32
1 Musa aathi na mbere na kuuga,“Thikîîria woû îgûrû, naani nkaaria;
Naawe nthîgûrû îgua bûra nkuuga.
2 Ûrutani bwakwa i bwarûke ta mbura,
na biugo biakwa bigûîrîîre ta maame,
ta manyunyuû makiurîra nyaki înjerû,
kana mbura ya mayîîga îkiurîra tûmîtî twothe.
3 N'ûntû Ngaatûmîîria riîtwa rîa Mwathani,
na nkaathîîrie bûra arî mûnene!
4 Mwathani i Rwara rwa iiga, ngûgî ciake n'imbagîru,
na njîra ciake cionthe n'imbagîru.
We i mwîtîgua na atibîtagia,
n'endeete ûmma na n'ûmwagîru.
5 Îndî biû antû ba Isiraeri i bûbîtîrîîtie Mwathani,
na n'ûntû bwa meeyia meenu, biû bûtirî aana baake kaîrî,
biû bûrî nthuke îmaramaru na îmbûraûru.
6 Ûgu i bu bûgûcookeria Mwathani nkaatho,
biû antû bûriitîîte na bwaga mathûgania ûûgû?
Anga we t'abaagu ûra aabûûmbire?
Anga t'we aabûthondekire na abûrikithia?
7 Ririkana ntugû cia karaaya,
Wîciirie îgûrû rîa mîanka ya nthuke ira nkûrûku.
Ûria abaagu na agakûmenyithia.
Ûûrithîrie kuuma kîrî antû beenu bara bakûrû na bagakwîra.
8 Rîra ûra mûnene mûno aanenkagîra mîgongo ithaka,
rîra aathûranaga mîgongo yonthe,
n'abeekîîre mîanka,
kûringana na bûra antû ba Isiraeri bagana.
9 Îndî antû ba Isiraeri bo i ba Mwathani.
Njakubu i rûgai rwa Mwathani rwa mwanya.
10 Eethîîre Isiraeri ng'aarûûni,
rwanda rûûtheri rwakûmakania.
Aabairigîîre na abacûûbîra;
abamenyeera ta kaana ka riitho rîake.
11 Wa ta ndiiû îkîrutana tuunga twayo kûbuurûûka,
bûra îtûgwataga na mathabu maayo giria tûkaagwa nthî,
nwa ta bu Mwathani arigîîrîîtie Isiraeri îtikaagwe.
12 Mwathani wenka n'we aatongoriirie Isiareri,
atagûteetheerua i ngai ciingî.
13 Aabaûkîîrie baathana gûntû kûra gûûkîîru nthîgûrûûni,
na barîa maciaro ma mînda.
N'abarerire na ûkî bwa njûkî kuuma mbacaacîîni cia maiga,
na maguta ma mîceituuni kuuma njaraani imbûmo cia maiga.
14 N'abarerire na maguta ma îria kuuma kîrî ng'ombe na îria kuuma kîrî mbûri,
amwe na maguta ma tûgondu na ma ntûrûme.
Abanenkera ng'ondu na mbûri ira nthoongi mûno cia Mbasani,
amwe na ngano îra nthongi mûno.
Baanyua ndibei îra mbega mûno îrûthîîtwe na rûûyî rwa ncabiibû.
15 Îndî biû Njesurunia bûkûnora i bwariingire Mwathani na thiarî.
Bwanorire, bwamata na bwagaangara.
Rîru bwatiganîria Ngai ûra wabûûmbire,
bwabûthîîria rwara rwa wonokio bwenu.
16 Bwatûma eegua rûriitho bwagonga ngai i ngeni,
bwamûthûûria na mantû meenu ma îgi.
17 Bwarutîra irundu biithûûku igongwana, nabio ti Ngai,
ngai ira bûtaiyî agu mbereeni,
ngai i ngeni ira ciabûkinyîrîîte kagiita gataarî karaaya,
ngai ira biûyûûyû bienu bitaathîkagîra.
18 I bwariganîîrue i rwara rwa iiga kaumo ka mîoyo yenu,
na bwariganîrua i ngai ûra aabûûmbire.
19 Mwathani akwona ûgu, athûûra.
Aathûûrua i nthaka na aarî baake.
20 Auga, ‘Nkabatiganîria,
mbone bûra bagaakara,
n'ûntû bo i nthuke îmbûmo kîongo,
antû batarî eetîgua.
21 I batûmîîte ndeegua rûriitho n'ûntû bwa kûgonga ngai cia mûbuanano,
banthûûria na ngai cia mana cia ûrongo.
Nani nkathaarima mîgongo îra îîngî beegue rûriitho,
na bathûûre Ndaathaarima mîgongo îra mîriitu.
22 Mûthûûro wakwa wakanaga ta mwanki.
Ûbîîthagia mwanka naara antû bara bakuû barî,
ûbîîthagia nthîgûrû na maciaro maayo,
ûkabîîthia mwanka ruungu rwa irîma.
23 Nkabareteera inyamaara bitarî mûthia,
na mbarathe na mîgwî yakwa yonthe.
24 Ngaatûma baceng'a i yûûra,
na bathirue i mîrimo îmîthûûku.
Nyamû cia kîthaka ikabaithûkîra,
na barûmaangwe i njoka irî na cûmû.
25 Ome antû bakaathirua na mpiû,
na ndeeni ya mîciî yenu ûguaya bûkaathana.
Aana baîthî bakaathira bonthe,
wana ngenke na aakûrû bationoka!
26 Ndaugîîte nkabanyagaaria mwanka mîthiani ya nthî,
ntûma bariganîria meeciiriani ma antû.
27 Îndî ntikîreka anthû baao beekumia,
n'ûntû bo nwa beebenie bakauga
“N'inya yetû yabacinda!
Ti Mwathani arûthîîte ûgu.”
28 Isiraeri i mûgongo ûtarî nwa mathûgania,
n'antû baariitu bara batarî na gûciûkîrwa.
29 Ûtakîîgua i babaûgî bagaciûkîrwa n'ûntû bûbû,
ûtakîîgua nwa baûmbe kûmenya mara marî mbere yao.
30 N'ata muntû ûmwe aûmba kwîngatia antû ngiri,
kana antû baîrî beengatia antû ngiri îkûmi?
Nwa kana Mwathani Ngai, Rwara rwao abatiganîrîîtie.
Ngai ûra arî inya akabarekeeria.
31 Îndî wa ta bûra kinya anthû beetû baiyî
ngai ciao itirî inya ta Mwathani Rwara rwetû.
32 Anthû beetû bamaramarîîte ta antû ba Sondomu na Ngomoora,
bakari ta mîcabiibû îra îciaraga ncabiibû irî cûmû na gana.
33 Bakari ta ndibei îrûthîîtwe na cûmû ya njoka,
mata ma nyamû ya nthî.
34 Mwathani n'aririkanaga mantû mara anthû barûthîîte,
bamagaiga nkorooni yake.
35 I niû nkaarîia bara babûrûthagîra mantû maathûûku.
Îgiita rîakinya magûrû maao makaabaratia.
Ntugû yao ya kînyamaara îgaakinya,
ntugû ya mûthiro wao îkinye.
36 Na mma Mwathani akaagaambîîra antû baake,
akeegîîrua aruti ngûgî baake kîao,
rîra akoona inya yao n'înthiru
na gûtirî nwa ûmwe waciao atigeere, arî nkombo kana atarî nkombo.
37 Rîru i rîo akaûria antû baake, Irî kû ngai ciao,
rwara rûra beetîgîîtie?
38 Ira bwareraga na maguta ma igongwana
na bûkairutîra ndibei.
Îîndî ga ciiye i bûteethie,
ga ciîthare ciîye ibûtuunyûkie.
39 Raithaani, niû ninka i niû Ngai.
Gûtirî Ngai ûngî tatiga niû!
I niû mbûragaga na i niû neenkanagîra mwoyo,
i niû nguraragia na i niû mboranagia,
gûtirî kîo kîûmba kûrigîîria bûra nkwenda kûrûtha.
40 Îîndî ingûûkîîria njara ciakwa îgûrû
mbuge, “Wa ta bûra ntûûraga mwoyo,
41 rîra ndaanoora rûûyiû rwakwa rûra rûyicaga,
na ndarugwata nkîgiita magamba,
nkeerîîria kîrî anthû baakwa,
ndîîrîîrie kîrî bara baanthwîre.
42 Ngaatûma mîgwî yakwa inyua nthakame yao,
na rûûyiû rwakwa rûtika nyama,
nthakame ya bara baûrage na ya mîgwate,
na biongo bia atongoria ba anthû baakwa.”
43 Kumiani Mwathani, biû îgûrû,
tiga araîka ba Ngai bamûgonge,
n'ûntû akeerîîria kîrî bara baûragaga aruti ngûgî baake.
Akeerîîria kîrî anthû baake
na atherie nthîgûrû yake na antû baake.’ ”
44 Kwoogu Musa na Njosua mwana wa Nuni baathi baacookeeria biugo bia rwîmbo rûru antû bonthe bakîîgagua. 45 Musa akûrîîkia kwîra antû bonthe ba Isiraeri biugo bionthe bia rwîmbo rûru, 46 abeera, “Bûmenyeere mûno bûririkanage biugo bibi ndabwîra îmunthî. Bûcookeerie aana beenu bio kaingo baûmba kwathîkîra biugo bia watho bûbû kûrû. 47 Ûrutani bûbû ti biugo bia mathee, i bio ûtûûro bwenu. Wona bwabiathîkîra bûgaatûûra îgiita rîîraaya nthîgûrû îra bûthiîte kwîgwatîra bwariinga muuro wa Njorondani.”
48 Ntugû wa înu Mwathani eera Musa, 49 “Îthi Moabu, ûtwee kîrîmaani kîa Nebo, kîmwe kîa irîma bia Abarimu kîra kîraitheene na taûni ya Njeriko. Ûcûûbîîrie nthîgûrû ya Kanaani îra nkûnenkera antû ba Isiraeri îtuîka rûgai rwao. 50 Ûgaakuîra gûku kîrîmaani, wa ta bûra mûruanyûkwe Arûni aakuîrîîre kîrîmaani kîa Ori, ûthiingate biûyûûyû bienu. 51 N'ûntû biû bûrî baîrî i bwaregire gûtuîka eetîgua kîrî niû mbere ya antû ba Isiraeri naara Kandesi, rûûyîîni rwa Meriba rwanda rwa Sini. I bwaremirwe i kwonania ûtheru bwakwa mbere ya antû ba Isiraeri. 52 Kwoogu ûkoona nthîgûrû ûrî kûûraaya, îndî woû ûtiithûûngîra nthîgûrû îra nkûnenkera antû ba Isiraeri.”