Amaramari baagiitîrwa îgamba
14
1 Ntugû îmwe, akûrû bamwe ba Isiraeri baaya kîrî niû na baakara nthîgûrû mbere yakwa. 2 Rîru Mwathani aaria naani ambîîra, 3 “Mwana wa muntû, antû baba i beerekereetie nkoro ciao kîrî ngai cia ûrongo, na bakaiga ngai inu ibatongoragîîria kwîyia mbere yao. Nkabeetîgîîria bambûûrie kîûria? 4 Kwoogu baarîrie na ûbeere, ûûgû i bu Mwathani Mwene Inya akuuga, ‘Mûisiraeri wonthe ûra eerekagîria nkoro yake kîrî ngai cia ûrongo, na eetîgîîrie ngai inu imûtongorie kûrûtha meeyia, na athi kûromba kîroria ûkûrû, niû Mwathani nkamûcookeria kûringana na mûgana wa ngai ciake.’ 5 Nkaarûtha ûûgû kaingo nkuuyia nkoro na mathûgaania ma antû ba Isiraeri, bara bonthe baantiganîrîîtie na njîra ya kûgonga ngai cia ûrongo.”6 Kwoogu îra antû ba Isiraeri, ûûgû i bu Mwathani Mwene Inya akuuga, “Îîrireeni! Ncookeraani na bûtigane na ngai cia ûrongo na mîtugo yenu îrî njici.”
7 “Rîra Mûisiraeri kana mûgeni atûûraga Isiraeri agaantiganîria na kûgonga ngai cia ûrongo, akeebîkîîra kîrigîîria gîa gûtûma eeyia na akathi kîrî kîroria kûmûûria ûkûrû, niû Mwathani nkamûcookeria ningwa. 8 Nkoonana nwe na mmûtuîkithie ngerekano na njuno. Mmûrutarute kuuma kîrî antû baakwa. Rîru i rîo bûkaamenya niû ndî Mwathani.”
9 “Na ûkaaya kwîgua kîroria gîku gîkeeneerua kiuge ûntû, niû Mwathani i niû ûkeegua mbeneereetie kîroria gîku, na ngaakûnjûra njara yakwa, na nkîthirie kiume gatîgatî ga antû baakwa Isiraeri. 10 Bonthe bagaakaanûkua, kîroria na ûra akûûyîîte kûromba ûkûrû bakaagwata îkaanûkia rîmwe. 11 Ûgu i kaingo antû ba Isiraeri batantiganîria kaîrî kana beebaka rûko na meeyia maao. Bagaatuîka antû baakwa, naani Ngai wao, i bu Mwathani Mwene Inya akuuga.”
12 Kiugo kîa Mwathani kîambûyîîra, 13 “Mwana wa muntû, nthîgûrû îkaaya kûrûtha meeyia na îgatuîka ti mbîtîgua kûrû, ngaataambûrûkia njara yakwa mbakaanûkie, na mbînyangie irio biao na ndeete yûûra rîînene ku na mbûrage antû baao na nyamû. 14 Wana wegua antû ta Nuu, Ndanieri, na Ayubu i baarî ku, wagîru bwao bûtikîonokia muntû ûngî tiga bo bonka, i bu Mwathani Mwene Inya akuuga. 15 Î kana î, ngatûma nyamû cia kîthaka ciînyangia nthîgûrû na kûûraga antû, na ngatûma îgîa îbooru na antû bagakuthûka gûkûrûkagîîra ku n'ûntû bwa nyamû inu, 16 wa ta bûra Mwathani atûûraga mwoyo, Mwathani Mwene Inya ariuga, wana ûkîîgiirue antû babu bathatû baarî nthîgûrû înu, batikîûmba kwonokia kinya aana baao. Nwa babu bathatû bakîonokua bonka na nthîgûrû înu îgatigwa îrî îganjo.”
17 “Î kana nkaareeta rûûyiû nthîgûrû înu na kuuga, ‘Ka rûûyiû rûrû rûkûrûkîîre ntûûra îno yonthe’ na nkaûraga antû ba nthîgûrû înu na nyamû, 18 wa ta bûra ntwîre mwoyo, Mwathani Mwene Inya ariuga, wana ûkeegua antû baba bathatû i baarî ku, batikîonokia kinya aana baao. Baayaga kwonoka bonka.”
19 “Kana ngatûma kînyamaara kîa mûrimo ûmûthûûku nthîgûrû înu na n'ûntû bwa mûthûûro wakwa nkaûraga antû bonthe na nyamû ku. 20 Mwathani Mwene Inya ariuga, wa ta bûra ntwîre mwoyo, wana ûkeegua Nuu, Ndanieri, na Ayubu baarî ku, batikîonokia aana baao. Baayaga kwonoka bonka n'ûntû bwa wagîru bwao.”
21 Ûûgû i bu Mwathani Mwene Inya akuuga, “N'ata ûkeegua bûrî ûntû bûthûûku nkûrûki rîra ngaatûmîra Njerusaremu inyamaara bibi bina, rûûyiû, yûûra rîînene, nyamû cia kîthaka na mûrimo kûûraga antû baao na nyamû! 22 Îndî ûkeegua kûrî na matigari ma nthaka na aarî bara bakaareetwa kîrî woû Mbabironi. Wona bûra barî na meeyia magana, ûkaamenya gîtûmi gîa kînyamaara kîonthe kîra ndeetereete Njerusaremu. 23 Ûgeetîgîîria wona mîtugo na mîkarîre yao, atî i kwarî na gîtûmi kîîganu gîa kûrûtha bûra ndaarûthire. I bu Mwathani Mwene Inya akuuga.”