kîa Mwathani.’ 3 Ûûgû i bu Mwathani Mwene Inya akuuga: Bûkoona thîîna, biû iroria biitaku, biû bûkûthingata mathûgaania meenu na gûtirî kîo bûkwona. 4 Iroria bienu biû antû ba Isiraeri bikari ta mbwee ira irî guuru ikûrûkagîîra naara kwombokanu. 5 Bûtikaragia naara nthingo ciomokangîîte kana bwaka nthingo ciingî, kwoogu, Aisiraeri batiûmba kûrigîîrua kagiita ka ndûa ntugû ya Mwathani. 6 Bioneki biao i bia ûrongo na mara baroragia monthe i ma ûrongo. Baugaga, ‘I Mwathani akuuga’ na Mwathani atabatûmîîte, naka bageeteera biugo biao biûyûra. 7 Anga t'ûûma atî bwonaga bioneki bia ûrongo na bûkaroria bûkiugaga, ‘Mwathani ariuga,’ wana ntaarîîtie?”8 Kwoogu, ûûgû i bu Mwathani Mwene Inya akuuga, “N'ûntû bwa mîgambo yenu ya ûrongo na bioneki bia kwenanîîria, nkoonana naabi, i bu Mwathani Mwene Inya akuuga. 9 Ndî akubî gûkaanûkia iroria bira bionaga bioneki bia ûrongo na biroragia mantû ma ûrongo. Bitiîthîrwa birî oogo antû baakwa bakîîthîrana kûbanga, mariîtwa maao matiandîkwa mabukuuni ma antû ba Isiraeri, na biticooka nthîgûrû ya Isiraeri. Rîru, bûkaamenya ndî Mwathani Mwene Inya.”
10 “Gîtûmi n'ûntû bûtongoreetie antû baakwa naaî bûkiugaga, ‘Thîîrî’ na gûtarî na thîîrî, na n'ûntû baakaga rûthingo rûtarî na inya bagaaka cokaa. 11 Kwoogu, îra antû babu rûthingo rûru rûkaagwa. Mbura înene îkaura na ntûme mbura ya maiga na kîbuubani kîînene kîîye, na rûthingo rûru rûkoomoka. 12 Rûthingo rwagwa rî, antû batibûûria, ‘Îrî kû cookaa îra bwaakire?’ ”
13 Kwoogu, ûûgû i bu Mwathani Mwene Inya akuuga, “N'ûntû bwa mûthûûro wakwa, ngaatûma kîbuubani kîînene, mbura ya maiga na mbura îînene mûno kwomborania rûthingo rûru. 14 Nkoomborania rûthingo rûru bwakîîte cokaa, na mûcingi waru ûgaatigwa bûûrîîni. Wona rûthingo rûru rwagwa, rûkabûthiria bwinthe, na i rîo bûkaamenya ndî Mwathani. 15 Mûthûûro wakwa unthe nkaathirîria rûthingooni na kîrî bara baarwakire cokaa. Naabi nkabwîra, ‘Rûthingo rûtirî oogo kaîrî, na bara baakire cokaa batirî oogo,’ 16 ûûgû i ta kuuga iroria bia Isiraeri bira biaroragîria Njerusaremu na bakamîonera bioneki bia ûkiri kagiita kara gûtaarî na ûkiri, i bu Mwathani Mwene Inya akuuga.”
17 “Îîndî woû mwana wa muntû, îgarûkîra eekûrû ba Isiraeri bara bakûroria kûringana na mathûgaania maao. Barorerie 18 ûbeere, ûûgû i bu Mwathani Mwene Inya akuuga, bûkoona thîîna biû eekûrû bûgûtuma mînyanjo na itambaa bia biongo bia ithimi mwanya mwanya kaingo bûgwata antû. Ka bûkagwata mîoyo ya antû baakwa îndî bwonokie yenu? 19 I bwambagîîre nthoni antûûni kaingo bûrûmua mpî inkai cia sayiri na tûng'enyûrû twa mûgaate. Bwaûragire antû bara batabatîîrue gûkua na bwatigaria bara batabatîîrue gûtigwa mwoyo, na ûrongo bwenu bûra bwîraga antû baakwa, nabo bageetîgia ûrongo.”
20 Kwoogu ûûgû i bu Mwathani Mwene Inya akuuga, “Inthwîre mînyanjo îra bûkûgwata antû n'yo ta nyoni na nkamîtuîkangia kuuma njaraani cienu. Nkaathaûra bara bûgwete ta nyoni. 21 Ngaatembûraanga itambaa bienu na mbonokie antû baakwa kuuma njaraani cienu, nabo batiikara ta nyamû cia kûgwîmwa kaîrî njaraani cienu. I rîo bûkamenya ndî Mwathani. 22 I bûgiitîîte bara baagîru mwoyo na ûrongo bwenu, rîra niû ntaabagiita mwoyo, na n'ûntû i bwîkîrîte bara barûthaga mantû maathûûku wîru kaingo batatigana namo boonokia mîoyo yao. 23 Kwoogu biû bûtiona bioneki bia ûrongo kaîrî kana bûringia kaîrî. Nkoonokia antû baakwa kuuma njaraani cienu. Rîru i rîo bûkaamenya atî ndî Mwathani.”