Njosua aatuîka mûtongoria wa Isiraeri
31
1 Rîru Musa aumîîra aathi na mbere kwarîria antû bonthe ba Isiraeri. 2 Abeera, “Îîndî niû ndî na mîanka îgana rîmwe rîa mîrongo îîrî na ntiûmba kûbûtongoria. Mwathani ambîîrire, ‘Ûtiiriinga muuro wa Njorondani.’ 3 Mwathani Ngai wenu wengwa akaaringa arî mbere yenu. Akaathiria mîgongo îra îtwîre noogo naabi bûkaathi bwîgwatîre nthîgûrû yao. Njosua n'we mûtongoria wenu ûmûyerû, na akaathiyania naabi, wa ta bûra Mwathani augire. 4 Mwathani akaathiria mîgongo îra îtwîre nthîgûrû înu wa ta bûra aathiriirie Sioni na Ogu, anene ba Amori na nthîgûrû yao. 5 Mwathani akaaneenkanîra antû bara batwîre naagu kîrî biû, naabi bûkabarûtha ta bûra mbwathîîte maathanaani. 6 Îgîani na inya na bûûmîîrie. Bûtikaabakuthûke, n'ûntû Mwathani Ngai wenu wengwa akaathiyania naabi. Atibûrekeeria kana abûtiganîria.”7 Rîru Musa eeta Njosua mbere ya antû bonthe ba Isiraeri amwîra, “Îgua ûrî na inya na ûûmîîru n'ûntû i woû ûgaatongoreria antû baba bathûûngîre na beegwatîre nthîgûrû îra Mwathani aathiîtîîrie biûyûûyû biao auga akabaneenkera. 8 I Mwathani wengwa akeegua arî mbere yaku, na arî amwe naawe. Atigûtiganîria kana agûta. Kwoogu ûtikaathirîrwe n'inya kana ûmaka.”
9 Rîru Musa aandîka mawatho mama amaneenkanîra kîrî athînjîri ba Ngai, aana ba Rawi, bara bakamataga Îthandûkû rîa Kîrîîkanîro kîa Mwathani, na kîrî akûrû bonthe ba Isiraeri. 10 Rîru Musa abaatha abeera, “Woora mûthia wa mwanka wa mûgwanja, mwanka wa gûcookanîîrua, îgiita rîa kîatho gîa tûgaanda, 11 bûbatîîrue bûthoomagîra antû ba Isiraeri bonthe watho bûbû, rîra beethîranîîte amwe bantû ara Mwathani Ngai wenu akaathuura. 12 Bûbeethîranie amwe bonthe, arûme, aka na aana na kinya ageni bara batûûraga taûniini cienu, kaingo bathikîîria na beerutana gûtîîya Mwathani Ngai wenu na kwathîkîra bwega biugo bia watho bwake. 13 Bûrûthe ûgu kaingo aana baao bara bataiyî mawatho mama bamegua na beerutana gûtîîya Mwathani Ngai wenu. Bûrûthage ûgu îgiita rîonthe rîra bûgatûûra nthîgûrû îra bûthiîte kwîgwatîra bwariinga Njorondani.”
Antû ba Isiraeri bakaarega kwathîkîra Mwathani
14 Mwathani eera Musa, “Ntugû ya gûkua gwaku îrî akubî. Îta Njosua bûthi n'we Îremaani rîa kûrîîkana, naani nkamûtuîkithîrie mûtongoria wa Isiraeri ku.”
Kwoogu Musa na Njosua baathi îremaani rîa kûrîîkana. 15 Mwathani abaumîîra agu îremaani rîa kûrîîkanaga aarûngama îgûrû rîa mwîrîga arî gîtugîîni gîa îtu.
16 Mwathani eera Musa, “Ûrî akubî gûkua ûthingata biûyûûyû biaku. Na wona wakua, antû baba bakaanjîîria kûgonga ngai ciingî, ngai cia nthîgûrû ira bathiîte. Bagantiganîria na beenyangie kîrîîkanîro kîra ndaarûthire nabo. 17 Ntugû înu, nkaathûûra mûno i bo na mbatiganîrie. Nkaitha ûthiû bwakwa kuuma kîrî bo, nabo bakaathirua. Bakoona kînyamaara gîkîî na îgiita rîru i rîo bakauga, ‘Kînyamaara gîkî kîrîtûûyîîra n'ûntû Ngai wetû atirî amwe naati.’ 18 Îgiita rîru wana baandomba ntibacookeria maromba, n'ûntû i barûthîîte meeyia maanene ma kûgonga ngai ciingî.
19 “Îîndî andîkaani rwîmbo rûrû na bûrutane antû ba Isiraeri ru na bûbeere barwine. Bateethie kûrumenya, na kwoogu batiîgua barî na mwîgwatio baarega kûûmbathîkîra. 20 Nûntû rîra nkaabaira nthîgûrû îra ndaugire nkaanenkera biûyûûyû biao, nthîgûrû yûûyûrîîte îria na ûkî, na rîra bakaarîa babae na banore, bakaanjîîria kûgonga ngai ciingî, baancambie na beenyangie kîrîîkanîro gîakwa. 21 Na rîra inyamaara biinene bikaabaayîîra, nkabaririkania atî i baiyî biugo bia rwîmbo rûrû, na kwoogu batirî na mwîgwatio wa kûrega kûûmbathîkîra. Imbiyî bûra antû baba bakari kinya mbere bathûûngîra nthîgûrû îra ndaathiîtiirie kûbanenkera.” 22 Kwoogu Musa aandîka rwîmbo rûru ntugû wa înu na aarutana antû ba Isiraeri ru.
23 Mwathani aatha Njosua mwana wa Nuni amwîra ûûgû, “Îgîa na inya na ûcamba, n'ûntû ûkaira antû ba Isiraeri nthîgûrû îra ndaathiîtiirie kûbanenkera. Naani nkeegua ndî amwe naawe.”
24 Rîra Musa aarîîkiirie kwandîka biugo bia watho bûbû bunthe îbukuuni, 25 eera Arawi bara baakamataga Îthandûkû rîa Kîrîîkanîro kîa Mwathani, 26 “Thûkiani îbuku rîrî rîa watho bûrîaiganîîrie na îthandûkû rîa maathana rîa kîrîîkanîro na Ngai wenu. Îbuku rîrî i rîakwonanîîria i bwiyî bûra Mwathani eendaga bûrûtha. 27 Imbiyî bûrî antû ndemi na baûmo biongo. N'ûntû wegua i bûraûmagîria Mwathani kîongo ndî mwoyo na ndî kîrî biû rî, bûkaûmia bûgana ata ndaakua? 28 Kwoogu, îtaani akûrû ba mîîrîga yenu na arûngamîîri beenu bonthe amwe, mbeere biugo bibi bia watho na mbîte îgûrû na nthîgûrû birî akûûyî kaingo bionthe bimenya bûra bibatîîrue kûrûtha. 29 N'ûntû imbiyî ndaakua, bûtiitindanîîra na kûthûgaania i bûrîkû bwega kana i bûrîkû bûthûûku bwa kûrûtha, na bûgaatiga kwathîkîra Mwathani ta bûra ndaabwîrire. Kwoogu bûgaatûma Mwathani athûûra na mantû maathûûku makabûûyîîra.”
Rwîmbo rwa Musa
30 Rîru Musa aagweta mîgambo ya rwîmbo rûra Mwathani aamûnenkereete runthe antû ba Isiraeri bathikîîrîîtie. Biugo biaru i bio bibi: